அன்பின் அவதாரம்!

-
அன்பிற்கு ஒரு உருவம் கொடுத்தால் அது, 'இயேசு'
போன்று தான் இருக்கும். கடவுளாய் இருப்பினும்,
மனிதனாய் பிறந்து, வாழ்ந்த, ஒவ்வொரு நொடியிலும்,
அன்பை மட்டுமே, தன்னிடமிருந்து வெளிப்படுத்தி,
இவ்வுலகமே, சொர்க்கமாக, வாழ்ந்துக் காட்டினார்.

இயேசு இப்போதும், எப்போதும் நம்மிடையே தான்
வாழ்கிறார்.

எப்போதெல்லாம், நாம் பிறர் மீது அன்பு செலுத்துகிறோமோ,
அப்போதெல்லாம், 'இயேசு' அங்கே தோன்றி விடுகிறார்.
அவர் இருப்பது நமக்கு தெரிந்து விடுகிறது.

அன்பு இல்லாத, நம் நேரங்கள், மனித தன்மை அற்றது
மட்டுமல்ல; ஆண்டவரையே மறக்க துணிந்த நேரமுமாகும்.
இயேசுவின் மேல் அன்பு வைத்தவர்கள், உலகத்து உயிர்கள்
அனைத்தின் மேலும் அன்பு செலுத்த வேண்டும்.

அதுதான், இயேசுவின் பிறந்த நாளுக்கு நாம் அவருக்கு தரும்
சிறந்த பரிசு!

விண்ணைக் கடந்து வந்து, மண்ணகத்தில் தன்னை
வெளிப்படுத்தியவர், முழுமையான இறைவன், மனிதர்களின்
பாவம் போக்கவே மனிதனாக பிறந்து, சிலுவையில்
அறையப்பட்டு, தன்னுடைய பரிசுத்தமான ரத்தத்தை முழு
உலகத்திற்கும் பாவ பரிகார பலியாக சிந்திக் கொடுத்தார்.

நமக்குள் குடி கொள்ள விரும்பும் அவர், நம் இதயத்து
குடில்களை தான் எதிர்பார்க்கிறார்.

அவர் சொன்னதெல்லாம் இதுதான்!

'தன்னைத் தானே நேசிப்பது போல், பிறரையும் நேசி;
உன்னை ஒரு கன்னத்தில் அறைந்தால், மறு கன்னத்தை
காட்டு;
உன்னை சபிப்பவர்களையும் நீ ஆசிர்வதி...' என்றார்.

இந்த கிறிஸ்துமஸ் நன்நாளில், நம் எதிரிகளையும்
நேசிப்போம்; அன்பு நிறைந்த உலகமாக மாற்றுவோம்!

பல்லாயிரம் செலவழித்து, மின்னலங்காரமும், வெட்டுகிற
இனிப்பும், ஜோடனைகளும், கிறிஸ்துமஸ்க்கு
இலக்கணமாகாது.

ஆயிரக்கணக்கில் செலவு செய்து நாம் மட்டும் உடை
வாங்கிக்கொள்ளாமல், நம்மைச் சுற்றிலுமுள்ள ஏழைகளுக்கு
உடைகள், கேக் வாங்கித் தருவோம்.

நம்முடைய எதிரிகளிடம் சென்று, கிறிஸ்துமஸ் வாழ்த்துச்
சொல்லி, அவர்கள் நமக்கு செய்த துரோகங்களை மன்னித்து
விட்டேன் என்று சொல்லுவோம்.
அவர்களையும் இயேசுவின் பெயரால் ஆசிர்வதிப்போம்.

இப்படிப்பட்ட கிறிஸ்துமஸ் பண்டிகையை தான்,
இந்த இயேசு பாலன் விரும்புகிறார்.

அவரைப்போல எல்லாரையும் அன்பு செய்வோம்.

ஹேப்பி கிறிஸ்மஸ்!
-
---------------------------------
நன்றி-தினமலர்