160 கி.மீ. வேகத்தில் செல்லும் அதிநவீன ரெயில் சென்னை ஐ.சி.எப்.பில் அறிமுகம்

சென்னை,

சென்னையில் உள்ள ரெயில் பெட்டி தொழிற்சாலையில்
(ஐ.சி.எப்.) நேற்று ‘ரெயில்-18’ என்ற அதிநவீன ரெயில்
அறிமுக நிகழ்ச்சி நடைபெற்றது.

நிகழ்ச்சிக்கு ரெயில்வே வாரிய தலைவர் அஷ்வனி லோஹானி
தலைமை தாங்கினார். ஐ.சி.எப். பொதுமேலாளர் சுதான்ஷ்சு மணி,
தெற்கு ரெயில்வே பொதுமேலாளர் ஆர்.கே.குல்ஷ் ரஸ்தா மற்றும்
ரெயில்வே அதிகாரிகள் கலந்து கொண்டனர்.

ஐ.சி.எப். அருங்காட்சியகத்தில் ‘ரெயில்-18’ குறித்த
காணொலியை வெளியிட்ட அஷ்வனி லோஹானி, பின்னர்
‘ரெயில்-18’ என்ற அதிநவீன ரெயிலை அறிமுகம் செய்து,
கொடியசைத்து அதன் பயணத்தை தொடங்கி வைத்தார்.

மேலும் அவர், அந்த ரெயிலின் உள்ளே சென்று டிரைவர்
அறை மற்றும் பயணிகளின் பெட்டிகள் ஆகியவற்றை
ஆய்வு செய்தார். இதையடுத்து அவர் நிருபர்களிடம் கூறியதாவது:-

ஐ.சி.எப். மற்றும் இந்தியன் ரெயில்வேக்கு ‘ரெயில்-18’
தொடங்கியிருப்பது ஒரு வரலாற்று சிறப்பு மிக்க நிகழ்வு.
இந்தியன் ரெயில்வே ஒரு மைல்கல்லை எட்டியுள்ளது.

பயணிகளின் எண்ண ஓட்டத்துக்கு ஏற்ப மாற்றங்கள்
புகுத்தப்பட்டு வருகிறது. நவீன வசதிகளுடன் புதிய ரெயில்
அறிமுகப்படுத்தப்பட்டுள்ளது. இந்த ரெயில் 18 மாதங்களில்
உள்நாட்டு தொழில்நுட்பத்திலேயே தயாரிக்கப்பட்டுள்ளது
சாதனை மிக்கது.

இந்த ரெயில் சோதனை நடத்தப்பட்டு ஜனவரி மாதம் முதல்
இயக்கப்படும் என்று எதிர்பார்க்கப்படுகிறது.

இந்த ரெயில் மணிக்கு 160 கி.மீ. வேகத்தில் செல்லும்.
அதற்கான கட்டுமானம் நம்மிடம் இருக்கிறது. வழக்கமான
ரெயில்களில் என்ஜின் தனியாக இருக்கும்.

ஆனால் இந்த ரெயிலில் பெட்டிகளின் அடியில் என்ஜின் இருக்கும்.
‘ரெயில்-18’ போக்குவரத்து தொடங்கிய பின்னர் அடுத்த
கட்டமாக ‘ரெயில்-20’ தயாரிக்கப்படும்.

இதன் சோதனை ஓட்டம் வெற்றிகரமாக நடந்த பின்னர்,
இன்னும் அதிகமான ரெயில்கள் தயாரிக்கப்படும். எந்த
வழித்தடத்தில் இந்த ரெயில்களை இயக்கவேண்டும் என்பது
இன்னும் முடிவு செய்யப்படவில்லை. இவ்வாறு அவர் கூறினார்.

ஐ.சி.எப். பொதுமேலாளர் சுதான்ஷ்சு மணி கூறியதாவது:-

‘ரெயில்-18’ சதாப்தி ரெயில்களுக்கு மாற்றாக இயக்கப்படும்.
வழக்கமான ரெயில்களைவிடவும் அதிக வேகத்தில் பயணிக்கும்
இது பயண நேரத்தை கணிசமாக குறைக்கும்.

இந்த ரெயிலில் எல்லா உபகரணங்களும் பெட்டியின் அடியில்
பொருத்தப்பட்டுள்ளதால் பயணிகளுக்கு அதிக இடவசதி
கிடைக்கும். பாதுகாப்பானதும், பல்வேறு நவீன வசதிகளும்
கொண்டது.

இதுபோன்று மேலும் ஒரு ரெயில் இந்த நிதி ஆண்டு
தயாரிக்கப்படும். பயணிகளின் அனுபவத்தை பொறுத்து
ரெயில்வே வாரியம் ஒப்புதலின்பேரில் அதிக ரெயில்கள்
தயாரிக்க உள்ளோம்.

‘ரெயில்-18’ திட்டத்தின்கீழ் இந்த ஆண்டு மேலும்
5 ரெயில்கள் தயாரிக்கப்படும். இவ்வாறு அவர் கூறினார்.-
---------------------
தினத்தந்தி