சதாப்திக்கு பதிலாக ‘டிரைன் 18’ ரயில்கள்: விரைவில் அறிமுகம் செய்ய சென்னையில் தயாராகிறது

.

சதாப்திக்கு பதிலாக ‘டிரைன் 18’ எனும் பெயரிலான
அதிவிரைவு ரயில்கள் விரைவில் அறிமுகப்படுத்தப்பட
உள்ளன.

சென்னையில் ஐ.சி.எஃப் ரயில் தொழிற்சாலையில் தயாராகும்
இவை முடியும் தருவாயில் உள்ளன.

சுமார் முப்பது வருடங்களுக்கு முன்பாக அறிமுகப்படுத்தப்பட்ட
விரைவு ரயில் சதாப்தி எக்ஸ்பிரஸ். இருநகரங்களுக்கு இடையே
ஓடும் இந்தப் பயணிகள் விரைவு ரயில் பெட்டிகள் வெளி
நாடுகளில் தயாரானவை. இந்த வகை சதாப்தி ரயில்கள்
நாட்டின் பெரும்பாலான மாநிலங்களின் நகரங்களுக்கு இடையே
ஒடுகிறது.


தற்போது அதற்கு பதிலாகப் புதிய ரயில் பெட்டிகள் தயாராகி
வருகின்றன. பிரதமர் நரேந்திர மோடியின் ‘மேக் இன் இந்தியா’
திட்டத்தின் கீழ் தயாரானவற்றுக்கு ‘டிரைன் 18’ எனப்
பெயரிடப்பட உள்ளன. சதாப்தியை விட அதிகமாக 160 கி.மீ.
வேகத்தில் அவை இந்திய ரயில் பாதைகளில் ஓடத் தயாராகி
வருகின்றன. இதனால், சதாப்தியை விட சுமார் 15 சதவிகிதப்
பயண நேரம் மிச்சமாக உள்ளது.

இவற்றில் இரண்டு முதல்கட்டமாக அடுத்த ஓரிரு வாரங்களில்
அறிமுகப்படுத்த உள்ளன. இதன் ஓடுபாதை நகரங்கள்
பிரதமர் மோடி அலுவலகத்தால் முடிவு செய்யப்பட உள்ளது.

முதலில் அக்டோபர் 29-ல் அறிமுகப்படுத்த திட்டமிடப்பட்டிருந்த
முதல் டிரைன் 18, டெல்லி மற்றும் ம.பி. மாநிலத் தலைநகரான
போபாலுக்கு இடையே ஓடும் என இருந்தது.

ஆனால், ம.பி.யில் தற்போது சட்டப்பேரவை தேர்தல்
அறிவிக்கப்பட்டுள்ளது. இதனால், அங்கு அமலில் உள்ள தேர்தல்
நடத்தை விதிமுறைகளால் அந்தத் திட்டம் மாற்றப்
பட்டிருப்பதாகக் கூறப்படுகிறது. அதற்குப் பதிலாக இரண்டு
டிரைன் 18 ரயில்கள் விரைவில் விடப்பட இருப்பதாகவும்
எதிர்பார்க்கப்படுகிறது.

இது குறித்து ‘இந்து தமிழ்’ இணையதளத்திடம்
மத்திய ரயில்வே துறை வட்டாரம் கூறும்போது, ‘பிஹாரின்
தலைநகரான பாட்னாவில் இருந்து இரண்டு டிரைன்
18 ரயில்கள் விடப்பட உள்ளன. அவற்றில் ஒன்று, உ.பி.யின்
தலைநகரான லக்னோவிற்கும், மற்றொன்று பிரதமர் மோடியின்
தொகுதியான வாரணாசிக்கும் சென்று வரும்’ எனத்
தெரிவித்தனர்.

டிரைன் 18 ரயிலின் புதிய பெட்டிகள் எக்ஸிகியூடிவ் கோச்
மற்றும் சாதாரண கோச் என இரு வகைகளாக அமைந்துள்ளன.
ஒரு டிரைன் 18-ல் இரண்டு எக்ஸிகியூடிவ் பெட்டிகளும்,
14 எக்ஸிகியூடிவ் அல்லாத பெட்டிகளும் இணைக்கப்பட உள்ளன.

எக்ஸிகியூடிவ் பெட்டியில் 56 மற்றும் எக்ஸிகியூடிவ் அல்லாத
வகை பெட்டியில் 78 இருக்கைகளும் அமைகின்றன.

பயணிகளின் பயணப்பெட்டிகள் அதிக அளவில் வைக்கும்படி
இடவசதி செய்யப்பட்டுள்ளன. இதன் கதவுகளும் படிகளும்
தானியங்கி முறையில் பொருத்தப்பட்டுள்ளன. சுகாதார
முறையிலான அதிநவீன கழிப்பறை வசதிகளும் உள்ளன.

இந்த ரயிலின் இருமுனைகளிலும் அதன் ஓட்டுநருக்கான
அறைகளுடன் டிரைன் 18 அமைக்கப்பட்டுள்ளது. இதன் ஒரு
பெட்டியின் மதிப்பு ரூ.5 முதல் 6 கோடி வரை இருக்கும் என
மதிப்படப்பட்டுள்ளது.
-
-------------------------------------
தி இந்து