ஞானக்கூத்தன் கவிதைகள்

**ayyasamy ram** · **ayyasamy ram** Wed Oct 17, 2018 1:01 pm

-
அம்மாவின் பொய்கள்

பெண்ணுடன்
சினேகம் கொண்டால்
காதறுந்து போகும் என்றாய்

தவறுகள் செய்தால் சாமி
கண்களைக் குத்தும் என்றாய்

தின்பதற் கேதும் கேட்டால்
வயிற்றுக்குக் கெடுதல் என்றாய்

ஒருமுறை தவிட்டுக்காக
வாங்கினேன் உன்னை என்றாய்

எத்தனைப் பொய்கள் முன்பு
என்னிடம் சொன்னாய் அம்மா

அத்தனைப் பொய்கள் முன்பு
சொன்ன நீ எதனாலின்று
பொய்களை நிறுத்திக் கொண்டாய்

தவறு மேல் தவறு செய்யும்
ஆற்றல் போய் விட்டதென்றா?

எனக்கினி பொய்கள் தேவை
இல்லையென் றெண்ணினாயா?

அல்லது வயதானோர்க்குத்
தகுந்ததாய்ப் பொய்கள் சொல்லும்
பொறுப்பினி அரசாங்கத்தைச்
சார்ந்ததாய்க் கருதினாயா?

தாய்ப்பாலை நிறுத்தல் போலத்
தாய்ப் பொய்யை நிறுத்தலாமா
உன்பிள்ளை உன்னை விட்டால்
வேறெங்கு பெறுவான் பொய்கள்?
-
-----------------------------

**ayyasamy ram** · **ayyasamy ram** Wed Oct 17, 2018 1:01 pm

அசைவு
--------------

திங்கள் கிழமை போய்விட்டது
செவ்வாயும் போய்விட்டது
கோல வாசலைப்
புதனின் வெயில் உலர்த்துகிறது.

இன்னும் உன்னை நான்
பார்த்த பாடில்லை, ஞானாட்சரி

ஒருபகல் ஒருராத்திரி மீண்டும்
ஒருபகல் ஒருராத்திரி கடந்தால்
அடையப் பெறும் ஒரு நகரம் போல
ஆகிவிட்டாய் நீ ஞானாட்சரி

ஒரு வாகனம் போல என் சரீரம்
உன்னை நோக்கி நகர்கிறது
அறிவாயோ நீ ஞானாட்சரி
-
--------------------------

**ayyasamy ram** · **ayyasamy ram** Wed Oct 17, 2018 1:02 pm

கீழ்வெண்மணி

மல்லாந்த
மண்ணின் கர்ப்ப
வயிறெனத் தெரிந்த கீற்றுக்
குடிசைகள் சாம்பற் காடாய்ப்
போயின

புகையோடு விடிந்த போதில்
ஊர்க்காரர் திரண்டு வந்தார்
குருவிகள் இவைகள் என்றார்

குழந்தைகள் இவைகள் என்றார்
பெண்களோ இவைகள்? காலி
கன்றுகள் இவைகள் என்றார்

இரவிலோ பொசுக்கப்பட்ட
அனைத்துக்கும் அஸ்தி கண்டார்
நாகரிகம் ஒன்று நீங்க
-
---------------------------

**ayyasamy ram** · **ayyasamy ram** Wed Oct 17, 2018 1:02 pm

காலவழுவமைதி
-
“தலைவரார்களேங்…
தமிழ்ப்பெருமாக்களேங்… வணக்கொம்.

தொண்ணூறாம் வாட்டத்தில் பாசும் வாய்ப்பய்த்
தாந்தமைக்கு மகிழ்கின்றேன். இன்றய்த் தீனம்
கண்ணீரில் பசித்தொய்ரில் மாக்களெல்லாம்
காலங்கும் காட்சியினெய்க் காண்கின்றோங் நாம்”

‘வண்ணாரப் பேட்டகிள சார்பில் மாலெ’

“வளமான தாமிழர்கள் வாட லாமா?
கண்ணாளா போருக்குப் போய்வா யேன்ற
பொற நான்ற்றுத் தாயெய் நாம் மறந்திட்டோமா?

தாமிழர்கள் சொகவாழ்வாய்த் திட்டாமிட்டுக்
கெடுப்பவர்கள் பிணாக்குவ்யல் காண்போ மின்றே
நாமெல்லாம் வரிப்பொலிகள் பகைவர் பூனெய்
நாரிமதி படைத்தோரை ஒழிப்போம் வாரீர்

தலைவரார்களேங்
பொதுமாக்களேங் நானின்னும்
யிருகூட்டம் பேசயிருப்பதால்
வொடய் பெறுகறேன் வணக்கொம்”

‘இன்னுமிருவர்பேச இருக்கிறார்கள்

அமைதி… அமைதி…
-

**ayyasamy ram** · **ayyasamy ram** Wed Oct 17, 2018 1:03 pm

மரவட்டை

ஊர்ந்து
செல்கிறது மெல்ல மெல்ல
செந்நிறமான நீள் மரவட்டை

ஓரிடத்தை எதனாலோ விட்டுவிட்டு
எங்கேயோ செல்கிறது. பரபரப்பாய்.

போகட்டும் பையா மரவட்டை அதன்
துக்குணிக் கால்களைப் பரவிக் கொண்டு
தடைகள் அங்கங்கே ஏற்பட
சுருண்டு கொள்கிறது அச் சீவன்.

தீண்டாதே பையா அதனை. தொட்டால்
சுருண்டு கொள்ளும் பயந்தபடி.

வட்டமாய்ச் சுருண்டு கிடக்கும் அப்போது
என்னென்ன தோன்றுமோ அதன் மனதில்?

தொடாதே பையா, நீ அதனை
தொட்டால் சுருண்டு பின் உடம்பை
நீட்டும் போதில் ஒருவேளை
மறக்கக் கூடும் தன் மார்க்கத்தை.
-
---------------------------

நன்றி- தி இந்து

**T.N.Balasubramanian** · **T.N.Balasubramanian** Wed Oct 17, 2018 2:23 pm

Code:: அம்மாவின் பொய்கள்

.

என்னை எந்தன் இளம் வயதிற்கு அழைத்து சென்ற கவிதை
படித்து முடித்ததும் என்னையுமறியாமல் ஒரு புன்முறுவல் புன்னகை

ரமணியன்

**ayyasamy ram** · **ayyasamy ram** Fri Oct 26, 2018 8:20 pm

ஸ்ரீலஸ்ரீ- கவிதை - ஞானக்கூத்தன்
----------------

யாரோ முனிவன் தவமிருந்தான்
வரங்கள் பெற்றான் அதன் முடிவில்
நீர்மேல் நடக்க தீபட்டால்
எரியாதிருக்க என்றிரண்டு

ஆற்றின் மேலே அவன் நடந்தான்
கொடுக்குத் தீயைச் சந்தனம் போல்
உடம்பில் பூசிச் சோதித்தான்
மக்கள் அறிந்தார் கும்பிட்டார்

மறுநாள் காலை நீராட
முனிவன் போனான் ஆற்றுக்கு
நீருக்குள்ளே கால்வைக்க
முடியாதவனாய்த் திடுக்கிட்டான்

கண்ணால் கண்டால் பேராறு
காலைப் போட்டால் நடைபாதை
சிரித்துக் கொண்டு கண்ணெதிரே
ஆறு போச்சு தந்திரமாய்

காலைக் குளியல் போயிற்றா
கிரியை எல்லாம் போயிற்று
வேர்த்துப் போனான். அத்துளிகள்
உடம்பைப் பொத்து வரக்கண்டான்

யாரோ பிணத்தைக் கண்டெடுத்தார்
செத்துப் போக ஒரு நாளில்
தீயிலிட்டார். அது சற்றும்
வேகாதிருக்கக் கைவிட்டார்

நீரின் மேலே நடப்பதற்கும்
தீயாலழியா திருப்பதற்கும்
வரங்கள் பெற்ற மாமுனிவன்
மக்கிப் போக நாளாச்சு
-
-----------------------------

**ayyasamy ram** · **ayyasamy ram** Fri Oct 26, 2018 8:22 pm

யெதிரெதிர் உலகங்கள் ~ ஞானக்கூத்தன் படைப்புகள்
------------

கண்ணிமையாக் கால்தோயாத் தேவர் நாட்டில்
திரிசங்கைப் போகவிட மாட்டேன் என்று
ஒருமுட்டாள் சொன்னதுபே ராபத்தாச்சு

தன்னாளைத் திருப்பியதும் விஸ்வா மித்ரன்
கொதித்தெழுந்தான். பிரம்மாவுக் கெதிர்ப்படைப்புத்
தான் செய்வே னென்று சொல்லி ஆரம்பித்தான்

கண்ணிமையாக் கால்தோயாத் தேவரெல்லாம்
ஓடிவந்தார் கடவுளுடன். வேண்டாமென்று
முனிவர்களில் மாமணியைக் கெஞ்சிக் கேட்டார்.

சினம்தணிந்தான் தவஞானி. ஆனால் அந்தக்
கணம்மட்டும் படைத்தவைகள் உலகில் என்றும்
இருந்துவர வேண்டுமென்றான். வரமும் பெற்றான்

அன்றுமுதல் பிரம்மாவும் விஸ்வாமித்ர
மாமுனியும் படைத்தவைகள் அடுத்தடுத்து
வாழ்ந்துவரல் வழக்காச்சு. எடுத்துக்காட்டு:

மயிலுக்கு வான்கோழி புலிக்குப் பூனை
குதிரைக்குக் கழுதை குயிலுக்குக் காக்கை
கவிஞர்களுக் கெந்நாளும் பண்டிட்ஜீக்கள்

Sponsored content · Sponsored content

ஞானக்கூத்தன் கவிதைகள்

ஞானக்கூத்தன் கவிதைகள்

Re: ஞானக்கூத்தன் கவிதைகள்

Re: ஞானக்கூத்தன் கவிதைகள்

Re: ஞானக்கூத்தன் கவிதைகள்

Re: ஞானக்கூத்தன் கவிதைகள்

Re: ஞானக்கூத்தன் கவிதைகள்

Re: ஞானக்கூத்தன் கவிதைகள்

Re: ஞானக்கூத்தன் கவிதைகள்

Re: ஞானக்கூத்தன் கவிதைகள்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக