குடல்வால் நோய் - Appendicitis

உலகின் உயிரினத் தோற்றத்தின் ஆரம்ப காலகட்டத்தில் முயல், எலி போன்ற மிருகங்களுக்கு மட்டுமே இருந்தது இந்த குடல்வால். ஆனால் காலப்போக்கில் பரிணாம வளர்ச்சியின் காரணமாக, மனித இனம் தோன்றிய போது,. குடல் வால் மனிதனோடும் ஒட்டி உறவாட ஆரம்பித்தது. அதாவது இதை உயிரியலில், பயன்படாத எச்ச உறுப்புகள் என்பார்கள். ஒரு காலத்தில் மற்ற விலங்கினங்களில் இருந்த போது, தாவரங்களில் உள்ள செல்லுலோசைச் செரிக்க இது பயன்பட்டு வந்தது. ஆனால் மனிதனின் உணவுப்பழக்கம் மாற மாற, இது பயனற்ற, எச்ச உறுப்பாக மாறி விட்டது.

இப்படி மனிதனுக்கு எந்த வகையிலும் பயன்தராத குடல்வால், சில சமயங்களில் திடீரென ஆபத்தை விளைவிக்கும் தன்மை கொண்டது. மனிதனின் வயிற்றில் பெருங்குடலும், சிறுகுடலும் சேர்கிற இடத்தில் இருக்கும் இதில், வீக்கம் ஏற்பட்டால் அது தான் பிரச்சினையாகிறது. இதற்குப் பெயர் தான் அபென்டிசைடிஸ்.

குடல்வால் எப்போது பாதிப்பை சந்திக்கிறது என்றால், இதில் சிறிய அளவில் சளிச் சவ்வானது தொடர்ந்து சுரக்கும். இது பெருங்குடலுக்குள் வழிகின்ற வரை எந்தப் பாதிப்பும் கிடையாது. ஆனால் சில சமயங்களில் இந்தக் குடல்வாலில் ஆரஞ்சுப்பழத்தின் கொட்டை, சில விஷங்கள், நச்சுப் பொருட்கள்,. நுண்ணிய புழுக்கள், நகத்துண்டு போன்றவை போய் ஜம்மென்று அமர்ந்து கொண்டாலோ, இந்தப் பகுதியில் நெறிக்கட்டிக் கொண்டாலோ மேலே குறிப்பிட்ட சளிச் சவ்வு பெருங்குடலுக்குள் வழிவது தடைப்பட்டு போய் குடல்வாலில் தொற்றுக் கிருமிகள் உண்டாக்கி அழுகி வீக்கம் அடைகிறது.

இப்படி அந்தப் பகுதியில் ஏற்படுகிற வீக்கமும், அழுகல் நிலையும் அதிகமாகப் போய் அபெண்டிக்ஸ் எனப்படும் குடல்வால் வெடித்து இங்கு தொற்றி இருக்கும் கிருமிகள் வயிற்றில் இருக்கும் பக்கத்து உறுப்புகளுக்கும் பரவி மரணம் கூட சம்பவித்து விடலாம். இப்போது தெரிகிறதா? குடல்வால் ஏற்படும் அபாயம்?

அறிகுறிகள்:

இந்தப் பாதிப்பின் போது திடீரென ஒரு பக்கம் மட்டும் வயிற்றில் வலி ஏற்படும். போகப்போக வலி கீழ்நோக்கி வலது பக்கமாக இறங்கும். இப்படி ஏற்படுகிற வலி தாங்க முடியாத அளவுக்கு இருக்கும். இதன் காரணமாக பசி எடுக்காது, சாப்பிட்ட பொருள் வாந்தியாகும். அப்போதும் வலி குறையாது. இந்த வலிக்கு தற்காலிகமாக வேண்டுமென்றால் சில மருந்துகள் இதம் தரும். ஆனால் நாளடைவில் இது தீவிரமாகும் போது ஆபரேஷன் மட்டுமே தீர்வாக அமையும்.

பரிசோதனை முறைகள்:

குடல்வால் நோயை எக்ஸ்-ரே மூலம் கண்டு பிடிக்க முடியாது. இந்தப் பாதிப்புள்ளவர்கள் ரத்தச் சோதனை செய்து பார்த்தால் அவர்களுக்கு வெள்ளை அணுக்களின் எண்ணிக்கை அதிக அளவில் இருக்கும். இதுவும் ஒரு சிலருக்குத்தான் கண்டு பிடிக்க முடியும். ஸ்கேன் செய்து பார்த்தும் கண்டு பிடிக்கலாம். ஆனாலும் துரதிர்ஷ்டவசமாக, இதிலும் ஒரு சிலருக்குத் தான் கண்டு பிடிக்க முடியும். ஒரு சில அனுபவம் வாய்ந்த டாக்டர்கள், நோயாளியின் வயிற்றில் கையை வைத்துப் பார்த்தே அப்பெண்டிக்ஸ் பாதித்திருப்பதை திட்டவட்டமாகக் கூறி விடுவார்கள்.

மேல்சொன்ன நடைமுறைகளுக்கு முற்றுப்புள்ளி வைப்பது போல, வந்திருப்பது தான், லேப்ராஸ்கோபி என்ற கருவி. இதன் கை கோர்த்துக் கொண்டு, அபென்டிக்ஸ் பாதிப்பின் முழு ஜாதகத்தையும் கணித்து விடலாம்.

தீர்வு:

அப்பென்டிக்ஸ் வந்தால் உடனே அறுவை சிகிச்சை செய்ய வேண்டும், ஆபரேஷன் செய்த மறுநாளே, நோயாளி வீடு திரும்பலாம்.