மோகன் பாகவத் ‘சிங்கம், நாய்கள்’ பேச்சுக்கு அம்பேத்கர் பேரன் கடும் கண்டனம்: எதிர்க்கட்சிகள் ஆவேசம்

ஆர்எஸ்எஸ் அமைப்பின் தலைவர் மோகன் பாகவத்
சிக்காகோவில் நடந்த உலக இந்து மாநாட்டில் சிங்கம்,
நாய்களை உவமையாக குறிப்பிட்டு பேசியதற்கு
அம்பேத்கர் பேரனும், பரிபா பகுஜன் மகாசங் தலைவர்
பிரகாஷ் அம்பேத்கர் கடும் கண்டனம் தெரிவித்துள்ளார்.

சுவாமி விவேகானந்தர் கடந்த 1893-ம் ஆண்டு சிகாகோவில்
இந்து மதம் குறித்து உரையாற்றினார். அதன் 125-வது
நினைவுநாளையொட்டி சிகாகோவில் 2-வது உலக இந்து
மாநாடு நடந்தது.

இதில் ஆர்.எஸ்எஸ். அமைப்பின் தலைவர் மோகன் பகவத்
பங்கேற்றார்.

அப்போது அவர் பேசுகையில், இந்துக்கள் அனைவரும்
ஒன்றாக இணைவது என்பது மிகக்கடினமான ஒரு செயல்.
முன்னதாக, நம்முடைய அமைப்பில் இருக்கும் சேவகர்கள்
இந்துக்கள் வீடுகளுக்குச் சென்று மக்களை ஒன்றுதிரட்ட
முயற்சித்தனர்.
ஆனால், சிங்கம் ஒருபோதும் கூட்டமாக நடக்காது என்று
தெரிவித்தார்கள்.

சிங்கங்கள் கூட்டமாக நடக்காதபோது, தனியாக
ஒரு சிங்கமோ அல்லது வங்காளப் புலியோ காட்டில் நடந்து
செல்லும்போது காட்டுநாய்கள் வேட்டையாடி அழித்துவிடும்.
இதைக் கண்டிப்பாக மறந்துவிடக்கூடாது என்று பேசி
இருந்தார்.

ஆர்எஸ்எஸ் தலைவர் மோகன் பாகவத்தின் இந்தப்
பேச்சுக்கு பரிபா பகுஜன் மகாசங் தலைவர்
பிரகாஷ் அம்பேத்கர் கடும் கண்டனம் தெரிவித்துள்ளார்.

அவர் நிருபர்களுக்கு அளித்த பேட்டியில் கூறியதாவது:
-
எதிர்க்கட்சிகளைத்தான் நாய் என்று மோகன்பாகவத்
குறிப்பிட்டுள்ளார். மோகன் பாகவத்தின் இந்த மனநிலையை
நான் வன்மையாகக் கண்டிக்கிறேன்.

நாட்டில் கட்சிகள் ஆட்சிக்கு வரும், போகும், ஆனால்,
மோகன் பாகவத்தின் இந்த மனநிலை என்பது நாட்டில்
இருக்கும் எதிர்க்கட்சிகள் தங்களுக்கு எதிராகப் பேசக்கூடாது,
சண்டையிடக்கூடாது என்பதைக் குறிப்பதாகும்.

இந்த மனநிலையால்தான் கடந்த 1949-ம் ஆண்டு
சர்தார் படேல் துணைப் பிரதமராக இருந்தபோது ஆர்எஸ்எஸ்
அமைப்பினர் சிறை செல்ல நேர்ந்தது. ஆனால் அதன்பின்
ஆர்எஸ்எஸ் அமைப்பினர் விடுவிக்கப்பட்டபோதிலும்,
அந்தச் சுதந்திரத்தை இன்னும் ஆர்எஸ்எஸ் தவறாகப்
பயன்படுத்தி வருகின்றனர்.

வரும் மக்களவைத் தேர்தலில் பாஜகவை மீண்டும் ஆட்சிக்குக்
கொண்டுவருவது குறித்து மக்கள் சிந்தித்து செயல்பட வேண்டும்.
சமீபத்தில் நடந்த பாஜக தேசிய செயற்குழுவில் அடிபணியாத
பாஜக என்ற முழக்கம் முன்வைத்தார்கள்.

ஆனால், குஜராத்தில் நடந்த சட்டப்பேரவைத் தேர்தலில்
ஏறக்குறையத் தோற்கும் நிலைக்கு வந்து வெற்றி பெற்றார்கள்,
கர்நாடகாவில் பெரும்பான்மை இல்லாமல் ஆட்சியை இழந்தார்கள்.

இன்னும் 2 மாதங்கள்தான் அதற்குள் மத்தியப் பிரதேசம்,
ராஜஸ்தான், சட்டீஸ்கர்,மிசோரம் மாநில சட்டப்பேரவைத்
தேர்தல் முடிவு தெரிந்துவிடும்.
-
இந்த மாநிலங்களுக்குச் சமீபத்தில் சென்றிருந்தேன்,
காங்கிரஸ் உள்ளிட்ட எதிர்க்கட்சிகள் வலுவான அமைத்து
போட்டியிட்டால் இந்த மாநிலங்களில் பாஜக தோற்கும்.

இவ்வாறு பிரகாஷ் அம்கேத்கர் தெரிவித்தார்.
-
------------------------------
தி இந்து

அசாசுதீன் ஓவைசி
---

இதற்கிடையே ஏஐஎம்ஐஎம் கட்சியின் தலைவர்
அசாசுதீன் ஓவைசி பேசுகையில், ”ஆர்எஸ்எஸ் மற்ற
கட்சிகளை தவறாக அர்த்தம் புரிந்துகொண்டிருக்கிறது.

தங்களைப் புலிகள், சிங்கம் போலவும் மற்ற கட்சிகளையும்
மற்ற மதத்தினரை நாய்கள் போலவும் சித்தரிக்கிறார்கள்.
இதுதான் ஆர்எஸ்எஸ் அமைப்பின் மொழிவழக்கம்.
இதை மக்கள் நிச்சயம் நிராகரிப்பார்கள் “எனத்
தெரிவித்தார்.

தேசியவாத காங்கிரஸ் கட்சியின் செய்தித்தொடர்பாளர்
நவாப் மாலிக் கூறுகையில், "இதுதான் ஆர்எஸ்எஸ், பாஜக
அமைப்பின் சித்தாந்தம். அவர்களுக்குச் சாதி அரசியல்
எப்படிச் செய்வது என்பது மட்டுமே தெரியும்.

சாதிவாரியாக இந்துக்களைப் பிரிப்பதை அவர்கள் நிறுத்தும்
நாளில் உண்மையில் ஒவ்வொரு இந்துவும், மற்ற மதத்தில்
உள்ள ஒவ்வொருவரும் சிங்கமாக மாறுவார்கள்" எனத்
தெரிவித்தார்.
-
காங்கிரஸ் கட்சியின் மூத்த தலைவர் சச்சின் சாவந்த்
கூறுகையில், "இந்துக்களுக்கு எதிரான மனநிலைதான்
ஆர்எஸ்எஸ் கொண்டிருக்கும். சாதி மற்றும் மதங்களை
நோக்கி வெறுப்பை விதைப்பதுதான் தெரியும்.

மதங்களை இவ்வாறு பிரித்துப் பேசும் ஆர்எஸ்எஸ்
தலைவருக்கு இது வெட்கக்கேடு" எனத் தெரிவித்தார்.
-
------------------------------
தி இந்து