“ரபேல் விமான விவகாரம்: ஒப்பந்தத்துக்கு 12 நாட்களுக்கு முன்புதான் நிறுவனமே தொடக்கம்”-காங்கிரஸ் குற்றச்சாட்டு

காங்கிரஸ் செய்தித்தொடர்பாளர் ரன்தீப் சுர்ஜேவாலா : கோப்புப்படம்
----------------

பலஆயிரம் கோடி மதிப்புள்ள ரபேல் போர் விமான ஒப்பந்தத்தை
தனியார் நிறுவனத்துக்கு அளித்து, நாட்டை மோடி அரசு ஏமாற்றி
விட்டது என்று காங்கிரஸ் கட்சி குற்றம்சாட்டியுள்ளது.

டெல்லியில் காங்கிரஸ் கட்சியின் செய்தித்தொடர்பாளர்
ரன்தீப் சுர்ஜேவாலா நிருபர்களுக்கு இன்று பேட்டி அளித்தார்.
அப்போது அவர் கூறியதாவது:

ரபேல் போர் விமானக் கொள்முதல் ஒப்பந்தத்தில் ஏராளமான
விதிமுறை மீறல்கள் நடந்துள்ளன. இந்த ஒப்பந்தத்தைத் தனியார்
நிறுவனத்துக்கு அளித்து தனியார் நிறுவனத் தலைவர்களும்,
அதிகாரிகளும் இணைந்து செய்யும் ஊழலுக்கு அரசு வழி
வகுத்துள்ளது.

ரபேல் போர்விமான கொள்முதல் ஒப்பந்தம் தொடர்பாக
பிரதமர் மோடி மழைக்காலக் கூட்டத்தொடரில் எதிர்க்
கட்சிகளுக்குப் பதில் அளிக்க வேண்டும்.

அரசு அதிகாரிகளின் ஆதரவுடன், தனியார் முதலாளிகள்
வாழ்வதற்காகச் செய்யும் சலுகைகளான மோடி அரசின் மரபணு
கலாச்சாரமாகும். எப்போதும் இல்லாத வகையில் ரபேல் போர்
விமான ஊழலில் ரூ.60 ஆயிரத்து 145 கோடி ஊழல் நடந்துள்ளது.

அனைத்துவிதமான போர் கருவிகள் கொள்முதல் ஒப்பந்தத்தில்,
நாட்டை ஏமாற்றுவது என்பதுதான் மோடி அரசின் மந்திரமாகும்.
சதி, ஏமாற்றுதல், அரசுக்கு இழப்பை ஏற்படுத்துதல் ஆகியவை
36 ரபேல் போர் விமானக் கொள்முதலில் நடந்துள்ளது.

போர்விமானக் கொள்முதல் விவகாரத்தில் எந்தவிதமான
அனுபவமும் இல்லாத ரிலையன்ஸ் டிபென்ஸ் நிறுவனத்துக்கு
ஒப்பந்தம் தரப்பட்டுள்ளது.

இந்த 36 ரபேல் போர் விமானங்களை வாங்குவதற்காக பிரான்ஸ்
அரசுடன் ஒப்பந்தம் கடந்த 2015-ம் ஆண்டு ஏப்ரல்-10ம் தேதி
போடப்பட்டது. அந்த ஒப்பந்தம் செய்யப்படுவதற்கு 12 நாட்களுக்கு
முன் “ரிலையன்ஸ் டிபென்ஸ்” நிறுவனம் தொடங்கப்பட்டுள்ளது.

ஆனால், போர் விமானங்களைத் தயாரிக்க அந்த நிறுவனத்துக்கு
அங்கீகாரம் வழங்கப்படவில்லை.

பாதுகாப்புத் துறை மூலமாகவே போர் விமானங்களைத்
தயாரிக்கும் உரிமம், “ரிலையன்ஸ் ஏரோஸ்டிரக்ஸர்”
நிறுவனத்துக்குக் கொடுக்கப்பட்டுள்ளது. ஆனால், அந்த
நிறுவனத்துக்குச் சொந்தமாக எந்தவிதமான நிலமோ அல்லது
கட்டிடமோ கடந்த 2016-ம் ஆண்டு பிப்ரவரி 22-ம் தேதி
அங்கீகாரம் வழங்கப்பட்ட நாளில் இல்லை.

36 ரபேல் போர்விமானங்கள் வாங்குவதற்காகக் கடந்த 2015-ம்
ஆண்டு ஏப்ரல் 24-ம் தேதி போடப்பட்ட ஒப்பந்தத்துக்கு 14 நாட்களுக்கு
முன்பாகத்தான் ரிலையன்ஸ் ஏரோஸ்டரக்சர் நிறுவனம்
தொடங்கப்பட்டுள்ளது.
-
ஒட்டுமொத்தமாகப் பாதுகாப்பு துறை ஒப்பந்தங்களின்
விதிமுறைகள் அனைத்தும் மீறப்பட்டுள்ளது என்பது காங்கிரஸ்
கட்சியின் கருத்தாகும். இந்த ஒப்பந்தத்தில் விதிமுறை மீறப்பட்ட
நிலையிலும்கூட, பாதுகாப்பு அமைச்சகம் ஒப்புதல் அளித்துள்ளது.

அதற்கான ஒப்பந்தத்தையும் பாதுகாப்பு துறை அமைச்சகம்
தணிக்கை செய்துள்ளது.

பின் ஏன் இந்த விவகாரத்தில் பாதுகாப்பு துறை அமைச்சரும்,
பிரதமர் மோடியும் தொடர்ந்து பொய் பேசுகிறார்கள்.
இந்த ஒப்ந்தம் தொடர்பாக மக்கள் எழுப்பும் கேள்விகளுக்கு
பிரதமர் மோடி அரசு பதில் அளிக்க வேண்டும்.

இவ்வாறு ரன்தீப் சுர்ஜேவாலா தெரிவித்தார்
-----------------------------------------

தி இந்து