ஏடிஎம்மில் நூதனமுறையில் திருட்டு: பிகாரைச் சேர்ந்த இரு இளைஞர்கள் கைது

சென்னை, எழிலகம் வளாகத்தில் உள்ள ஏடிஎம்-மில் நூதன
முறையில் திருடிய பிகார் மாநிலத்தைச் சேர்ந்த இருவரை
போலீஸார் ஞாயிற்றுக்கிழமை கைது செய்தனர்.

சென்னை மெரீனா கடற்கரையை ஒட்டியுள்ள எழிலகம்
வளாகத்தில் ஏராளமான அரசு அலுவலகங்கள் செயல்
படுகின்றன. இங்குள்ள பாரத ஸ்டேட் வங்கியின்
ஏடிஎம் மைய இயந்திரத்தில் இருந்து வாடிக்கையாளர்களின்
பணம் தொடர்ச்சியாக திருட்டு போவது தெரியவந்தது.

இதுகுறித்து அண்ணா சதுக்கம் காவல் நிலையப்
போலீஸாரிடம் 5 பேர் புகார் தெரிவித்தனர்.

இதையடுத்து, திருவல்லிக்கேணி துணை ஆணையர்
செல்வ நாகரத்தினம் மேற்பார்வையில் உதவி ஆணையர்
ஆரோக்கிய பிரகாசம், அண்ணா சதுக்கம் குற்றப்பிரிவு
ஆய்வாளர் தீபா ஆகியோர் தலைமையில் தனிப்படை
அமைக்கப்பட்டு தேடுதல் வேட்டை மேற்கொள்ளப்பட்டது.

இந்நிலையில், பாரத ஸ்டேட் வங்கி ஏடிஎம் மையத்தில்
சந்தேகத்துக்கிடமான வகையில் நின்ற இருவரை
கண்காணித்த தனிப்படை போலீஸார் அவர்களை அண்ணா
சதுக்கம் காவல் நிலையத்துக்கு அழைத்து சென்று விசாரணை
நடத்தினர்.

இருவரும் ஏடிஎம் மையத்தில் நூதன முறையில் பணத்தை
திருடியது தெரியவந்தது. அதையடுத்து பிகார் மாநிலம்,
கயா மாவட்டம், துமை கிராமத்தைச் சேர்ந்த மனோகர்குமார் (26),
முன்னாகுமார் (26) ஆகிய இவர்கள் இருவரையும் கைது செய்தனர்.

இதுகுறித்து போலீஸார் கூறியது:

நூதன திருட்டுக்கு இருவரும் இரு இயந்திரங்கள் இருக்கும்
மையங்களை தேர்வு செய்து வந்துள்ளனர். ஒரு இயந்திரத்தில்
பொத்தான் அருகில் ஒரு மெல்லிய உலோக தகடு பொருத்தி
விடுவர்.

பின்னர் வெளியே சென்று காத்திருப்பர். அப்போது
வாடிக்கையாளர் எவரேனும் உள்ளே வந்தால் அவர் பின்னால்
இவர்களும் வருவர். வாடிக்கையாளர் தனது ஏடிஎம் அட்டையை
இயந்திரத்தின் உள்ளே ஸ்வைப் செய்ய வைக்கும்போது, எந்திரம்
செயல்படாது.

ஏடிஎம் செயல்பாட்டை முடிக்காத நிலையில், அந்த அட்டையை
வெளியே எடுத்து விடுவார். அப்போது இவர்களில் ஒருவர்,
அடுத்த இயந்திரத்தில் பணம் எடுக்கலாம் என வாடிக்கையாளரை
திசைத் திருப்புவார். அந்த இயந்திரத்தில் வாடிக்கையாளர்
அட்டையை செலுத்தி குறியீட்டு எண்ணை பதிவு செய்யும்போது
அதை கவனித்துக் கொள்வர்.

அதைத் தொடர்ந்து முதல் இயந்திரத்தின் பொத்தானில்
பொருத்திருந்த உலோகத் தகட்டை அகற்றிவிட்டு, அந்த
வாடிக்கையாளரின் ரகசிய எண்ணை போட்டு, பணத்தை
எடுத்துச் சென்றுவிடுவர்.

இதுபோன்று ரூ.1.50 லட்சம் வரை இருவரும் திருடியுள்ளனர்.
அவர்கள் பயன்படுத்தி வந்துள்ள போலி ஏடிஎம் அட்டைகளும்
பறிமுதல் செய்யப்பட்டுள்ளன என்றனர் போலீஸார்.
-
--------------------------------------
தினமணி

திருட்டுக்கு தூக்கு தண்டனை கொடுக்க வேண்டும்