1,800 ஆண்டுகள் பழமையான யானைமலை சிற்பங்களை சீண்டும் ‘குடிமகன்கள்’ கேட்டை தாண்டி உள்ளே செல்கின்றனர் புராதன சின்னங்கள் அழியும் அபாயம் பாதுகாக்க ஊழியர்கள் நியமிக்கப்படுவரா?

மதுரை, ஜூன் 16: புராதன சிறப்பு மிகுந்த சின்னமான மதுரை யானைமலையின் சிற்பங்களை குடிகாரர்கள் சீண்டுகிறார்கள். மலைக்கு போகும் பாதைக்கு தொல்லியல் துறையினர் பூட்டு போட்டும் பாதுகாக்க முடியாமல் திணறுகிறார்கள். மதுரை ஒத்தக்கடையிலுள்ள யானைமலை புராதன சின்னங்களில் சிறப்பு மிகுந்தது. யானை படுத்து இருப்பது போன்ற அழகிய தோற்றமுடையது. மூன்றரை கிலோ மீட்டர் நீளம், ஒன்றரை கி.மீ. அகலம் கொண்டது. ரெட் கிரானைட் மலையாக அமைந்துள்ளது இதன் தனிச்சிறப்பாகும். மலையின் மறுபுறத்தின் அடிவாரத்தில் நரசிங்க பெருமாள் கோயிலும், வற்றாத குளமும் உள்ளன. 1,800 ஆண்டுகளுக்கு முன் சமண முனிவர்கள் இந்த மலையை வாழ்விடமாக கொண்டு தங்கினர். இதன் அடையாளமாக மலையில் சமண முனிவர்கள் சிலை, சிற்பங்கள், சமணர்படுகைகள், மூலிகையினால் உருவாக்கிய அழியாத ஓவியங்கள் உள்ளன.
இதனை சிற்பநகரமாக்கும் திட்டம் சில ஆண்டுகளுக்கு முன் உருவாக்கப்பட்டு, கடும் எதிர்ப்பினால் கைவிடப்பட்டது. தற்போது தொல்லியல் துறை கட்டுப்பாட்டில் உள்ளது. ஆனால் அந்த துறையின் கண்காணிப்பின்றி, அற்புதமான மலையிலுள்ள சிலை சிற்பங்களை குடிகாரர்கள் சீண்டுவதாக புகார் எழுந்துள்ளது. 1800 ஆண்டுகளாக அழியாத ஓவியங்களை சுரண்டி பார்ப்பது, மது குடித்துவிட்டு காலி பாட்டில்களை அங்கேயே உடைத்து எறிவது போன்ற சமூக விரோத செயல்களில் ஈடுபட்டு வருகின்றனர். பூட்டு போட்டு பாதுகாக்க முடியாமல் தொல்லியல் துறை திணறுகிறது. இதன் காரணமாக மலைக்கு போகும் பாதைக்கு தொல்லியல் துறையினர் சிறிய கேட் போட்டு பூட்டு போட்டு பூட்டி உள்ளனர். அதையும் தாண்டி வேலி தாண்டும் வெள்ளாடுகள் போல் குடிகாரர்கள் புகுந்துவிடுகிறார்கள். இதனால் பாதுகாப்பற்ற நிலை உள்ளது. பொதுமக்கள் அந்த சிலை சிற்பம், ஓவியங்களின் அற்புதங்களையோ, சமணர்களின் அடையாள சின்னங்களையோ காண முடிவது இல்லை.
தொல்லியல் துறை அதிகாரி ஒருவர் கூறும்போது, “சரித்திரம் பேசும் சமணர் வாழ்ந்த யானைமலை புராதன சின்னம் பாதுகாப்பு வளையத்தில் உள்ளது. பூட்டு போட்டாலும் அதை மீறி சமூக விரோதிகள் புகுந்துவிடுகிறார்கள். தொல்லியல் துறையில் ஊழியர்கள் பற்றாக்குறை இருப்பதால் பாதுகாப்புக்கு கூடுதல் ஊழியர் நியமிக்க முடியவில்லை. அரசுக்கு எழுதி இருக்கிறோம்” என்றார்.
நன்றி
தினகரன்