துரைமுருகன் என்றும் 16'-ஆக இருப்பதன் ரகசியம் என்ன?: பேரவை சுவாரஸ்யங்கள்

எதிர்க்கட்சித் துணைத் தலைவர் துரைமுருகன் என்றும் 16-ஆக
இருப்பதன் ரகசியம் என்ன என்று அவை முன்னவரும், துணை
முதல்வருமான ஓ.பன்னீர்செல்வம் கேள்வி எழுப்பினார்.

அப்போது பேரவையில் சிரிப்பலை எழுந்தது.

சட்டப் பேரவையில் வியாழக்கிழமை கேள்வி நேரத்தின் போது
திமுக-அதிமுக உறுப்பினர்களிடையே பல சுவாரஸ்ய
சம்பவங்கள் அரங்கேறின.

எவ்வளவு ஐஸ் வைத்தாலும்...

பழவேற்காட்டில் ஐஸ்கட்டி தொழிற்சாலை அமைக்க வலியுறுத்த
விரும்பிய உறுப்பினர் பலராமன் (அதிமுக), அதற்கு முன்பாக
அரசையும், அமைச்சரையும் புகழ்ந்து பேசினார்.

இதற்குப் பதிலளித்த அமைச்சர் டி.ஜெயக்குமார், உறுப்பினர்
எவ்வளவு ஐஸ் வைத்தாலும் ஐஸ்கட்டி தொழிற்சாலை
அமைக்கப்படாது என்று கூறினார். அப்போது அவையில்
சிரிப்பொலி எழுந்தது.

வருவாய்த் துறை தொடர்பான கேள்வியை கே.வி.குப்பம் தொகுதி
எம்.எல்.ஏ. ஜி.லோகநாதன் (அதிமுக) புதிய வட்டம் உருவாக்குவது
குறித்து கேள்வி எழுப்பினார். அதற்குப் பதிலளித்த வருவாய்த்
துறை அமைச்சர் ஆர்.பி.உதயகுமார், அம்மாவின் ஆட்சியில்
இதுவரை 72 புதிய வட்டங்கள் உருவாக்கப்பட்டுள்ளதாகத்
தெரிவித்தார்.

அப்போது குறுக்கிட்ட எதிர்க்கட்சித் துணைத் தலைவர்
துரைமுருகன், அம்மாவின் ஆட்சியில் 72 வட்டங்கள்
உருவாக்கப்பட்டதாக அமைச்சர் தெரிவித்தார். அதனுடன்
73-ஆவது வட்டத்தையும் உருவாக்கி உறுப்பினரின்
கோரிக்கையை நிறைவேற்ற வேண்டுமென அதிமுக
உறுப்பினருக்காக பரிந்துரை செய்தார்.

இதைத் தொடர்ந்து பேசிய அவை முன்னவர் ஓ.பன்னீர்செல்வம்,
அம்மாவின் ஆட்சி நடைபெறுவதாகத் தெரிவித்த எதிர்க்கட்சித்
துணைத் தலைவரின் பெருந்தன்மைக்கு நன்றி.

அவர் இன்று புதுப்பொலிவுடன் (வழக்கமாக அணியும் வெள்ளை
நிற சட்டைக்குப் பதிலாக ரோஸ் நிறத்தில் சட்டை
அணிந்திருந்தார்) கலர்புஃல்லாகக் காட்சி தருகிறார். என்றும்
16-ஆக அவர் இருப்பதன் ரகசியம் என்ன என்பதை அறிய
விரும்புகிறேன் என்று கேள்வி எழுப்பினார்.

அப்போது பேரவையில் பலத்த சிரிப்பொலி எழுந்தது.
-
-------------------------------
தினமணி