வாழப்பாடி அருகே 1,200 ஆண்டுகளுக்கு முற்பட்ட செக்கு கல்வெட்டு கண்டெடுப்பு

சேலம் மாவட்டம், வாழப்பாடி வட்டம், புழுதிகுட்டை அருகே வெள்ளிக்கவுண்டனூர் கிராமத்தில், கி.பி. 8-ஆம் நூற்றாண்டைச் சேர்ந்த செக்கு கல்வெட்டு ஒன்றை சேலம் வரலாற்று ஆய்வு மையத்தினர் கண்டெடுத்துள்ளனர்.
சேலம் வரலாற்று ஆய்வு மைய இணைச் செயலர் பெரியார்மன்னன் புழுதிக்குட்டை ஊராட்சி வெள்ளிக்கவுண்டனூர் கரியராமர் கோயில் வளாகத்தில் பழமையான செக்குப்பாறை கல்வெட்டு ஒன்றை கண்டெடுத்தார். அந்த கல்வெட்டை சேலம் வரலாற்று ஆய்வு மைய ஆய்வாளர்கள், விழுப்புரம் வீரராகவன், ஆறகழூர் பொன்.வெங்கடேசன், மருத்துவர் பொன்னம்பலம், ஆசிரியர் பெருமாள், ஜீவநாராயணன், ஆசிரியர் வீராசாமி ஆகியோர் அடங்கிய குழுவினர் ஆய்வு மேற்கொண்டனர்.
அந்த கல்செக்கானது தரையிலிருந்து 40 செ.மீ. உயரமும், வெளிவிட்டம் 57 செ.மீ, உள்விட்டம் 45 செ.மீ. அளவுடையதாக உள்ளது. செக்கின் நடுவிலுள்ள குழியின் ஆழம் 30 செ.மீ, விட்டம் 20 செ.மீ. ஆகும். உள்விட்டப் பகுதியில் இரண்டு வரிகளில் 12 வார்த்தைகளில் கல்வெட்டானது அமைந்துள்ளது.
எழுத்தின் வடிவத்தை கொண்டு இது 8-ஆம் நூற்றாண்டைச் சேர்ந்ததாகக் கருதலாம். ஸ்ரீ விளக்கமாறனேன் என கல்வெட்டு தொடங்குகிறது. விளக்கமாறன் என்பவர் உயிரிழந்த தன் மகன் மூக்கன் நினைவாகச் செய்து கொடுத்த கல்செக்கு இதுவாகும். இங்கு வந்து வணங்கி பூஜை செய்பவர்களுக்கு பிழியப்பட்ட பிண்ணாக்கு மூன்றை தரும்படி கல்வெட்டில் கூறப்பட்டுள்ளது. கல்வெட்டு வாசகம் "ஸ்ரீ விளக்கமாறனேன் என் மகன் மூக்கனைச்சாத்தி இட்ட செக்கு. பூசித்தனார்க்கு பிழி பிண்ணாக்கு மூன்று'.
பழங்காலத்தில் எண்ணெய் வித்துகளை ஆட்ட ஊருக்கு பொதுவாக கல்செக்கு செய்து தரும் வழக்கம் இருந்துள்ளது. மக்கள் நிலக்கடலை, எள் போன்ற எண்ணெய் வித்துகளை இந்த உரலில் ஆட்டி எண்ணெயை எடுத்துக்கொண்டு, கூலியாக பிண்ணாக்கை தருவது வழக்கமாக இருந்துள்ளது. இப்போது கண்டெடுக்கப்பட்டுள்ள இந்த கல்செக்கு கல்வெட்டு மூலம் இங்கு வந்து வழிபடுவோருக்கு பிரசாதமாக பிழியப்பட்ட பிண்ணாக்கு மூன்றைத் தர சொல்லியிருப்பது புதிய செய்தியாகும்.
இப் பகுதியில் மேலும் ஆய்வு செய்தால், இன்னும் பல வரலாற்றுத் தடயங்கள் கிடைக்கலாம் என ஆய்வாளர்கள் தெரிவித்தனர்.
நன்றி
தினமணி