அரசு நிறுவனத்தில் ரூ.530 கோடி மோசடி

புதுடில்லி:
அரசு பொது துறை நிறுவனமான, பி.இ.சி., லிமிடெட்டில், 530 கோடி
ரூபாய் முறைகேடு செய்த வழக்கில், அதன் முன்னாள் தலைவர்
மற்றும் இயக்குனர் மீது, சி.பி.ஐ., வழக்கு பதிவு செய்துள்ளது.

ரயில்வே மற்றும் தொழில் துறை உபகரணங்களை ஏற்றுமதி
செய்வதற்காக, மத்திய அரசு சார்பில், பி.இ.சி., லிமிடெட் என்ற
நிறுவனம், 1971ல் துவங்கப்பட்டது.பின், 1997 முதல், விவசாய
பொருட்கள் மற்றும் தொழில் துறை சம்பந்தப்பட்ட
உபகரணங்களை, இந்த நிறுவனம், ஏற்றுமதி மற்றும் இறக்குமதி
செய்யத் துவங்கியது.

இந்த நிறுவனம், மத்திய வர்த்தக மற்றும் தொழிற்துறை
அமைச்சகத்தின் கட்டுப்பாட்டின் கீழ் இயங்குகிறது.

இந்நிலையில், இந்தியாவில் இருந்து வெளிநாட்டு நிறுவனத்திற்கு,
இரும்புத் தாது ஏற்றுமதி செய்வதற்காக, மும்பையைச் சேர்ந்த,
'பீசிஸ் எக்சிம்' என்ற தனியார் நிறுவனத்துடன், பி.இ.சி.,
ஒப்பந்தம் போட்டது.

இந்த ஒப்பந்தப்படி, பீசிஸ் எக்சிம் நிறுவனத்துக்கு, 348 கோடி
ரூபாய் வழங்கப்பட்டது. ஆனால், ஒப்பந்தப்படி, இரும்பு தாதுக்களை,
அந்த தனியார் நிறுவனம் ஏற்றுமதி செய்யவில்லை.

அந்த தொகையையும் திருப்பித் தரவில்லை. எனவே, 2016, செப்டம்பர்
வரையிலான வட்டி தொகையுடன் சேர்ந்து, 530 கோடி ரூபாய் மோசடி
நடந்தது தெரியவந்தது.

இதையடுத்து, பி.இ.சி., நிறுவனத்தின் முன்னாள் தலைவர் மற்றும்
நிர்வாக இயக்குனர், ஏ.கே.மிர்சந்தானி, முன்னாள் இயக்குனரும்,
தற்போதைய தலைமை பொது மேலாளருமான, ராஜிவ் சதுர்வேதி,
ஏ.கே.கன்டோத்ரா.அந்நிறுவனத்தின், நிதித்துறை பொது மேலாளர்
ஆர்.சி.கிலானி, கூடுதல் பொது மேலாளர், எஸ்.கே.கோச்சார்
ஆகியோர் மீது, சி.பி.ஐ., வழக்குப் பதிவு செய்தது.

மேலும், மும்பையைச் சேர்ந்த பீசிஸ் எக்சிம் நிறுவன உரிமையாளர்
சவுமித் ரஞ்சன் ஜனா மற்றும் அதன் இயக்குனர்கள் மீதும்
, சி.பி.ஐ., வழக்குப் பதிவு செய்து விசாரணையை துவங்கி உள்ளது.
-
---------------------------------
தினமலர்