இந்தியா சாதனை ஸ்கோர் : 414 ரன்கள் குவிப்பு

ராஜ்கோட் : இந்திய அணி ஒரு நாள் போட்டியில் அதிக பட்ச ரன் குவித்து சாதனை படைத்துள்ளது. ராஜ்கோட்டில் இந்தியா - இலங்கை அணிகள் மோதும் முதல் ஒரு நாள் போட்டி நடைபெறுகிறது. முதலில் பேட்டிங் செய்த இந்திய அணி 7 விக்கெட் இழப்புக்கு 414 ரன்கள் குவித்து சாதனை படைத்துள்ளது. ஒரு நாள் போட்டியில் இந்தியா எடுத்துள்ள அதிகபட்ச ரன் இது என்பது குறிப்பிடத்தக்கது. இதற்கு முன்னராக 2007ம் ஆண்டு பெர்முடா அணியுடன் விளையாடிய போது இந்தியா 413 ரன்கள் எடுத்திருந்தது. சர்வதேச அளவில் ஒரு நாள் போட்டியில் இலங்கை அணி நெதர்லாந்து அணிக்கு எதிராக விளையாடி 5 விக்கெட் இழப்புக்கு 413 ரன்கள் எடுத்து, அதிக ரன் எடுத்த அணி என்ற பெருமையை தக்க வைத்துள்ளது.


சாதனை : இந்தியா வந்துள்ள இலங்கை அணி 3 டெஸ்ட் போட்டிகள், 2 டுவென்டி- 20 போட்டிகள் மற்றும் 5 ஒரு நாள் போட்டிகள் கொண்ட தொடரில் விளையாடி வருகிறது. இன்று டாஸ் வென்ற இலங்கை அணி முதலில் பீல்டிங்கை தேர்வு செய்தது. அதிரடியாக விளையாடிய சேவாக் - சச்சின் ஜோடி இலங்கை பவுலர்கள் பந்துகளை விலாசி ரன்களை குவித்தனர். சச்சின் 69 ரன்களில் ஆட்டம் இழந்தார். அடுத்து களமிறங்கிய தோனியுடன் ஜோடி சேர்ந்து சேவாக் 146 ரன்கள் குவித்தார். 68 பந்துகளில் 146 ரன்கள் அடித்தார் சேவாக். இதற்கு முன்னர் 1998ல் அசாருதீன் 62 பந்துகளில் 108 ரன்கள் எடுத்திருந்தார். 2008ம் ஆண்டு ராய்னா 68 பந்துகளில் 101 ரன் எடுத்தார் என்பது குறிப்பிடத்தக்கது. சேவாக் ஒரு நாள் போட்டிகளில் 12 வது சதத்தை அடித்தார்.


தோனி 5000 ரன்கள் இலக்கை அடைந்தார் : கேப்டன் தோனி ஒரு நாள் போட்டிகளில் 5000 ரன்கள் இலக்கை அடைந்தார்.


சச்சின் அரைசதம்: முதலில் பேட் செய்த இந்திய அணிக்கு மாஸ்டர் பேட்ஸ்மேன் சச்சின், சேவக் ஜோடி சூப்பர் துவக்கம் கொடுத்தது. இலங்கை பந்துவீச்சை எளிதாக சமாளித்த இந்த ஜோடி முதல் விக்கெட்டுக்கு 153 ரன்கள் சேர்த்த போது, சச்சின் (69, ஒரு சிக்சர், 10 பவுண்டரி) அவுட்டானார். இது ஒருநாள் அரங்கில் இவரது 92வது அரைசதம்.


சூப்பர் ஜோடி : பின்னர் இணைந்த சேவக், கேப்டன் தோனி இலங்கை பந்துவீச்சை நாலாபுறமும் சிதறடித்தனர். சிக்சர் மழை பொழிந்த சேவக், 66 பந்தில் சதமடித்து அசத்தினார். இது ஒருநாள் அரங்கில் இவரது 12வது சதம். மறுமுனையில் அபார ஆட்டத்தை வெளிப்படுத்திய கேப்டன் தோனி ஒருநாள் அரங்கில் 34வது அரைசதம் கடந்தார். இந்த ஜோடி 2வது விக்கெட்டுக்கு 156 ரன்கள் சேர்த்த போது சேவக் (146, 6 சிக்சர், 17 பவுண்டரி ) அவுட்டானார். தொடர்ந்து சிறப்பாக ஆடிய தோனி (72, 3 சிக்சர், 7 பவுண்டரி) நம்பிக்கை அளித்தார்.


ஜடேஜா ஆறுதல்: "மிடில்-ஆர்டரில்' வந்த சுரேஷ் ரெய்னா (16), கவுதம் காம்பிர் (11), ஹர்பஜன் சிங் (11) உள்ளிட்டோர் நீண்ட நேரம் நிலைக்கவில்லை. பின்னர் இணைந்த விராத் கோஹ்லி (27), ரவிந்திர ஜடேஜா (30*) ஆறுதல் அளித்தனர். இந்திய அணி 50 ஓவரில் 7 விக்கெட் இழப்புக்கு 414 ரன்கள் குவித்தது. இலங்கை சார்பில் குலசேகரா, வெலகேதரா, பெர்னாண்டோ தலா 2 விக்கெட் வீழ்த்தினர்.


5வது அதிகபட்சம் : இலங்கை அணிக்கு எதிராக இந்திய அணி 414 ரன்கள் குவித்ததன் மூலம், ஒருநாள் அரங்கில் 5வது அதிகபட்ச ஸ்கோரை பதிவு செய்தது. முன்னதாக இலங்கை (443 ரன்), தென் ஆப்ரிக்கா (438 ரன்), ஆஸ்திரேலியா (434 ரன்), தென் ஆப்ரிக்கா (418 ரன்) உள்ளிட்ட அணிகள் அதிகபட்ச ஸ்கோரை பெற்றுள்ளன.


சேவக் "146' : இலங்கை அணிக்கு எதிராக அதிவேகமாக சதம் கடந்த சேவக் (146 ரன்), ஒருநாள் அரங்கில் தனது அதிகபட்ச ஸ்கோரை பதிவு செய்தார். முன்னதாக கடந்த 2003ம் ஆண்டு நியூசிலாந்துக்கு எதிரான போட்டியில் சேவக் அதிகபட்சமாக 130 ரன்கள் எடுத்தார்.