ஸ்கிம்மர் கருவி, கேமரா பொருத்தி ஏடிஎம்மில் ரூ.10 லட்சம் கொள்ளை : நெல்லை ஆசாமிகள் 2 பேர் சிக்கினர்

தாம்பரம்: சென்னை மற்றும் புறநகர் பகுதிகளில் உள்ள ஏடிஎம் மையங்களில் ஸ்கிம்மர் மற்றும் சிறிய வகை கேமராவை பொருத்தி, வாடிக்கையாளர்களின் 10 லட்சத்தை நூதன முறையில் கொள்ளையடித்த நெல்லை ஆசாமிகள் இருவரை போலீசார் சுற்றிவளைத்து கைது செய்தனர். சென்னை புறநகர் பகுதிகளான தாம்பரம், சேலையூர், கவுரிவாக்கம் மற்றும் சுற்றுப் பகுதிகளில் உள்ள ஏடிஎம் மையங்களில், கடந்த சில நாட்களில், சுமார் 20க்கும் மேற்பட்ட வாடிக்கையாளர்களின் ரகசிய குறியீட்டு (பின் நம்பர்) எண்ணை பயன்படுத்தி ₹10 லட்சம் வரை மர்ம ஆசாமிகள் கொள்ளையடித்தனர். இதுகுறித்து பாதிக்கப்பட்ட வாடிக்கையாளர்கள் கொடுத்த புகார்களின் பேரில், போலீசார் வழக்கு பதிந்து விசாரித்து வந்தனர்.
இந்நிலையில், தாம்பரம், காந்தி சாலையில் உள்ள ஒரு தனியார் வங்கி ஏடிஎம் மையத்தில் கடந்த 11ம் தேதி, வங்கி ஊழியர்கள் பணம் நிரப்ப வந்தபோது, அங்கு கார்டு சொருகும் பகுதி மற்றும் பின் நம்பர் அழுத்தும் பகுதி வித்தியாசமாக இருப்பதை கண்டுபிடித்தனர். இதுகுறித்து உடனடியாக வங்கி உயர் அதிகாரிகளுக்கு தகவல் தெரிவித்தனர். அதன்பேரில் தமிழ்நாடு, கேரளா ஏடிஎம் மைய பராமரிப்பு மேலாளர் ராஜேஷ்குமார், சென்னை ஏடிஎம் மைய அலுவலர் தங்க விநாயகம் ஆகியோர் சம்பவ இடத்துக்கு விரைந்து வந்தனர். அவர்கள் ஏடிஎம் மெஷினை சோதனை செய்ததில், மெஷினில் கார்டு சொருகும் இடத்தில் ஸ்கிம்மர் கருவியும், பின் நம்பரை அழுத்தும் பகுதியில் ஒரு சிறிய கேமரா பொருத்தப்பட்டு இருப்பதும் தெரியவந்தது.
இதை பார்த்து அதிர்ச்சியடைந்த அதிகாரிகள், அங்குள்ள சிசிடிவி கேமரா பதிவுகளை ஆய்வு செய்தனர். அதில், கடந்த 11ம் தேதி மதியம் 12.30 மணியளவில் மர்ம நபர்கள் 2 பேர், ஏடிஎம் மெஷினில் ஸ்கிம்மர் கருவி மற்றும் கேமராவை பொருத்துவது தெரியவந்தது. இதையடுத்து, மர்ம ஆசாமிகளை பிடிக்க அதிகாரிகள் தொடர் கண்காணிப்பில் ஈடுபட்டனர். இந்நிலையில், நேற்று முன்தினம் மாலை 2 பேர் மேற்கண்ட ஏடிஎம் மையத்துக்கு வந்து, நீண்ட நேரமாக மெஷினை குடைந்து கொண்டிருந்தனர். சந்தேகத்தின் பேரில், அங்கு சென்ற அதிகாரிகள், அந்த 2 பேரிடம் விசாரித்தபோது, முன்னுக்குப்பின் முரணாக பதிலளித்தனர்.
இதையடுத்து, அவர்களை ஏடிஎம் மையத்துக்குள் வைத்து பூட்டி, தாம்பரம் போலீசாருக்கு தகவல் தெரிவித்தனர். போலீசார் விரைந்து வந்து, இருவரையும் காவல் நிலையம் கொண்டு வந்து விசாரித்தனர். அப்போது, சிசிடிவி கேமராவில் பதிவான உருவத்துடன் அவர்களது உருவம் ஒத்துப்போனது. விசாரணையில், திருநெல்வேலி மாவட்டம், எம்கேபி நகரை சேர்ந்த சுல்தான் (51), ரஹ்மத் நகரை சேர்ந்த சுலைமான் (49) எனவும், ஏடிஎம்மில் ஸ்கிம்மர் கருவியை ெபாருத்தி வாடிக்கையாளர்களின் பணத்தை கொள்ளையடித்ததும் தெரிந்தது. இதையடுத்து, அவர்களை கைது செய்த போலீசார், நீதிமன்றத்தில் ஆஜர்படுத்தி சிறையில் அடைத்தனர்.
இதுகுறித்து போலீசார் கூறியதாவது: சுல்தான், சுலைமான் ஆகிய இருவரும் கீழ்ப்பாக்கத்தில் உள்ள ஒரு லாட்ஜில் தங்கியுள்ளனர். இவர்களிடம் பிரபல கொள்ளை கும்பல் ஒன்று, ஸ்கிம்மர் கருவியை கொடுத்து, அதை ஏடிஎம் மையங்களில் பொருத்தி, வாடிக்யைாளர்களின் ரகசிய குறியீட்டு எண்களை சேகரித்து தருமாறு உத்தரவிட்டுள்ளது. அதன்படி, இருவரும் சென்னை மற்றும் புறநகர் பகுதிகளில் உள்ள தனியார் வங்கி ஏடிஎம்களை நோட்டமிட்டு, மெஷினில் ஸ்கிம்மர் கருவி மற்றும் கேமராவை பொருத்தி வாடிக்கையாளர்களின் ரகசிய குறியீட்டு எண்ணை சேகரித்து கொள்ளை கும்பலிடம் கொடுத்துள்ளனர். இவர்களுக்கான கமிஷன் தொகை மற்ற விவரங்களை கொள்ளை கும்பல் போனில் மட்டும் பேசியுள்ளது. இவர்களை எப்போது, எங்கு சந்திப்பது என்பதை மிகவும் ரகசியமாக வைத்துள்ளது. இதில், மூளையாக செயல்பட்ட கொள்ளை கும்பலை பிடிக்க தனிப்படை அமைக்கப்பட்டுள்ளது. போலி ஏடிஎம் கார்டு தயாரிக்கும் கும்பலிடம் இவர்களுக்கு தொடர்பு உள்ளதால், இந்த வழக்கு விசாரணை குற்றப்பிரிவு போலீசாரிடம் மாற்றப்பட உள்ளது. இவ்வாறு போலீசார் தெரிவித்தனர்.
நன்றி
தினகரன்