தமிழக அரசின் முன்னோடி திட்டத்தை பின்பற்ற காஷ்மீர் மாநிலம் முடிவு- சென்னைக்கு வந்து அதிகாரிகள் ஆலோசனை

நாட்டிலேயே முதல்முறையாக தமிழகப் பள்ளிகளில் அமல்படுத்தப்பட்டுள்ள முப்பருவ பாடத்திட்ட முறையை காஷ்மீரில் செயல்படுத்த அந்த மாநில அரசு முடிவு செய்துள்ளது.
தமிழகத்தில் பள்ளிக் குழந்தைகளின் புத்தக சுமையைக் குறைக்கும் வகையில் 1 முதல் 9-ம் வகுப்பு வரை முப்பருவ பாடத்திட்ட முறை அமலில் இருக்கிறது. இதன்படி, ஓராண்டுக்கான பாடங்கள் ஜூன் முதல் செப்டம்பர், அக்டோபர் முதல் டிசம்பர், ஜனவரி முதல் ஏப்ரல் என 3 பருவங்களாக பிரிக்கப்பட்டுள்ளன. ஒவ்வொரு பருவத்துக்கும் 1 முதல் 5-ம் வகுப்பு வரை ஒரே யொரு புத்தகமாகவும், 6 முதல் 8-ம் வகுப்பு வரையிலான மாணவர்களுக்கு 2 புத்தகங்களாகவும், 9-ம் வகுப்பு மாணவர்களுக்கு 3 புத்தகங்களாகவும் வழங்கப்படும். அந்தந்த பருவத்துக்கான பாடங்கள் மட்டுமே புத்தகத்தில் இருக்கும்.
முப்பருவ பாடத்திட்டம் 2012-13 கல்வியாண்டில் 1 முதல் 8-ம் வகுப்பு வரையிலும், 2013-14 கல்வியாண்டில் 9-ம் வகுப்புக் கும் அறிமுகப்படுத்தப்பட்டது. ஓராண்டுக்கான பாடங்களை 3 பருவங்களாக பிரித்துப் படிப்பதால், மாணவர்களுக்கு பாடச் சுமை மட்டுமின்றி, பாடப் புத்தகங்களின் சுமையும் குறைகிறது. நாட்டிலேயே தமிழகத்தில் மட்டும்தான் பள்ளிப் படிப்பில் முப்பருவ பாடத்திட்டம் அமலில் இருக்கிறது. இந்த நிலையில், தமிழகப் பள்ளிகளில் பின்பற்றப்படும் முப்பருவ முறையை செயல்படுத்த காஷ்மீர் மாநிலமும் முடிவு செய்துள்ளது.
இதுபற்றி மேலும் அறி்ந்துகொள்ளும் வகையில் காஷ்மீர் மாநில பள்ளிக்கல்வித் துறை இணைச் செயலர் ஆரீப் முகமது ஆஹூம், உதவி இயக்குநர் முகமது ஈஷாக் ஷோபி ஆகி யோர் கடந்த வாரம் சென்னை வந்து பள்ளிக்கல்வி இயக்குநர் ஆர்.இளங்கோவன், தமிழ்நாடு பாடநூல் மற்றும் கல்வியியல் பணிகள் கழக நிர்வாக இயக்கு நர் டி.ஜெகநாதன், மாநில கல்வியியல் ஆராய்ச்சி, பயிற்சி நிறு வன இயக்குநர் ஜி.அறிவொளி ஆகியோரைச் சந்தித்து விவரங்கள் கேட்டறிந்தனர்.
முப்பருவ முறை பாடத்திட்டத்தில் உள்ள முக்கிய அம்சங்கள், ஒவ்வொரு பருவத்துக்கான பாடத்திட்டங்கள் ஆகியவை குறித்து காஷ்மீர் பள்ளிக்கல்வித் துறை அதிகாரிகள் கேட்டறிந்ததாக அறிவொளி தெரிவித்தார். இதனை வரும் கல்வியாண்டிலேயே நடைமுறைப்படுத்த காஷ் மீர் மாநில அரசு முடிவு செய்துள் ளது.
நன்றி
தி இந்து