காவிரி தீர்ப்பில் கூறப்பட்டுள்ள ‘ஸ்கீம்’ என்பதன் பொருள் என்ன? சுப்ரீம் கோர்ட்டில் விளக்கம் கேட்டு மனு

புதுடெல்லி,

காவிரி நீர் பங்கீடு தொடர்பாக நடுவர் மன்றம் வழங்கிய தீர்ப்பை எதிர்த்து தாக்கல் செய்யப்பட்ட மேல்முறையீட்டு வழக்கை விசாரித்த சுப்ரீம் கோர்ட்டு, கடந்த மாதம் 16-ந் தேதி தீர்ப்பு வழங்கியது.

கர்நாடகம் தமிழகத்துக்கு வழங்க வேண்டிய நீரின் அளவை குறைத்த சுப்ரீம் கோர்ட்டு, ஏற்கனவே நடுவர் மன்றம் வழங்கியுள்ள இறுதித்தீர்ப்பை நிறைவேற்ற ‘ஸ்கீம்’ (செயல்திட்டம்) ஒன்றை 6 வார காலத்துக்குள் மத்திய அரசு ஏற்படுத்த வேண்டும் என்று தனது தீர்ப்பில் கூறி உள்ளது.

நடுவர் மன்றம் தனது இறுதித்தீர்ப்பில் நீர் பங்கீட்டை மேற்கொள்ள காவிரி மேலாண்மை வாரியம், காவிரி ஒழுங்குமுறை குழு ஆகியவற்றை அமைக்க வேண்டும் என்று கூறி இருந்தது. எனவே சுப்ரீம் கோர்ட்டு, இந்த இரண்டு அமைப்புகளையும் ஏற்படுத்த வேண்டும் என்பதைத்தான் ‘ஸ்கீம்’ என்று கூறியது என்பது பெரும்பாலானோரின் கருத்து.

இதன் அடிப்படையிலேயே, காவிரி மேலாண்மை வாரியத்தை அமைக்க வேண்டும் என்று தமிழக அரசும், அரசியல் கட்சிகளும் மத்திய அரசை வற்புறுத்தி வருகின்றன. காவிரி மேலாண்மை வாரியம் அமைக்கும் கோரிக்கையை வலியுறுத்தி விவசாயிகள் போராட்டம் நடத்தி வருகிறார்கள்.

ஆனால் கர்நாடக அரசு, “சுப்ரீம் கோர்ட்டு ‘ஸ்கீம்’ ஒன்றை ஏற்படுத்த வேண்டும் என்றுதான் கூறியதே தவிர, காவிரி மேலாண்மை வாரியம் அமைக்குமாறு கூறவில்லை” என்கிறது.

மத்திய அரசும் இதுபற்றி கருத்து எதுவும் தெரிவிக்காமல் அமைதி காத்து வருகிறது. கர்நாடக மாநிலத்தில் மே மாதம் நடைபெற இருக்கும் சட்டசபை தேர்தலை கருத்தில் கொண்டே, காவிரி மேலாண்மை வாரியம் அமைக்கும் பிரச்சினையில் மத்திய அரசு அமைதி காத்து வருவதாக கூறப்படுகிறது.

இந்த நிலையில், சுப்ரீம் கோர்ட்டு விதித்துள்ள 6 வார ‘கெடு’ இன்றுடன் (வியாழக்கிழமை) முடிகிறது. ‘கெடு’ முடியும் நாள் வரை காத்திருக்கப்போவதாக தமிழக அரசு கூறி உள்ளது.

சுப்ரீம் கோர்ட்டு கூறியுள்ளபடி செயல்திட்டத்தை ஏற்படுத்த தவறினால், மத்திய அரசு கோர்ட்டு அவமதிப்பு நடவடிக்கைக்கு உள்ளாக நேரிடும். எனவே மத்திய அரசு ஏதாவது நடவடிக்கை எடுத்தாக வேண்டிய கட்டாய நிலையில் இருக்கிறது. இதனால் இந்த பிரச்சினை குறித்து சட்ட அமைச்சகத்திடம், மத்திய அரசு கருத்து கேட்டு இருந்தது. அதன்படி சட்ட அமைச்சகமும் சில கருத்துகளை தெரிவித்து உள்ளது.

எனவே, ‘ஸ்கீம்’ என்றால் என்ன? என்பது பற்றி மாறுபட்ட கருத்துகள் ஏற்பட்டு இருப்பதால், அது குறித்து விளக்கம் கேட்டு சுப்ரீம் கோர்ட்டில் மனு தாக்கல் செய்ய மத்திய அரசு திட்டமிட்டு உள்ளது. இதற்கு மத்திய அரசின் தலைமை வக்கீல் கே.கே.வேணுகோபால் அனுமதி அளித்து உள்ளார்.

இன்று மகாவீர் ஜெயந்தி விடுமுறை என்பதாலும், நாளை புனித வெள்ளி விடுமுறை என்பதாலும், மத்திய அரசின் விளக்கம் கோரும் மனு சனிக்கிழமை சுப்ரீம் கோர்ட்டில் தாக்கல் செய்யப்படும் என்று தெரிகிறது.

தினத்தந்தி

" ஸ்கீம் " என்றால் என்ன என்று விளக்கம் கேட்டு மத்திய அரசு மனு தாக்கல் செய்யும். அதன்மீது வாதப் , பிரதி வாதங்கள் ஒரு வருடம் நடக்கும் ; தீர்ப்பு சொல்ல மேலும் ஒரு ஆறு மாதம் ஆகும் ; அதற்குள் நாடாளுமன்றத் தேர்தல் வந்துவிடும் . ஆக ஒன்றரையாண்டுகளுக்கு நிம்மதியாக இருக்கலாம் என்பதுதான் மத்திய அரசின் திட்டம் .

M.Jagadeesan wrote:" ஸ்கீம் " என்றால் என்ன என்று விளக்கம் கேட்டு மத்திய அரசு மனு தாக்கல் செய்யும். அதன்மீது வாதப் , பிரதி வாதங்கள் ஒரு வருடம் நடக்கும் ; தீர்ப்பு சொல்ல மேலும் ஒரு ஆறு மாதம் ஆகும் ; அதற்குள் நாடாளுமன்றத் தேர்தல் வந்துவிடும் . ஆக ஒன்றரையாண்டுகளுக்கு நிம்மதியாக இருக்கலாம் என்பதுதான் மத்திய அரசின் திட்டம் .

மேற்கோள் செய்த பதிவு: 1264391
இது தான் திருட்டு தனம். மத்திய அரசு
தமிழர்களை எப்போதும் வஞ்சிக்க கூடியது
தான் காங்கிரஸ் மற்றும் பாஜக ஓரே குட்டையில் ஊறிய மட்டைகள்.