ரிமோட் கன்ட்ரோல் உதவியுடன் மூடைக்கு 5 கிலோ எடை குறைத்து விவசாயிகளை ஏமாற்றி வந்த வியாபாரி கைது

ஜபுவா,

மத்திய பிரதேசத்தின் ஜபுவா மாவட்டத்தில் சாரங்கி கிராமத்தில் வசித்து வருபவர் ரிஷப் பம்போரி. வேளாண் வர்த்தகர். விவசாயிகள் கொண்டு வரும் வேளாண் பொருட்களை இவர் எடை போட்டு விலைக்கு வாங்கி கொள்வார். இதற்காக மின் எடை போடும் இயந்திரம் ஒன்றை பயன்படுத்தி வந்துள்ளார்.

இந்த நிலையில் அருகிலுள்ள காசர்பர்டி என்ற கிராமத்தில் இருந்து பிரேம்சிங் தமர் (வயது 25) என்ற விவசாயி தன்னிடமுள்ள கோதுமைகளை விற்பதற்காக பம்போரியிடம் சென்றுள்ளார். ஆனால் கடைக்கு செல்லும்முன் கோதுமையின் சரியான எடையை தனது வீட்டில் வைத்து தமர் எடை போட்டு தெரிந்து வைத்துள்ளார்.

பம்போரி கோதுமை மூடைகளை எடை இயந்திரத்தில் வைத்து எடை போட்டதில் ஒவ்வொரு மூடைக்கும் 5 கிலோ கிராம் எடை குறைவாக இருந்தது. மீண்டும் எடை போட்டதில் அதே அளவையே காட்டியது. இதனால் தமருக்கு சந்தேகம் எழுந்தது.

ஒவ்வொரு முறையும் பம்போரி மூடையை எடை போடும்பொழுது தனது டிரவுசர் பைக்குள் கை விடுவது தமருக்கு பின்னர் தெரிய வந்தது. இதுபற்றி தமர் கேட்டுள்ளார். அதற்கு கீ செயின் தவிர பைக்குள் ஒன்றும் இல்லை என பம்போரி கூறியுள்ளார்.

எடை போடுவது மீண்டும் தொடங்கியபொழுது, தமர் மற்றும் அங்கிருந்த பிற விவசாயிகள் பம்போரியின் டிரவுசர் பைக்குள் சோதனையிட்டு உள்ளனர். அதில் ரிமோட் கன்ட்ரோல் ஒன்று இருப்பது தெரிய வந்தது.

இதற்கும் எடை போடும் இயந்திரத்திற்கும் தொடர்பு இருந்துள்ளது. ரிமோட் கன்ட்ரோல் பட்டனை அழுத்தியதும், ஒரு மூடையின் 5 கிலோ கிராம் எடையை அது குறைத்து காட்டியதும் தெரிய வந்துள்ளது.

விவசாயிகள் ஏமாற்றப்படுகிறோம் என்பது உணர்ந்து அங்கு போராட்டத்தில் ஈடுபட்டனர். வர்த்தகர் பம்போரிக்கு எதிராக வழக்கு பதிய கோரினர்.

இதனை அடுத்து அங்கிருந்து தப்ப முயன்ற பம்போரியை போலீசார் கைது செய்தனர். அவரது கூட்டாளிகள் 4 பேர் தப்பிவிட்டனர். அவர்களை பிடிக்கும் பணியில் போலீசார் ஈடுபட்டுள்ளனர். மின் எடை போடும் இயந்திரம் மற்றும் ரிமோட் கன்ட்ரோல் ஆகியவை பறிமுதல் செய்யப்பட்டு விசாரணை நடந்து வருகிறது.

குற்றவாளிகள் அனைவரின் மீதும் ஐ.பி.சி.யின் பிரிவு 420 (ஏமாற்றுதல்) மற்றும் எஸ்.சி./எஸ்.டி. (கொடுமைகள் தடுப்பு) சட்டத்தின் கீழ் வழக்கு ஒன்று பதிவு செய்யப்பட்டு உள்ளது.

தினத்தந்தி

வியாபாரியை கைது செஞ்சாச்சு......

விவசாயியை சாகடிக்கிற அரசியல்வாதிகளை ஒன்னும் பன்ன முடியாதுல

டிஜிட்டல் இந்திய