நஜிப்பைப் பிரதமராக நியமிக்க வேண்டாம் என்று மன்னருக்கு வேண்டுகோள்

நாட்டின் அடுத்த பிரதமராக நஜிப்பை நியமனம் செய்ய வேண்டாம் என்று மூத்த அரசியல்வாதியான ஜைட் இப்ராகிம், பேரரசரைக் கேட்டுக்கொண்டிருக்கிறார்.

“இது சிரமமான நேரம். இந்நேரத்தில் நாட்டை ஒன்றுபடுத்தும் தலைவர் மலேசியாவுக்குத் தேவை. நாம் பிளவுபட்டு நின்றால் பலவீனமடைவோம்.

இதை நான் சொல்ல விரும்பாவிட்டாலும் சொல்லித்தான் ஆக வேண்டும். நஜிப் நம்மைப் பிளவுபடுத்தி விடுவார். அப்படிச் செய்வதன்வழி நம்மை அழிவை நோக்கி இட்டுச் செல்வார்”, என்றாரவர்.

கோலாலம்பூர் அரச ரோடரி கிளப்பின் வாராந்திர மதிய விருந்தில் பேசிய அந்த முன்னாள் சட்ட விவகார அமைச்சர், பிரதமராகும் தகுதியுள்ள வேறு நாடாளுமன்ற உறுப்பினர்கள் அம்னோவில் இருப்பதாகவும் அவர்களில் ஒருவரைப் பிரதமராக நியமிக்கலாம் என்றும் சொன்னார்.

“பேரரசர் அம்னோ தலைவரைத்தான் பிரதமராக நியமனம் செய்ய வேண்டுமென்று அரசமைப்புக் கூறவில்லை.” “உண்மையைச் சொல்ல வேண்டுமென்றால்” என்ற தலைப்பில் கடும்- தாக்குதலாக அமைந்த உரையொன்றை அவர் ஆற்றினார்.

அப்துல்லா பதவி விலகிச் செல்வதால் பல கேடுகள் விளையும் என்று ஜைட் கூறினார்.

“அப்துல்லா மிகப் பெரிய பிரதமர், அவரது தலைமைத்துவம் ஈடு செய்ய முடியாதது என்பதற்காக நான் இப்படிச் சொல்லவில்லை. அது உண்மையும் அல்ல. சொல்லப்போனால் அப்துல்லாவால் இன்னும் நிறைய செய்திருக்க முடியும்.

அவரது பதவி விலகலால், அழிவுப்பாதையில் விரைவாக இட்டுச் செல்லக்கூடிய தகாத சக்திகளின் கைகளுக்கு நாடு சென்று விடலாம்”, என்று அவர் சொன்னார்.

அப்துல்லா ஒரு பலவீனமான தலைவர் என்று பலரும் கூறியுள்ளனர். அப்படிக் குறைகூறுவோர் அவரின் இடத்துக்கு வரப்போகும் அம்னோ தலைவரால் ஏற்படப்போகும் விளைவுகளைச் சரியாக எண்ணிப்பார்க்கவில்லை என்றாரவர்.

“எதிர்வரும் அதிகார மாற்றத்தை சராசரி மலேசியர்கள் ஆர்வத்துடன் எதிர்பார்த்துக் காத்திருக்கிறார்கள்.ஆனா ல் பலர் அது நிகழாதிருப்பதையே விரும்புகிறார்கள்”, என்று ஜைட் கூறினார்.

அவ்வாறு விரும்புவதற்கு இரண்டு காரணங்களை அவர் குறிப்பிட்டார்.

“முதலாவதாக, அதிகார மாற்றம் தேவை என்பதற்கு அம்னோவில் கூறப்பட்ட காரணங்கள்.”

“இரண்டாவதாக, நஜிப்பின் தனிப்பட்ட விவகாரங்கள்.”

மார்ச் 8 தேர்தலுக்குப் பின்னர் அமைச்சராக நியமிக்கப்பட்ட ஜைட், உள்நாட்டுப் பாதுகாப்புச் சட்டத்தின்கீழ் (இசா) மூவரைக் காவலில் வைக்கும் அரசாங்கத்தின் முடிவுடன் ஒத்துப்போக முடியாதவராக கடந்த ஆண்டு பதவி விலகினார்.

பின்னர், அவர் மாற்றுக்கட்சியினரின் நிகழ்வுகளில் அடிக்கடி காணப்பட்டதால் அம்னோவிலிருந்தும் நீக்கப்பட்டார்.

மலேசியாஇன்று