அ.தி.மு.க அலுவலகத்தில் ஜெயலலிதாவின் சிலையை எடப்பாடி பழனிசாமி, ஓ.பன்னீர்செல்வம் திறந்து வைத்தனர்

-
சென்னை,

மறைந்த முதல்-அமைச்சர் ஜெயலலிதாவின் 70-வது பிறந்தநாள்
இன்று தமிழகம் முழுவது கொண்டாடப்பட்டு வருகிறது.
ஜெயலலிதா பிறந்தநாளையொட்டி அ.தி.மு.க. தலைமை அலுவலக
நுழைவாயிலில் வாழைமரம், தென்னை ஓலை, பழங்களை கொண்டு
அலங்கார வளைவு தோரணம் அமைக்கப்பட்டுள்ளது.

கட்சி அலுவலகத்தை சுற்றிலும் ஜெயலலிதாவின் புகழை போற்றி
விளம்பரப் பதாகைகள் வைக்கப்பட்டுள்ளன.

அ.தி.மு.க. கொடிகளும் வழி நெடுக கட்டப்பட்டுள்ளது.
இதனால் அ.தி.மு.க. தலைமை அலுவலகம் அமைந்துள்ள
அவ்வை சண்முகம் சாலையே விழாக்கோலம் பூண்டுள்ளது.

சென்னை ராயப்பேட்டையில் உள்ள அ.தி.மு.க.
தலைமை அலுவலகத்தில் அவருடைய சிலை திறப்பு விழா இன்று
நடைபெற்றது. ஜெயலலிதா இரட்டை விரலை உயர்த்தி இருப்பது
போன்று 7 அடி உயரத்தில் இந்த வெண்கல சிலை வடிவமைக்கப்பட்டு
உள்ளது.

எம்.ஜி.ஆர். சிலை அருகே அந்த சிலை பீடத்தில் நிறுவப்பட்டு உள்ளது.
ஜெயலலிதாவின் சிலையை முதல்-அமைச்சர் எடப்பாடி பழனிசாமியும்,
துணை முதல்-அமைச்சர் ஓ.பன்னீர்செல்வமும் இணைந்து திறந்து
வைத்தனர்

ஜெயலலிதா தொடங்கிய நமது எம்.ஜி.ஆர். நாளிதழ் டி.டி.வி.தினகரன்
அணியினர் கட்டுப்பாட்டில் இருப்பதால், அ.தி.மு.க.வுக்கு என்று
அதிகாரப்பூர்வ ‘நமது புரட்சித்தலைவி அம்மா’ என்ற பெயரில்
நாளிதழும் வெளியிடப்பட்டது.

அந்த நாளிதழை முதல்-அமைச்சர் எடப்பாடி பழனிசாமியும்,
துணை முதல்-அமைச்சர் ஓ.பன்னீர்செல்வமும் அறிமுகம் செய்து
வைத்தனர். தொடர்ந்து அமைச்சர்களும் மூத்த நிர்வாகிகளும்
ஜெயலலிதா சிலைக்கு மலர் தூவி மரியாதை செலுத்தினர்.

சிலையை வடிவமைத்தவருக்கு மோதிரம் பரிசளிக்கப்பட்டது.

விழாவில் மக்களவை துணை சபாநாயகர் தம்பிதுரை,
அவைத்தலைவர் மதுசூதனன், அமைச்சர்கள் ஜெயக்குமார்,
செங்கோட்டையன், எம்.ஆர்.விஜயபாஸ்கர் மற்றும் அமைச்சர்கள்
எம்.பி.க்கள், எம்.எல்.ஏ.க்கள் மற்றும் கட்சி நிர்வாகிகள் கலந்து
கொண்டனர்.
-
--------------------------------------
தினத்தந்தி