விமான நிலைய அறிவிப்பு பலகையில் தமிழ் ஒளிபரப்பு திடீர் நிறுத்தம் : பயணிகள் ஆர்ப்பாட்டம் நடத்த முயன்றதால் பரபரப்பு

-
சென்னை:
சென்னை விமான நிலையத்தில் அறிவிப்பு பலகையில்
தமிழ் ஒளிபரப்பு திடீரென நிறுத்தப்பட்டது. இதனால், ஆத்திரமடைந்த
பயணிகள் ஆர்ப்பாட்டம் நடத்த முயன்றதால் பரபரப்பு ஏற்பட்டது.

சென்னை விமான நிலையத்தில் விமானங்கள் புறப்படும் நேரம்,
வரும் நேரம், தாமதம், ரத்து போன்ற அனைத்து விவரங்களும்

ஒளிபரப்பப்படும். தமிழ், ஆங்கிலம், இந்தி என 3 மொழிகளில்
மாறி மாறி இடைவிடாமல் இயங்கிக் கொண்டிருக்கும்.
பயணம் செய்ய வரும் பயணிகள், வழியனுப்ப, வரவேற்க வருபவர்கள்
என பல ஆயிரக்கணக்கானோர், இதை பார்த்து தெரிந்து கொள்வார்கள்.

சமீப காலமாக கிராமப்புற மக்கள் பெருமளவு விமான பயணம்
மேற்கொள்வதால் தமிழில் ஒளிபரப்பு செய்வது மிகுந்த பயனுடையதாக
இருக்கிறது.

இந்நிலையில், நேற்று காலை 6 மணி முதல் தமிழ், இந்தி மொழிகள்
ஒளிபரப்பு திடீரென நிறுத்தப்பட்டன. தொடர்ச்சியாக ஆங்கில மொழியில்
மட்டுமே விமான அறிவிப்புகள் வெளியாகிக் கொண்டிருந்தது.
இதை பார்த்த பயணிகளும், அவர்களை வரவேற்க, வழியனுப்ப வந்தவர்களும்
கடும் அதிர்ச்சியடைந்தனர்.

அந்த நேரத்தில் விமான நிலைய நுழைவாயிலில் நின்று கொண்டிருந்த
விமான நிலைய ஊழியர்களிடம் பயணிகள் கேட்டபோது, ‘எங்களுக்கு
எதுவும் தெரியாது. நீங்கள் விமான நிலைய மேலாளரிடம் கேட்டு
தெரிந்து கொள்ளுங்கள்’ என்றனர்.  

இதையடுத்து விமான நிலைய மேலாளரிடம் சிலர் கேட்க சென்றபோது,
பாதுகாப்பு பணியில் இருந்த மத்திய தொழில் பாதுகாப்பு படையினர்,
உள்ளே அனுமதிக்க மறுத்து, ‘இன்டர்காமில் தொடர்பு கொள்ளுங்கள்’
என்றனர். இதையடுத்து இன்டர்காமில் பொதுமக்கள் தொடர்பு
கொண்டபோது, அதிகாரிகள் யாரும் போனை எடுக்கவில்லை.
இதனால் பயணிகள் ஆர்ப்பாட்டம் நடத்த முயன்றதால் பரபரப்பு
ஏற்பட்டது.

இதுகுறித்து விமான நிலைய இயக்குனர் சந்திரமவுலியை தொடர்பு
கொண்டபோது, காலை நேரங்களில் விமான போக்குவரத்து மிக
அதிகமாக உள்ளது. அந்த நேரத்தில் ஏராளமானோர் பயணம்
செய்கின்றனர். சர்வதேச முனையத்தில் வெளிநாட்டு பயணிகளின்
எண்ணிக்கை மிக அதிகமாக உள்ளது. அவர்கள், வருகை, புறப்பாடு
பற்றி தெரிந்து கொள்ள அறிவிப்பு பலகையை பார்க்கும்போது,
தமிழ், இந்தி, ஆங்கிலம் என்று மாறி மாறி வருகிறது.
ஆங்கிலம் வர தாமதம் ஏற்படுகிறது.

எனவே சர்வதேச விமான நிலையத்தில் ஆங்கில மொழி அறிவிப்பு
இல்லையா என வருகிற பயணிகளுக்கு மன உளைச்சல் ஏற்படுகிறது.
அதை தவிர்ப்பதற்காக காலை நேரத்தில் மட்டும் தமிழ், இந்தி
மொழிகளை நிறுத்தி விட்டு ஆங்கிலம் மட்டும் ஒளிபரப்பு செய்யலாம்
என்று யோசித்து ெகாண்டிருந்தோம்.

இறுதி முடிவு எடுக்கவில்லை. அதற்குள் இது நடந்து விட்டது.
எனது கவனத்துக்கு கொண்டு வந்ததற்கு நன்றி. இதுபற்றி விவாதித்து
3 மொழிகளிலும் அறிவிப்பு வெளியிட நடவடிக்கை எடுக்கிறேன்’
என்றார்.  

இதை தொடர்ந்து, காலை 10 மணிக்கு மேல் மீண்டும் வழக்கம்
போல 3 மொழிகளிலும் அறிவிப்பு ஒளிபரப்பானது.
-
-------------------------------------------
தினகரன்