பிஹாரில் 3,400 இளைஞர்கள் கடத்தப்பட்டு கட்டாய திருமணம்: வரதட்சணை பிரச்சினையே காரணம் என தகவல்

பிஹாரில் கடந்த ஆண்டில் 3,400 இளைஞர்கள் கடத்தப்பட்டு அவர்களுக்கு கட்டாய திருமணம் செய்து வைக்கப்பட்டுள்ளது தெரியவந்துள்ளது.

இதுகுறித்து காவல் துறை உயர் அதிகாரி ஒருவர் கூறும்போது, “பிஹார் மாநிலத்தில் இளைஞர்களை கடத்தி அவர்களுக்கு கட்டாய திருமணம் செய்து வைப்பது அதிகரித்து வருகிறது. கடந்த ஆண்டில் மட்டும் இதற்காக 3,405 பேர் கடத்தப்பட்டுள்ளனர். குறிப்பாக துப்பாக்கி முனையிலோ அல்லது குடும்பத்தினரை கொன்று விடுவோம் என மிரட்டியோ திருமணம் செய்து வைக்கின்றனர். சராசரியாக தினமும் 9 கட்டாய திருமணங்கள் நடைபெறுகின்றன” என்றார்.

அதிகரித்து வரும் இதுபோன்ற திருமணங்களைத் தடுக்க தேவையான முன்னெச்சரிக்கை நடவடிக்கை எடுக்குமாறு அனைத்து மாவட்ட காவல் கண்காணிப்பாளர்களுக்கும் உத்தரவிடப்பட்டுள்ளது.

இதுகுறித்து சமூக ஆர்வலர் மஹேந்தர் யாதவ் கூறும்போது, “மணமகளுக்கு அதிக அளவில் வரதட்சணை கேட்பது வழக்கமாக உள்ளது. இதிலிருந்து தப்பிப்பதற்காக பெண் வீட்டார் இதுபோன்ற செயலில் பல ஆண்டுகளாக ஈடுபட்டு வருகின்றனர். இளைஞர்களை கடத்துவதற்காக, அவர்கள் தங்கள் உறவினர்கள், நண்பர்களை பயன்படுத்துகின்றனர். சில நேரங்களில் கூலிப்படையினரையும் பயன்படுத்துகின்றனர்” என்றார்.

கடந்த மாதம் தலைநகர் பாட்னாவை அடுத்த கிராமத்தைச் சேர்ந்த ஒரு பொறியாளரை கடத்திச் சென்று துப்பாக்கி முனையில் திருமணம் செய்து வைத்துள்ளனர். ஆனால், மனைவியுடன் வாழ அவர் மறுத்துள்ளார். இதுபற்றிய செய்தி தேசிய அளவில் வெளியாகி பரபரப்பை ஏற்படுத்தியது குறிப்பிடத்தக்கது.

கடந்த 2016-ம் ஆண்டில் 3,070 பேரும், 2015-ல் 3,000 பேரும், 2014-ல் 2,526 பேரும் கடத்தப்பட்டு அவர்களுக்கு கட்டாய திருமணம் செய்து வைக்கப்பட்டதாக காவல் துறை புள்ளி விவரம் கூறுகிறது. - ஐஏஎன்எஸ்

தி இந்து

கத்தி முனையில் கல்யாணம்

என் நண்பர் ஒருவர் 35 வயது இன்னும் திருமணம் ஆகவில்லை அவரை அங்கு அனுப்பிவைத்தால் பெண் விட்டார் செலவில் கல்யாணம் முடிந்து விடும் தானே

தமிழ்நாட்டில் இந்நிலை வந்தால் சிறப்பாக இருக்கும் ...

எஸ் கே அண்ணா உங்கள் நண்பன் ஏதோ நல்ல காரியங்களை முந்தய ஜென்மங்களில் செய்துள்ளார் . அதனால் தான் அவர் நிம்மதியாக வாழ்கிறார். அவரை வாழ அனுமதியுங்கள் . அவரை அங்கு அனுப்பி வைத்தால் பெண் வீட்டார் செலவில் கல்யாணம் முடிந்துவிடும் , ஆனால் வாழ்நாள் பூராவும் அடிமை வாழ்க்கை வாழ வேண்டிவரும் .