விவேகானந்தரின் சீடர் நிவேதிதை 150-வது பிறந்த நாளையொட்டி ரதயாத்திரை

சென்னை,

விவேகானந்தரின் சீடர் சகோதரி நிவேதிதையின் 150-வது
பிறந்தநாளையொட்டி ரதயாத்திரை நிகழ்ச்சி நடக்கிறது.

இதற்காக தயாரிக்கப்பட்ட பாடல்கள் அடங்கிய குறுந்தகடு
வெளியீட்டு விழா சென்னை, மயிலாப்பூரில் உள்ள பாரதி வித்யா
பவனில் நேற்று நடந்தது. கே.என்.ராமசாமி தலைமை வகித்தார்.

பாடல்களுக்கு இசையமைத்த பரத்வாஜ் குறுந்தகட்டை வெளியிட,
கங்கை அமரன் பெற்றுக்கொண்டார். விழாவில் உளுந்தூர்பேட்டை
சாரதா ஆசிரம தலைவர் யதீஸ்வரி ராமகிருஷ்ண பிரியாம்பா
ஆசியுரை வழங்கினார்.
கர்நாடக இசைப்பாடகி நித்யஸ்ரீ மகாதேவன் உள்ளிட்ட பலர் பேசினர்.

தமிழகத்தில் ரதயாத்திரை

ரதயாத்திரைக்கான மாநில ஒருங்கிணைப்பாளர் வானதி சீனிவாசன்
நிருபர்களிடம் கூறியதாவது:-

அயர்லாந்து நாட்டைச் சேர்ந்த சகோதரி நிவேதிதை விவேகானந்தர்
கேட்டுக்கொண்டதற்கு இணங்க நம் நாட்டிலேயே தங்கி பெண்களுக்கு
கல்வி விழிப்புணர்ச்சி அளிப்பதற்காக தன் வாழ்கையை அர்ப்பணித்தவர்.

விவேகானந்தரின் சீடராக இருந்த சகோதரி நிவேதிதை, பாரதியாருக்கு
பெண் சமத்துவத்தை கற்றுத்தந்த குருவாகவும் திகழ்ந்தார்.

இவருடைய, 150-வது பிறந்த நாளையொட்டி தமிழகத்தில்
22 மாவட்டங்களுக்கு ரதயாத்திரை செல்கிறது. 3 ஆயிரம் கிலோ
மீட்டர் தூரத்தை 30 நாட்களில் சென்று 2 லட்சம் மாணவிகளை
சந்திக்க திட்டமிடப்பட்டு உள்ளது.

கோவையில் தொடக்கம்

ரதயாத்திரையை நாளை (திங்கட்கிழமை) கோயம்புத்தூர், இந்துஸ்தான்
கல்லூரி வளாகத்தில் இருந்து மத்திய மந்திரி பொன்.ராதாகிருஷ்ணன்
தொடங்கிவைக்கிறார். விழாவில் சாரதா ஆசிரம தலைவர் யதீஸ்வரி
ராமகிருஷ்ண பிரியாம்பா, நடிகர் விவேக் உள்ளிட்ட பலர் கலந்து
கொள்கின்றனர்.

ரதயாத்திரை பிப்ரவரி 22-ந்தேதி சென்னையில் நிறைவடைகிறது
. இதில் மத்திய மந்திரி நிர்மலா சீதாராமன், கவர்னர் பான்வாரிலால்
புரோகித் உள்ளிட்ட பலர் கலந்துகொள்கின்றனர்.

இவ்வாறு அவர் கூறினார்.

முன்னதாக ரதயாத்திரை ஒருங்கிணைப்பாளர் வரதராஜன்
வரவேற்றார். ராமகிருஷ்ண மடம் மக்கள் தொடர்பு அதிகாரி சீனிவாசன்
நன்றி கூறினார்.
-
----------------------
தினத்தந்தி

நிவேதிதா பற்றிய பதிவுகள் விவேகானந்தர் வாழ்க்கை வரலாறு புத்தகம் படிக்கும் போது
நிறைய இடங்களில் பார்த்திருக்கிறேன்.
அவர் அர்ப்பணிப்பு பாராட்டுதலுக்குரியது
நன்றி ஐயா