தமிழக விஜிலென்ஸ் ஆணையராக மோகன் பியாரே நியமனத்தை எதிர்த்து வழக்கு: தமிழக அரசு பதில் தர உயர் நீதிமன்றம் உத்தரவு

சென்னை :
தமிழக விஜிலென்ஸ் ஆணையராக மோகன் பியாரே நியமனத்தை
எதிர்த்து, திமுக சார்பில் தொடரப்பட்ட வழக்கில் தலைமைச் செயலாளர்
உள்ளிட்டோர் பதில் தருமாறு சென்னை உயர் நீதிமன்றம் உத்தரவிட்டுள்ளது.

சென்னை உயர் நீதிமன்றத்தில் திமுக அமைப்புச் செயலாளர்
ஆர்.எஸ்.பாரதி தாக்கல் செய்த பொதுநல வழக்கில் கூறியிருப்பதாவது:

தமிழக விஜிலென்ஸ் ஆணையராக நியமிக்கப்படும் அதிகாரி எந்த
அதிகாரியின் செல்வாக்கிற்கும், வற்புறுத்தலுக்கும் உடன்படக் கூடாது.
வெளிப்படையான விசாரணை நடத்தக்கூடியவராக இருக்க வேண்டும்.
ரூபாய் நோட்டு விஷயத்தில் ரூ.136 கோடி முறைகேடு செய்த வழக்கில்
சிக்கிய தொழிலதிபர் சேகர் ரெட்டி வீட்டில் வருமானவரித்துறை
அதிகாரிகள் சோதனை நடத்தியதையடுத்து, முன்னாள் தலைமைச்
செயலாளர் ராமமோகன ராவ் வீட்டில் வருமான வரித்துறை அதிகாரிகள்
சோதனை செய்தனர்.

அப்போது, விஜிலென்ஸ் ஆணையர் பதவி ராமமோகன ராவிடம் இருந்தது.
உயர் அதிகாரியாக அவர் பதவி வகிப்பதால் தமிழக போலீசாரை நம்பாமல்
வருமான வரித்துறை அதிகாரிகள் மத்திய ரிசர்வ் போலீசாரை
பாதுகாப்புக்காக அழைத்துச் சென்றனர்.

விஜிலென்ஸ் ஆணையர் தலைமைச் செயலாளராகவோ அல்லது மற்ற
துறை செயலாளராகவோ இல்லாமல் சிபிஐ இயக்குநர் போன்ற
தனிப்பட்ட அதிகாரம் கொண்ட அதிகாரியாக இருக்க வேண்டும்.
அப்போதுதான் சுதந்திரமாக செயல்பட முடியும். இந்த காரணங்களின்
அடிப்படையில்தான் இதற்கு முன் விஜிலென்ஸ் கமிஷனராக பதவி வகித்த
ஜெயக்கொடியை நீக்கக்கோரி வழக்கு தொடர்ந்தோம்.

இப்போது, நில நிர்வாக சீர்திருத்தத்துறை ஆணையராக பதவி வகித்து
வரும் மோகன் பியாரேவை விஜிலென்ஸ் ஆணையராக தமிழக அரசு
கடந்த 8ம் தேதி நியமித்துள்ளது. எனவே, அவரது நியமனத்தை ரத்து செய்து
உத்தரவிட வேண்டும்.இவ்வாறு மனுவில் கூறப்பட்டுள்ளது.

இந்த மனு தலைமை நீதிபதி இந்திரா பானர்ஜி, நீதிபதி அப்துல் குத்தூஸ்
ஆகியோர் அடங்கிய முதல் டிவிஷன் பெஞ்சில் விசாரணைக்கு வந்தது.
அப்போது, ஆர்.எஸ்.பாரதி சார்பில் மூத்த வக்கீல் பி.வில்சன் ஆஜராகி,
இந்த பதவியில் நியமிக்கப்படுபவர்களை எந்த நேரத்திலும் மாநில
அரசால் மாற்ற முடியும்.

லஞ்ச ஒழிப்புத் துறை என்பது முழுமையான ஒரு தனிப்பட்ட அமைப்பாகும்.
இந்த அமைப்பின் இயக்குநர் ஆளுநரால் நியமிக்கப்பட வேண்டும்.
அவரின் பதவிக்காலம் 5 ஆண்டுகள் என்று நிர்ணயிக்கப்பட வேண்டும்.
இந்த அமைப்பில் நியமிக்கப்படுபவர்கள் அரசியல்வாதிகளுக்கும், உயர்
அதிகாரிகளுக்கும் வளைந்துகொடுக்கக்கூடாது.

ஆனால், தற்போது தமிழகத்தில் உள்ள லஞ்ச ஒழிப்புத் துறை இயக்குநர் பதவி
ஆளும் கட்சிக்கு சாதகமாக செயல்படுவதாகவே உள்ளது என்று வாதிட்டார்.
அப்போது, அட்வகேட் ஜெனரல் விஜய் நாராயண் ஆஜராகி, இந்த வழக்கு
தொடர்பாக அரசிடம் கேட்டு பதில் தருவதாக நீதிபதிகளிடம் தெரிவித்தார்.

இதையடுத்து, வழக்கை வரும் 29ம் தேதிக்கு தள்ளிவைத்த நீதிபதிகள், வரும்
24ம் தேதி தமிழக அரசு பதில் மனு தாக்கல் செய்ய வேண்டும் என்று
உத்தரவிட்டனர்.
-
-------------------------------------
தினகரன்