காணக் கிடைக்காத பொக்கிஷம் புத்தகங்கள்

தலைமுறையைக் கடந்து படித்து, அனுபவித்து, மகிழக்கூடிய ஓர் உயரிய பொக்கிஷம் உண்டென்றால், அது புத்தகம்தான் என்று சென்னை பெருநகர காவல் நுண்ணறிவுப் பிரிவு துணை ஆணையர் ஆர்.திருநாவுக்கரசு கூறினார்.
தென்னிந்திய புத்தக விற்பனையாளர் மற்றும் பதிப்பாளர் சங்கம் சார்பில், 41-ஆவது சென்னை புத்தகக் காட்சியில் செவ்வாய்க்கிழமை மாலை நடைபெற்ற நிகழ்ச்சியில் 'ஆத்திசூடி' என்ற தலைப்பில் அவர் பேசியது:
படித்து, அனுபவித்து மகிழ, இங்கே காணும் பொங்கலில் காணக் கிடைக்காத பொக்கிஷங்களைக் காண வந்திருக்கும் ஞான மனிதர்களுக்கு வணக்கங்கள். நாம் காணும் மனிதர்கள், இடங்கள், புத்தகங்கள் ஆகியவையே நம் வாழ்க்கையை நிர்ணயிக்கின்றன. தலைமுறையைக் கடந்து படித்து, அனுபவித்து, மகிழக்கூடிய ஓர் உயரிய பொக்கிஷம் உண்டெனில் அது புத்தகங்கள்தான்.
இந்த உலகம் மிக வேகமாகச் சுற்றிக் கொண்டிருக்கிறது. நாம் வேகமாக பயணித்து கொண்டிருக்கிறோம். இந்த உலகத்தில் எல்லோருக்கும் ஒரே மாதிரி கிடைப்பது நேரம் மட்டுமே. ஆனால் படிக்க புத்தகம் எடுக்க வேண்டுமென நினைத்தால் அதற்கு எந்த நேரமும் கிடைப்பது இல்லை.
உங்களுக்கு ஒரு நாளில் 10 பக்கம் படிக்க நேரம் கிடைத்தால், மகாத்மாக்களின் வரலாற்றை படியுங்கள். உங்கள் வாழ்க்கை வரலாறாக மாறும். ஒரு பக்கம் மட்டுமே படிக்கும் வாய்ப்பு கிடைத்தால் தன்னம்பிக்கை கட்டுரைகளைப் படியுங்கள். உங்கள் வாழ்க்கை தன்னம்பிக்கை பெறும். 4 வரிகள்தான் படிக்க முடியும் என்றால் ஒரு திருமந்திரம், நாலாடியார் எனப் படியுங்கள். நாம் 4 பேருக்கு எடுத்துக்காட்டாக வாழ முடியும். இரண்டு வரிகள்தான் படிக்க முடியும் எனில் தினமும் ஒரு திருக்குறளை படியுங்கள். வாழ்க்கை திருவிளக்காய் மாறும். ஒருவரிதான் படிக்க நேரம் இருக்கிறது என்றால், அந்த ஒரு நிமிடத்தை ஆத்திசூடி படிக்க பயன்படுத்துங்கள். வாழ்க்கை கடவுள் சடைமேல் இருக்கும் அத்திப்பூ போல மணக்கும்.
படிப்பு ஒரு அனுபவம். படிப்பதும் ஒரு அனுபவம். அதை அனுபவிப்பவர்களுக்குத்தான் இது புரியும் என்றார் திருநாவுக்கரசு.


நன்றி
திணமணி