அனைத்து வீடுகளிலும் கழிவறையை வலியுறுத்தி ஆந்திர முதல்வர் சந்திரபாபு நாயுடு உண்ணாவிரதம் இருக்க முடிவு

அமராவதி: அனைத்து வீடுகளிலும் கழிவறை கட்ட வலியுறுத்தி ஆந்திர முதல்வர் சந்திரபாபு நாயுடு உண்ணாவிரத போராட்டத்தில் ஈடுபட முடிவு செய்துள்ளார். ஆந்திராவை திறந்த வெளி கழிப்பிடம் இல்லாத மாநிலமாக மாற்ற முதல்வர் சந்திரபாபு நாயுடு திட்டமிட்டுள்ளார். இதற்காக மாநிலத்தில் உள்ள அனைத்து வீடுகளிலும் கட்டாயம் கழிவறை கட்டப்பட வேண்டும் என வலியுறுத்தி வருகிறார். தற்போது ஆந்திராவில் மொத்தமுள்ள 4,09,204 வீடுகளில் 1 லட்சத்து 71 ஆயிரத்து 624 வீடுகளில் மட்டுமே கழிவறை வசதி உள்ளது. இந்த நிலையில் ஒடிசா எல்லையை யொட்டிய ஆந்திரபகுதிகளில் மக்களை சந்திக்கும் நிகழ்ச்சியில் பங்கேற்ற முதல்வர் சந்திரபாபு நாயுடு பேசியதாவது:

சுத்தமான மற்றும் ஆரோக்கியமான ஆந்திராவை உருவாக்குவதே எனது நோக்கம். இதற்காக ஒவ்வொரு வீடுகளிலும் கழிவறை அமைப்பதை வலியுறுத்தி தீவிர பிரசார இயக்கத்தை தொடங்கியுள்ளேன். வரும் மார்ச் 31ம் தேதிக்குள் அனைத்து வீடுகளிலும் கட்டாயம் கழிவறை இருக்கவேண்டும். அவ்வாறு நீங்கள் கழிவறை கட்டாவிட்டால் நான் அமைதியான முறையில் தர்ணாபோராட்டத்தில் ஈடுபடுவேன். ஒரு நாள் முழுவதும் உண்ணாவிரதம் இருப்பேன். அப்போது என்மீது இரக்கப்பட்டு உங்கள் வீடுகளில் கழிவறை கட்டுவீர்கள். அவ்வாறு கட்டாவிட்டால், சுயமரியாதை அற்றவர்களாக உங்களை கருதுவேன்.

இதற்காக உங்கள் கிராமங்களில் உள்ள வீடுகளுக்கு நான் வருவேன். நீங்கள் கழிவறை கட்டும் வரை அங்கேயே நாள் முழுவதும் தங்குவேன். நீங்கள் கழிவறை கட்டிய பின்னர்தான் நான் தலைநகர் அமராவதி திரும்புவேன். இந்த திட்டம் வெற்றி பெற எனது பங்களிப்பை கட்டாயம் தருவேன். ஆந்திராவில் மொத்தமுள்ள 13 மாவட்டங்களில், 6 மாவட்டங்கள் ஏற்கனவே முழுமையான கழிவறை பெற்ற மாவட்டமாகியுள்ளது.ராயலசீமாவில் 4 மாவட்டங்களும், வடக்கு ஆந்திர கடற்கரையில் உளள 3 மாவட்டங்களும் முழுஅளவுக்கு கழிவறை வசதியை பெறவில்லை. இவ்வாறு சந்திரபாபு நாயு பேசினார்.
நன்றி
தினகரன்