பொதுத்துறை வங்கிகளை மூடும் திட்டம் இல்லை மத்திய அரசு, ரிசர்வ் வங்கி விளக்கம்

புதுடெல்லி,

கடந்த சில நாட்களாக சமூக வலைத்தளங்களில் சில குறிப்பிட்ட வங்கிகளை மூடிவிட்டு அவற்றை வேறு ஒரு தேசியமயமாக்கப்பட்ட வங்கியுடன் இணைக்கப்போவதாக தகவல்கள் வெளியாகின. இதுபற்றி ரிசர்வ் வங்கியும், மத்திய அரசும் விளக்கம் அளித்துள்ளன. ரிசர்வ் வங்கி வெளியிட்டுள்ள அறிக்கையில் கூறியிருப்பதாவது:-

சில பொதுத்துறை வங்கிகளை ‘உடனடியாக சரிசெய்யும் நடவடிக்கைகள்’ (பி.சி.ஏ.) திட்டத்தின்கீழ் கொண்டுவருவதாகவும், இதனால் அவை மூடப்பட்டு வேறொரு வங்கியுடன் இணைக்கப்போவதாகவும் தகவல் பரவிவருகிறது. அறிவிக்கப்படாத இந்த தகவல்கள் சில ஊடகங்களிலும், சமூக ஊடகங்களிலும் பரவி வருவது எங்களுக்கு தெரியவந்தது.

ஆலோசனை வழங்கும்

பொதுமக்களுக்கான வங்கிகளின் வழக்கமான செயல்பாடுகளை தடை செய்வதற்காக பி.சி.ஏ. திட்ட கட்டமைப்பு உருவாக்கப்படவில்லை. ரிசர்வ் வங்கியின் மேற்பார்வையில், இது வங்கிகளின் ஆரோக்கியமான நிதி ஆதாரத்தை தொடர்ந்து வலிமையாக வைத்திருக்க பல்வேறு நடவடிக்கைகள், ஆலோசனைகள் வழங்குவதற்காக தான் பயன்படுத்தப்படுகிறது.

இது மேற்பார்வையிடும் ஒரு திட்டம் தான். வங்கிகளில் மூலதனம், சொத்துகளின் தரம் போன்ற சில குறிப்பிட்ட வரம்புக்குட்பட்ட செயல்பாடுகளை கண்காணித்து முன்கூட்டியே எச்சரிக்கை செய்வது தான் இதன் பணி. அவர்களது நிதி ஆதாரத்தை மீட்க ரிசர்வ் வங்கி பரிந்துரைத்துள்ளபடி சரியான நடவடிக்கைகளை எடுக்க வங்கிகளை உரிய நேரத்தில் ஊக்கப்படுத்துவது தான் இதன் நோக்கம்.

மூடும் திட்டம் இல்லை

வங்கிகளின் சில குறிப்பிட்ட ஆபத்தான நடவடிக்கைகளை தவிர்க்கச் செய்து, மூலதனத்தை பாதுகாப்பதில் கவனம் செலுத்த தூண்டுவதே இதன் நோக்கம். இதன்மூலம் வங்கிகளின் இருப்பு நிலைமை வலிமை பெறும். எனவே எந்த பொதுத்துறை வங்கிகளையும் மூடும் திட்டம் இல்லை.

இவ்வாறு ரிசர்வ் வங்கி கூறியுள்ளது.

மறுமூலதனம்

அதேபோல மத்திய அரசின் நிதித்துறை செயலாளர் ராஜீவ்குமார் ‘டுவிட்டர்’ வலைத்தளத்தில், “எந்த வங்கியையும் மூடும் கேள்விக்கே இடமில்லை. மாறாக மத்திய அரசு பொதுத்துறை வங்கிகளுக்கு ரூ.2.11 லட்சம் கோடி மறுமூலதனம் வழங்கி வலிமைப்படுத்த திட்டமிட்டுள்ளது. வதந்திகளை நம்பாதீர்கள். பொதுத்துறை வங்கிகளை மறுசீரமைக்கும், புதுப்பிக்கும் திட்டம் சரியான பாதையில் சென்று கொண்டு இருக்கிறது” என்று கூறியுள்ளார்.

தினத்தந்தி