25 ஆண்டுகளுக்கு பிறகு சுரண்டை அனுமன் நதியில் கரைபுரண்டு ஓடிய தண்ணீர்

சுரண்டை: சுரண்டை பகுதியில் பெய்த மழையால் அனுமன் நதியில் வெள்ளம் கரைபுரண்டு ஓடுகிறது. வெள்ளத்தை வேடிக்கை பார்த்தபோது தண்ணீரில் சிக்கிய 3 பேரை தீயணைப்புத் துறையினர் மீட்டனர். நெல்லை மாவட்டத்தில், ‘ஓகி’ புயல் காரணமாக கனமழை பெய்தது. இதனால் சுரண்டை பகுதியில் பெரும்பாலான நீர்நிலைகள் ஓரளவு நிரம்பின. இந்நிலையில் நேற்று அதிகாலை 2.30 மணியளவில் சுரண்டை மற்றும் சுற்றுவட்டார பகுதியில் மழை கொட்டித் தீர்த்தது. காலை 5.30 மணி வரை 3 மணி நேரம் மழை பெய்தது. இதன் காரணமாக சுரண்டை அனுமன் நதியில் வெள்ளம் கரைபுரண்டு ஓடியது. இதில் சில இடங்களில் வெள்ளம் அருகேயுள்ள வயல்களுக்குள் புகுந்தது.
ஏற்கனவே அனுமன் நதியில் பாலம் வேலை நடைபெற்று வருவதால், அதனருகே போக்குவரத்துக்காக அமைக்கப்பட்ட தற்காலிக பாலத்தை மூடிவாறு சுமார் 5 அடி உயரத்திற்கு தண்ணீர் செல்கிறது. இதனால் சுரண்டை பாவூர்சத்திரம் இடையே போக்குவரத்து துண்டிக்கப்பட்டது. 25 ஆண்டுகளுக்கு பின் அனுமன் நதியில் வெள்ளம் கரைபுரண்டு ஓடுவதை பார்த்த விவசாயிகள் மலர் தூவி வரவேற்றனர். ஆற்றில் வெள்ளம் வருவதை கேள்விப்பட்ட பொதுமக்களும், மாணவர்களும் கூட்டம் கூட்டமாக வந்து வேடிக்கை பார்த்தனர். சிலர் செல்பி எடுத்து கொண்டனர். கீழச்சுரண்டை தடுப்பணை அருகே வெள்ளத்தை வேடிக்கை பார்க்க சென்ற அதே ஊரைச் சேர்ந்த பால் மகன் மோகன்(22), மாரியப்பன் மகன் சுதாகர்(19), வீரபாண்டி மகன் கோட்டைச்சாமி(19) ஆகிய 3 பேரும் தண்ணீரில் விழுந்து தத்தளித்தனர்.
தகவலறிந்து அங்கு வந்த சுரண்டை தீயணைப்பு நிலைய அலுவலர் ராஜா மணி, போக்குவரத்து அலுவலர் சண்முகசுந்தரம் மற்றும் வீரர்கள் பொதுமக்கள் உதவியுடன் கயிறு கட்டி 3 பேரையும் பத்திரமாக மீட்டனர். இதேபோல் சாம்பவர்வடகரை அனுமன் நதியின் பாலத்தை மூடி சுமார் 3 அடி உயரத்திற்கு வெள்ளம் செல்வதால் சாம்பவர்வடகரை ஆய்க்குடி இடையே போக்குவரத்து துண்டிக்கப்பட்டது. குருங்காவனம் சிற்றாற்றிலும் வெள்ளம் கரைபுரண்டோடுகிறது.
இதுகுறித்து விவசாயி சுப்பையா கூறுகையில், ‘‘1992ல் இதேபோல் அனுமன் நதியில் வெள்ளம் கரைபுரண்டு ஓடியது. அதன் பின் ஆற்றில் வெள்ளம் ஏற்படவில்லை. இடையே ஆற்றில் அதிகளவு தண்ணீர் வந்தது. இதனால் இங்குள்ள குளங்கள் நிரம்பின. 25 ஆண்டுகளுக்கு பின்னர் தற்போது தான் அனுமன் நதியில் வெள்ளம் கரைபுரண்டு ஓடுகிறது’’ என்றார்.
நன்றி
தினகரன்