இன்னும் 3 மாதத்தில் பிச்சைக்காரர்கள் இல்லாத மாவட்டமாக மதுரை மாற்றப்படும்: கலெக்டர் வீரராகவராவ்

மதுரை:

மதுரை மாவட்டத்தில் மாற்றுத்திறனாளிகளுக்கான திட்டங்களை சிறப்பாக செல்படுத்தியதற்காக மாற்றுத் திறனாளிகளுக்கான சேவை விருது மாவட்ட கலெக்டர் வீரராகவராவுக்கு வழங்கப்பட்டது.

இதனை டெல்லியில் நடந்த விழாவில் ஜனாதிபதி ராம்நாத்கோவிந்த் கலெக்டருக்கு வழங்கினார்.

இதுகுறித்து கலெக்டர் வீரராகவராவ் இன்று நிருபர்களிடம் கூறியதாவது:-

மாற்றுத்திறனாளிகளுக்கான சிறப்பான திட்டங்களை தமிழக அரசு சார்பில் மதுரை மாவட்டத்தில் செயல்படுத்தியதால் ஜனாதிபதி விருது வழங்கப்பட்டது மகிழ்ச்சி அளிக்கிறது.



மதுரை மாவட்டத்தில் மாற்றுத்திறனாளிகளுக்கான பல்வேறு திட்டங்கள் நிறைவேற்றப்பட்டு வருகின்றன. மகளிர் சுய உதவிக்குழு மூலமாகவும் திட்டங்கள் உருவாக்கப்பட்டு வருகின்றன. மாற்றுத்திறனாளிகளுக்கு தன்னம்பிக்கை ஊட்டும் வகையில் அரசின் திட்டங்கள் தனியார் தொண்டு நிறுவனங்களுடன் இணைந்து செயல்படுத்தப்பட்டு வருகிறது.

கடந்த நிதியாண்டில் இதர துறைகள் மூலம் ரூ. 35 கோடி மதிப்பிலான திட்டங்கள் மாற்றுத்திறனாளிகளுக்கு வழங்கப்பட்டுள்ளன. இந்த ஆண்டு 14 கோடியே 37 லட்சம் ரூபாய் ஒதுக்கப்பட்டுள்ளது. ஜனபதிபதி விருது கிடைத்த தன் மூலம் மதுரை மாவட்டத்தில் மாற்று திறனாளிகளுக்கான திட்டம் மேலும் சிறப்பாக செயல்படுத்தப்படும்.

இன்னும் 3 மாதத்தில் மதுரை மாவட்டம் பிச்சைக்காரர்கள் இல்லாத மாவட்டமாக மாற்றப்படும். இதற்கான அனைத்து முயற்சிகளும் மேற்கொள்ளப்படும். இதில் முழுமையான வெற்றி கிடைக்கும் என்ற நம்பிக்கை உள்ளது.

ஜனாதிபதி விருது கிடைத்ததை மாற்றுத்திறனாளிகளுக்கு திட்டங்கள் செயல்படுத்துவதற்கு மேலும் ஊக்கமாக கருதுகிறேன். மதுரையில் மூத்த குடிமக்களுக்கு உதவித்தொகை தங்கு தடையின்றி கிடைக்க நடவடிக்கை எடுக்கப்படும். இதுவரை மதுரைக்கு 3 தேசிய விருதுகள் கிடைத்துள்ளன.

வாக்காளர்களுக்கு விழிப்புணர்வு ஏற்படுத்தியது, மீனாட்சி அம்மன் கோவிலுக்கு தூய்மைக்கான விருதை பெற்றது, தற்போது மாற்றுத்திறனாளிகளுக்கான சேவை விருது வழங்கப்பட்டுள்ளது.

மதுரை மாவட்டத்தில் டெங்கு காய்ச்சல் முழுமையாக கட்டுப்படுத்தப்பட்டுள்ளது. 3 ஆயிரத்து 924 சுகாதார பணியாளர்கள் மூலம் தொடர்ந்து டெங்கு விழிப்புணர்வு பணிகள் நடந்து வருகின்றன. மதுரை மாவட்டத்தில் சுத்தமான நீர்நிலைகளை உருவாக்குவது நமது கடமை.

இவ்வாறு அவர் கூறினார்.

நன்றி மாலைமலர்