வங்கக்கடலில் புதிய புயல் சின்னம்: சென்னை நோக்கி நகர்கிறது

சென்னை: வங்கக் கடலில் மேலும் ஒரு புயல் சின்னம் உருவாகி சென்னையை நோக்கி நகர்ந்து வருகிறது என்று என்று வானிலை ஆய்வு மையம் தெரிவித்துள்ளது. தென் கிழக்கு வங்கக் கடலில் இலங்கையை ஒட்டிய கடல் பகுதியில் உருவான காற்றழுத்தம் வலுவடைந்து ஓகி புயலாக மாறியது. இந்த புயலால் கன்னியாகுமரியில் ஆயிரக்கணக்கான மரங்கள் முறிந்து விழுந்தன. கரையோர பகுதிகளில் இருந்த வீடுகளில் தண்ணீர் புகுந்தது. கன்னியாக்குமரி, நாகர்கோவில் முழுவதும் தண்ணீரில் மிதக்கிறது. புயல், மழைக்கு 11 பேர் இதுவரை பலியாகியுள்ளனர். நூற்றுக்கும் மேற்பட்ட மீனவர்கள் கடலில் மாயமாகியுள்ளனர். அவர்களை கடற்படையின் மூலம் தேடும் பணி நடந்து வருகிறது. மக்களின் இயல்பு வாழ்க்கை முற்றிலும் முடங்கியுள்ளது. கடும் சேதத்தை ஏற்படுத்திய ஓகி புயல் லட்சத்தீவு சென்றடைந்தது. இதனால், அங்கு கடுமையான பாதிப்பு ஏற்பட்டுள்ளது.
இந்தநிலையில், அந்தமான் கடல் பகுதியில் வலுவான காற்றழுத்த தாழ்வு பகுதி உருவாகியுள்ளது. இது காற்றழுத்த தாழ்வு மண்டலமாக வலுப்பெற்று புயலாக மாறும் என்று எதிர்பார்க்கப்படுகிறது. சாகர் என்று பெயர் சூட்டப்பட்டுள்ள அந்த புயல் சின்னம் வட மேற்கு திசையில் நகர்ந்து சென்னையை நோக்கி நகரும் என்று எதிர்பார்க்கப்படுகிறது. இந்த புயலால் வட தமிழகத்தில் பாதிப்பு ஏற்படும் அபாயம் உள்ளது. எனவே, டிசம்பர் 4, 5ம் தேதிகளில் கடலூரில் உள்ள மக்கள் வீட்டை விட்டு வெளியே வர வேண்டாம் என்று அமைச்சர் எம்.சி.சம்பத் வேண்டுகோள் விடுத்துள்ளார். இதே போல, கடலோர மாவட்டங்களில் உள்ள மக்கள் பாதுகாப்பாக இருக்க வேண்டும் என்று அரசு சார்பில் வேண்டுகோள் விடுக்கப்பட்டுள்ளது. இந்த நிலையில், வருகிற 4,5,6 ஆகிய தேதிகளில் தமிழகம் மற்றும் புதுவையில் கனமழை பெய்யும் என்று இந்திய வானிலை ஆய்வு மையம் எச்சரிக்கை விடுத்துள்ளது.
இதுகுறித்து வானிலை ஆய்வு மைய அதிகாரிகள் கூறியதாவது: ஓகி புயல் லட்சத்தீவை சென்றடைந்துள்ளது. இந்த சூழலில், தெற்கு அந்தமான் கடல் பகுதியில் நிலவும் வலுவான காற்றழுத்த தாழ்வு பகுதி காற்றழுத்த தாழ்வு மண்டலமாக வலுபெறும். அது புயல் சின்னமாக வலுப்பெற்று வரும் 4ம் தேதிக்குள் வட மேற்கு திசையில் வட தமிழகம் மற்றும் தெற்கு ஆந்திர கடலோர பகுதியை நோக்கி நகரும் என்று எதிர்பார்க்கப்படுகிறது. எனவே, அடுத்த 24 மணி நேரத்தில் தமிழகம் மற்றும் புதுவையில் அநேக இடங்களில் மழையோ அல்லது இடியுடன் கூடிய மழையோ பெய்யக்கூடும். அடுத்த 24 மணி நேரத்தில் தமிழகத்தில் தேனி, திண்டுக்கல், கோவை, நீலகிரி மாவட்ட மலைப்பகுதிகளில் கனமழை முதல் மிக கனமழை வரை பெய்யக்கூடும். மற்ற ஏனைய மாவட்டங்கள் மற்றும் புதுவையில் ஒரிரு இடங்களில் கனமழை பெய்யக்கூடும்.
அடுத்த 24 மணி நேரத்தில் தென் தமிழக கடலோர மற்றும் குமரி பகுதிகளில் கடல் சீற்றத்துடன் காணப்படும். மீனவர்கள் குமரி மற்றும் அரபிக்கடல் பகுதிகளில் கடலுக்குள் செல்ல வேண்டாம். ராமநாதபுரம், தூத்துக்குடி, திருநெல்வேலி கடலோர பகுதிகளில் பொதுமக்கள் கவனமாக இருக்க வேண்டும்.
கடந்த 24 மணி நேரத்தில் குன்னூரில் 127.7 மில்லி மீட்டர், கடலூரில் 123.7 மில்லி மீட்டர், புதுச்சேரியில் 109 மில்லி மீட்டர், பரங்கிபேட்டையில் 94 மில்லி மீட்டர், நாகப்பட்டினத்தில் 92.6 மில்லி மீட்டர், உதகமண்டலத்தில் 63.2 மில்லி மீட்டர் மழை பாதிவாகியுள்ளது. இவ்வாறு அவர்கள் கூறினர்.
நன்றி
தினகரன்