வெந்தயம்

மேத்தி என வடநாட்டவரால் குறிப்பிடப்படும் வெந்தயம் மத்திய தரைக்கடல் நாடுகளில் பயிரிடப்படும் பூண்டுச் செடியாகும். இதன் உலர்ந்த பழமே வெந்தயமாகும். மஞ்சள் நிற விதைகள் கசப்புச் சுவை கொண்டவை எனினும் மருத்துவ குணமும், நல்ல மணமும் கசப்புச் சுவையும் கொண்டது.

இதன் இலைகளும், விதைகளும், உணவுப் பொருளாகவும் மருந்துப் பொருளாகவும் பயன்படுத்தப்படுகின்றன. வெந்தய விதைகளில் புரதம், மாவுச்சத்து, சர்க்கரை பிசின், வைட்டமின் உலோகச் சத்து, செரிமானப் பொருள்வகை முதலியன அடங்கியுள்ளன. இந்த விதையில் சத்துள்ள அமினோ அமிலங்களும் அடங்கியுள்ளன. செடியின் இலைகளிலும், தண்டுகளிலும், கால்சியம், இரும்புச்சத்து, வைட்டமின் ஏ, அஸ்கார்பிக் அமிலம் ஆகியன அடங்கியிருக்கின்றன.

நமது தேசமெங்கும் தோட்டப் பயிரில் பயிரிடப்படுகிறது. நறுமணம் பொருந்திய வெந்தயமும், அதன் இலைகளும், தண்டுகளும் உலகம் முழுவதிலும் சமையலிலும், மருத்துவத்திலும் பயன்படுத்தப்படுகிறது. இரவில் சிறிதளவு வெந்தயத்தை சுத்தமான நீரில் ஊறவைத்து, காலையில் எழுந்ததும் ஊறிய வெந்தயத்தோடு நீரையும் பருகுவதால் உஷ்ண உபாதையிலிருந்து விடுபடலாம். தற்போது கருத்தடை மருந்துகளிலும் வெந்தயம் பயன்படுகிறது.

ஆயிரம் ஆண்டுகளுக்கு முன்பு தலை வழுக்கையைத் தடுக்கும் மருந்தாகவும் பயன்பட்டு வந்தது. வெந்தயத்தை உணவில் சேர்க்க, உடல் செழுமையாக இருக்கும். உடல் வலியும் தீரும். கல்லீரல் நோய்களை நீக்கும்.

நமது அன்றாட உணவின் அங்கமாகவும், நறுமணப் பொருள் என்ற வகையில் உணவு வகைகளில் ஊட்டச்சக்தியையும், சுவையையும் அதிகரிக்கின்றது. நீரிழிவு நோய்க்கு நல்ல பலன் அளிக்கும் என நம்பப்படுகிறது.

குளிர்ச்சித் தன்மையளிப்பதால் பெரியம்மை நோய் கண்டவர்க்கு பானமாகவும், உடலுரமுண்டாக்குவதற்கும், ஆண்மை பெருக்குவதற்கும் பயன்படுகிறது.

கூந்தல் தைலத்திலும் வாசனைப் பொருள்களிலும், சாயம் தயாரிக்கவும் பயன்படுகிறது.

ரிக்கெட்ஸ், இரத்த சோகை, நீரிழிவு ஆகிய துன்பந்தரும் நோய்களை குணப்படுத்தும் குணமும், திறனும் இதற்குண்டு. இலைகள் உடலுக்கு குளிர்ச்சியூட்டும். மிதமான பேதி மருந்து, புறவீக்கம், தீக்காயங்கள் இவற்றைக் குணப்படுத்த உதவுகின்றன. வறுத்த வெந்தயப் பொடி மெலிந்த உடலைப் பெருக்கச் செய்யும்.

பச்சை பயறுடன் வெந்தயம் சேர்த்து வெந்நீரில் குழைத்து உடல், முகம், கை, கால்களால் தடவி வர தோல் பளபளப்பாகும்.

வெந்தயம் கீரையை பருப்புடன் கடையலாகச் செய்து சாப்பிட்டு வர பசியின்மை, இருமல், சிறநீரக எரிச்சல் குணம் ஆகும். இக்கீரையை நாமே தொட்டிகளில் பயரிடலாம். இதை விதைத்து 10 நாட்களில் 2 அல்லது 3 இலை விட்டதும் பறித்து சமைக்க வேண்டும். இல்லையெனில் அதில் நார்ப்பொருள் அதிகமாகி, மிகவும் கசப்பாக இருக்கும்.
வெந்தயம், பச்சைப் பயறோடு, பொன்னாங்கண்ணிக் கீரையை அரைத்து தலைக்கு தேய்த்துக் குளித்து வந்தால் தலை சம்பந்தமான நோய் நீங்கும்.


வெந்தயக்கீரை
வைட்டமின் ஏ சத்தும் சுண்ணாம்புச் சத்தும் நிறைந்தது. வெந்தயக்கீரை இளஞ்செடியுடன் இருக்கும் போதே பறித்து பயன்படுத்த வேண்டும். அஜீரணக் குறைபாடுகளை வெந்தயக்கீரை எளிதாக அகற்றிவிடும். ஜீரணசக்தி இக்கீரைக்கு அதிகமுண்டு. தொடர்ந்து வெந்தயக் கீரையை சாப்பிட்டு வந்தால் நாள்பட்ட சொறி, சிரங்கு அகலும். பார்வைக் கோளாறுகளையும் இது அகற்றும். ஒன்றுவிட்டு ஒரு நாள் உணவோடு ஏதாவது ஒரு வகையில் வெந்தயக்கீரையைச் சேர்த்துக் கொள்வதை பழக்கமாகக் கொண்டு விடுவது நல்ல பலனைத் தரும். கோடைக்குக் குளிர்ச்சியூட்டும் கீரை இது.


by - விஜயகுமாரி பாஸ்கரன்