படர்தாமரையிலிருந்து தப்பிக்க சிறந்த வழிகள்

சருமப் பிரச்னைகளில் முதன்மையானது படர்தாமரை (Ringworm). இது குழந்தைகள் முதல் முதியவர்கள் வரை அனைவருக்கும் வரக்கூடியது. உடலில் எங்கு வேண்டுமானலும் வரக்கூடியது என்றாலும் பெரும்பாலும், உடலின் மறைவான பகுதிகளில் வந்து, வெளியே சொல்லவும் முடியாமல், சரியான சிகிச்சையும் எடுக்க முடியாமல் வாட்டி வதைக்கும்.

படர்தாமரை தோன்றுவதற்கான காரணம்

சருமத்தின் மேல்பகுதியில், கெராட்டின் (keratin) என்னும் புரதம் உள்ளது. இதனை டெர்மேட்டோபைட் என்கிற பூஞ்சை பாதிக்கும். இது, தலையின் அடிப்பகுதியான ஸ்கால்ப் (scalp), கை மற்றும் கால் நகங்கள், சருமம் ஆகியவற்றை பாதிக்கும். இந்த பூஞ்சை, மனிதர்கள் மற்றும் விலங்குகளின் தோல் தொடர்பு மூலமாகப் பரவும்.

படர்தாமரையின் ஆரம்ப அறிகுறிகள்

உடலில் சிவப்பு அல்லது கறுப்புத் தழும்பு தோன்றும். இவற்றின் ஓரங்கள், மேலே எழும்பிய நிலையில் இருக்கும். அவற்றில் தொடர் அரிப்பு மற்றும் எரிச்சல் இருக்கும். அரிப்பு ஏற்பட்ட இடத்தைச் சொறியும்போது சிறுசிறு கட்டிகள் தோன்றும்.

படர்தாமரையைக் கண்டறியும் முறைகள்

புறஊதாக் கதிர் ஒளியை பாதிக்கப்பட்ட பகுதியில் பாய்ச்சுவதன் மூலம் படர்தாமரையைக் கண்டறியலாம். இப்படி செய்யும்போது பாதிக்கப்பட்ட பகுதிகள் ஒளிரும். படர்தாமரை என உறுதியானல், பயாப்ஸி (biopsy) செய்யப்படும். பாதிக்கப்பட்ட தோல் பகுதியில் உள்ள உயிரிகள் சிலவற்றை எடுத்து, பரிசோதனைக் கூடத்துக்கு அனுப்புவார்கள். ஆய்வுக்கூடத்தில், பொட்டாசியம் ஹைடிராக்ஸைடு அமிலம் (KoH) இந்த செல்களின் மேல் ஊற்றப்படும். அமிலம் பூஞ்சை செல்களை விட்டுவிட்டு, சாதாரண செல்களை மட்டும் அரித்துவிடும். இதன் மூலம், சருமத்தில் உள்ள பூஞ்சையின் தன்மை, வீரியத்தை மருத்துவர்கள் அளவிடுவர்.

சிகிச்சை முறைகள்

படர்தாமரை தோன்றிய இடத்தை அரிப்பு தாங்காமல் மீண்டும் மீண்டும் சொறிந்தால் ஸ்ட்ரெப்டோகோகால் (Streptococcal) என்னும் பாக்டீரியா தொற்று ஏற்படும். இந்தத் தொற்றைப் போக்க முதலில் ஆன்டிபயாடிக்ஸ் (antibiotics) வழங்கப்படும். பிறகு, படர்தாமரைக்கான சிகிச்சைகள் தொடங்கும். இந்த பாக்டீரியா பொதுவாக மூக்கு, வாய், பிறப்புறுப்பு, ஆசனவாய் பகுதியில் வாழும். இவை, படர்தாமரை ஏற்பட்ட இடத்தில் அரிப்பை ஏற்படுத்தும்.

கேட்டோகோனசோல் (Ketoconazole) எனப்படும் சருமத்தில் தடவும் கிரீம், ஆரம்பநிலை பூஞ்சை பாதிப்புக்குப் பெரும்பாலும் பரிந்துரைக்கப்படுகிறது. மாத்திரைகள், கிரீம்களை மட்டுமே நம்பி இருக்காமல், படர்தாமரையைத் தடுக்க, பொதுவான சில சுகாதார வழிமுறைகளைக் கடைப்பிடிக்க வேண்டும்.

படர்தாமரை வராமல் தடுக்க…

கரடுமுரடான உள்ளாடை களை அணியாக கூடாது.

ஆடைகளையும் உள்ளாடைகளையும் துவைக்காமல் பல முறை பயன்படுத்தக்கூடாது.

கோடை காலங்களில் இருமுறை குளிக்க வேண்டும்.

தலையணை உறை மற்றும் படுக்கை விரிப்பை வாரத்துக்கு ஒருமுறை கட்டாயம் மாற்ற வேண்டும்.

குளிர்ந்த நீரால் அக்குள் மற்றும் பிறப்புறுப்பு இடுக்கு களைச் சுத்தம் செய்ய வேண்டும்.

பொது இடங்களில் உள்ள குளியலறையில் குளிக்கும் போது, பாதங்கள் மூலமாக ஃபங்கஸ் பரவ வாய்ப்புள்ளது. பாதத்தில் தொற்று ஏற்படாமல் இருக்க, பிரத்யேக ஷூக்கள் வந்துவிட்டன. அவற்றைப் பயன்படுத்த வேண்டும்.

படர்தாமரை, செல்லப் பிராணிகள் மூலமாகப் பரவும். உங்கள் செல்லப் பிராணிகளுடன் விளையாடிய பின்னர் சோப்பு அல்லது சானிடைசர் போட்டுக் கைகளை நன்கு கழுவ வேண்டும்.

உங்களுக்கென தனி சோப்பு, சீப்பு, வேர்க்குரு பவுடர் பயன்படுத்த வேண்டும்.

அவசரத்தேவைக்கென மற்றவர்களுடைய காலணிகளை ஒருபோதும் பயன்படுத்தக் கூடாது.