சதுரங்க வேட்டை பட பாணியில்: இரிடியம் கண்டுபிடித்து தருவதாக ரூ.8 லட்சம் மோசடி: அம்பத்தூரில் போலி விஞ்ஞானி கைது

[You must be registered and logged in to see this image.]


விவசாயி ஒருவரிடம் இருந்த பழமையான செம்பு பாத்திரத்தில் கோடிக்கணக்கான ரூபாய் மதிப்புள்ள இரிடியம் இருப்பதாகவும் அதை எடுத்து தருவதாகவும் கூறி ரூ.8 லட்சம் மோசடி செய்த போலி விஞ்ஞானியை அம்பத்தூர் போலீஸார் கைது செய்தனர்.

திருவண்ணாமலை மாவட்டம், மாத்தூரில் வசிப்பவர் பாலசுப்ரமணியம்(41). இவர் விவசாயம் செய்து வருகிறார். பால சுப்ரமண்யத்திடம் முன்னோர்கள் பயன்படுத்தி வந்த செப்பு பாத்திரம் மற்றும் 2 இரண்டு செம்பு குடுவைகள் இருந்துள்ளது. இதில் இரிடியம் இருக்கும் என்று அவரது நண்பர்கள் தெரிவித்து அதை எடுத்தால் கோடிக்கணக்கில் பணம் வரும் என்று கூறியுள்ளனர். இதையடுத்து பாலசுப்ரமணியத்திற்கும் ஆசை வந்துள்ளது.

தனது நண்பர் ஜெயபால் என்பவரிடம் இது பற்றி கூறியபோது அவர் தனக்கு தெரிந்த விஞ்ஞானி ராம்ராஜ் பாண்டே என்று ஒருவர் இருக்கிறார், உத்தரபிரதேசத்தை சேர்ந்தவர் சூப்பர் விஞ்ஞானி நானே பல முறை அவர் விஞ்ஞானி உடையணிந்து ஆராய்ச்சி செய்வதை பார்த்திருக்கிறேன் என்று கூறி ராம்ராஜ் பாண்டேயிடம் அழைத்து சென்றுள்ளார்.

ராம்ராஜ் பாண்டே ஆராய்ச்சி கூடத்தில் விண்வெளியில் மனிதன் பயன்படுத்துவது போன்ற உடையணிந்து கண்ணாடி குடுவைகளை வைத்து ஆராய்ச்சி செய்வதை பார்த்தவுடன் மிரண்டு போய் இவர் மிகச்சிறந்த விஞ்ஞானிதான் என்று நினைத்து அவரிடம் முன்னோர்கள் மூலம் கிடைத்த சொம்பு பற்றி கூறியுள்ளார்.

தான் இரிடியம் ஸ்பெஷலிஸ்ட் என்று கூறிய பாண்டே இரிடியம் எடுக்க ரூ.8 லட்சம் செலவாகும், அதை மொத்தமாக கொடுத்தால் ஒரு வாரத்தில் ஆராய்ச்சி மூலம் இரிடியத்தை எடுத்து விடுவேன் என்று ஆசைக்காட்டியுள்ளார். இதை நம்பிய பாலசுப்ரமணியம் கடந்த மாதம் 20 ஆம் தேதி மொத்தமாக ரூ.8 லட்சத்தை கொடுத்துள்ளார்.

பணத்தை வாங்கிய பின்னர் பாலசுப்ரமணியம் சென்று பார்க்கும் பொழுதெல்லாம் விண்வெளி ஆடை அணிந்து செப்பு பாத்திரங்களை ஆராய்ச்சி செய்வது போல் போக்கு காட்டிய பாண்டே ஒரு நாள் பணத்துடனும் செப்பு பாத்திரங்களுடன் காணாமல் போய் விட்டார்.

போலி விஞ்ஞானி பாண்டேவை நீண்ட நாள் தேடலுக்கு பின் கண்டுபிடித்த பாலசுப்ரமணியம் எனக்கு இரிடியம் வேண்டாம், பணத்தையும், செப்பு பாத்திரத்தையும் கொடுத்து விடுங்கள் என்று கேட்ட போது போலி விஞ்ஞானி பாண்டே அவரை கொன்றுவிடுவதாக மிரட்டி உள்ளார்.

இதையடுத்து பாலசுப்ரமணியம் அளித்த புகாரின் பேரில் அம்பத்தூர் போலீஸார் போலி விஞ்ஞானி பாண்டேவை தேடி வந்தனர். நேற்றிரவு அம்பத்தூர் எஸ்டேட்டில் பாண்டேவை போலீஸார் மடக்கி பிடித்தனர்.

ரூ.8 லட்சத்தில் எல்லா பணமும் செலவழித்தது போக ரூ.50 ஆயிரம் மட்டுமே மிச்சம் இருப்பதாக பாண்டே தெரிவித்துள்ளார். பணம் ரூ.50 ஆயிரம் மற்றும் விண்வெளி உடை உள்ளிட்ட ஆராய்ச்சி கருவிகளை பறிமுதல் செய்த போலீஸார் பாண்டே மீது பிரிவு 420, 506(2)-ன் கீழ் வழக்குப்பதிவு செய்து சிறையிலடைத்தனர்.
நன்றி
தி இந்து