கடந்த 2015ம் ஆண்டில் செவ்வாய் கிரகத்தில் தண்ணீர் இருப்பதாக கூறப்பட்டது தவறு

வாஷிங்டன் : செவ்வாய் கிரகத்தில் தண்ணீர் இருப்பதாக கடந்த 2015ல் கூறப்பட்டது தவறான தகவல் என நாசா விஞ்ஞானிகள் கூறியுள்ளனர். அது பற்றி நடத்தப்பட்ட தீவிர ஆய்வில், மணல்தான் தண்ணீர் போல் காட்சி அளித்ததாக தெரிய வந்துள்ளது. அமெரிக்க விண்வெளி ஆய்வு மையமான நாசா, செவ்வாய் கிரகத்தை நீண்ட காலமாக ஆய்வு செய்து வருகிறது. செவ்வாய் கிரகத்தில் தண்ணீர் இருப்பதற்கான அடையாளங்கள் கண்டு பிடிக்கப்பட்டதாக நாசா இயக்குனர் கடந்த 2015ம் ஆண்டு அறிவித்தார். ஆய்வுக்கலங்கள் மூலம் செவ்வாய் கிரகத்தின் மேற்பரப்பை படம் பிடித்து ஆராய்ந்ததை வைத்து இத்தகவலை அவர் வெளியிட்டார். அதற்கு ஆதாரமாக, செவ்வாய் கிரகத்தில் தண்ணீ–்ர் ஓடியதால் நிலப்பரப்பில் ஏற்பட்ட மாற்றங்களை படம் பிடித்து நாசா வெளியிட்டது. செவ்வாயின் மேற்பரப்பில் உள்ள சாய்வான பகுதிகளில் கருப்பு நிற கோடுகள் தெரிந்தன. அவை அங்கு நீர் தேங்கியதற்கான அல்லது ஓடியதற்கான அடையாளங்கள் போல் தெரிவதாக கூறப்பட்டது. உலகளவில் இது பெரும் பரபரப்பை ஏற்படுத்தியது. இதனால், அங்கு மனிதன் வாழ்வதற்கான சாத்தியக்கூறுகள் கண்டிப்பாக இருப்பதாக பேசப்பட்டது. அங்கு தண்ணீர் இருப்பதாக கூறப்பட்டது தவறான தகவல் என இப்போது உறுதியாகி இருக்கிறது.
உலகம் முழுவதும் செவ்வாய் கிரகத்தை பற்றிய ஆராய்ச்சிகள் தொடர்ந்து நடந்து வருகிறது. அதில், ஒவ்வொரு கால கட்டத்திலும் செவ்வாய் கிரகத்தின் மேற்பரப்பில் மாற்றங்கள் ஏற்பட்டுக் கொண்டு வருவது தெரிய வந்துள்ளது. கடந்த 2015ல் தண்ணீர் இருப்பதற்கான அடையாளங்கள் தெரிவதாக கூறப்பட்ட இடங்களில் நிலபரப்பில் தெரிந்தவை மணல் அல்லது தூசி குவியலாக இருக்கலாம் என புதிய ஆய்வின் மூலம் கண்டுபிடிக்கப்பட்டுள்ளது. ‘செவ்வாய் மேற்பரப்பில் கருமையான கோடுகளாக நிழல் போல் தெரிந்தவை தண்ணீராக இருக்க வாய்ப்பில்லை. மண் அல்லது தூசி குவியலாக இருக்கலாம். செவ்வாய் கிரகத்தின் துருவ பகுதி மற்றும் கெட்டியான தாதுக்களில் ஈரம் இருப்பதற்கான ஆதாரங்கள் இருந்தாலும், முன்பு கூறப்பட்டது போல் அதிகளவிலான தண்ணீர் இருப்பதற்கான வாய்ப்பு சந்தேகமே’ என அமெரிக்க புவியியல் ஆய்வு விஞ்ஞானிகள் கூறுகின்றனர். நேச்சர் ஜியோ சயின்ஸ் என்ற இதழில் வெளியாகியுள்ள ஆய்வு கட்டுரை ஒன்றில், ‘செவ்வாய் கிரகத்தின் மேற்பரப்பில் மாறி மாறி ஏற்படும் மண் குவியல், பள்ளம் ஆகியவை அங்கு நீர் வளம் உள்ளது என்பதற்கு முரணமாக உள்ளது. செவ்வாய் கிரகத்தில் உள்ள மணல்தான் இந்த குவியலை ஏற்படுத்துகின்றன. தண்ணீர் இருந்தால் இது போன்ற மாற்றம் நிச்சயம் ஏற்படாது’ என தெரிவிக்கப்பட்டுள்ளது.
நன்றி
தினகரன்