நவாஸ் ஷெரீப்பை வீட்டுக் காவலில் வைக்க பாக்., அரசு உத்தரவு

இஸ்லாமாபாத்: பாகிஸ்தானின் முன்னாள் பிரதமர் நவாப் ஷெரீப்பை கைது செய்து வீட்டுக் காவலில் வைக்க பாகிஸ்தான் அரசு திடீர் உத்தரவு பிறப்பித்துள்ளது. அவரது வீட்டுக்காவல் 3 நாட்கள் நீடிக்கும் எனவும் தெரிவிக்கப்பட்டுள்ளது. மேலும் அவரது வீட்டின் அருகே கூடி இருந்த நவாப்பின் ஆதரவாளர்கள் நூற்றுக் கணக்கானோரும் கைது செய்யப்பட்டுள்ளனர். நவாஸ் ஷெரீப்புக்கு ஆதரவாக முழக்கமிட்ட 20 வக்கீல்களும் கைது செய்யப்பட்டுள்ளனர்.நவாப் ஷெரீப்பின் மகன், சகோதரர் மற்றும் இம்ரான் கான் உள்ளிட்ட முக்கிய எதிர்க்கட்சித் தலைவர்களும் வீட்டுக் காவலில் வைக்கப்பட்டுள்ளனர்.

பாகிஸ்தான் முன்னாள் பிரதமர் நவாஸ் ஷெரீப் கைது செய்யப்பட்டு, வீட்டுக் காவலில் வைக்கப்பட்டதை கண்டித்தும், பதவி நீக்கம் செய்யப்பட்ட நீதிபதிகளை மீண்டும் பதவியமர்த்தக் கோரியும் லாகூல் வக்கீல்கள் சங்கத்தினர் இஸ்லாமாபாத் நோக்கி பேரணி நடத்தினர். இதில் அதிபர் சர்தாரிக்கு எதிராக அவர்கள் கோஷங்களையும் எழுப்பினர். நாடாளுமன்ற பேரணியை தடுக்கவே பாகிஸ்தான் அரசு இது போன்ற நடவடிக்கை மேற்கொண்டிருப்பதாக தெரிவிக்கப்படுகிறது. இதனால் அவர்கள் மீது தடியடி நடத்தப்பட்டது. இதனால் அப்பகுதியில் பெரும் பதற்றம் நிலவி வருகிறது. பயங்கர கலவரம் ஏற்படும் நிலை உருவாகி உள்ளதால், லாகூரில் அமைதியை கொண்டு வர ராணுவம் பெருமளவில் குவிக்கப்பட்டுள்ளது.

மேலும் லாகூரில் இருந்து இஸ்லாமாபாத் செல்லும் அனைத்து பாதைகளும் சீல் வைக்கப்பட்டுள்ளன. லாகூர், இஸ்லாமாபாத் நகர்களில் உள்ள பெட்ரோல் பங்க்குகளும் மூடப்பட்டுள்ளன. மேலும் வெடிகுண்டு சோதனை குழுவினரும் இப்பகுதியில் பாதுகாப்புப் பணியில் ஈடுபடுத்தப்பட்டுள்ளனர். பாகிஸ்தான் அரசின் தடையை மீறி நடத்தப்படும் இந்த பேரணி இஸ்லாபாத்திற்குள் நுழைவதை தடுக்க ராணுவப்படைகளின் பாதுகாப்பு தீவிரப்படுத்தப்பட்டுள்ளது.