தினசரி உற்பத்தியை குறைத்ததால் முட்டை விலை வரலாறு காணாத உயர்வு

நாமக்கல்: நாமக்கல் மண்டலத்தில் முட்டை விலை 459 காசுகளாக உயர்ந்துள்ளது. ஒரே வாரத்தில் 27 காசு வரை அதிகரித்துள்ளது. கோழிப்பண்ணை வரலாற்றில் இதுவே அதிகபட்ச விலையாகும். தினசரி 20 லட்சம் முட்டை உற்பத்தியை குறைத்ததால் விலை கிடுகிடுவென உயர்ந்து வருகிறது.
நாமக்கல்லில் நேற்று தேசிய முட்டை ஒருங்கிணைப்பு குழுவின் விலை நிர்ணய குழு கூட்டம் நடைபெற்றது. இதில், பண்ணையாளர்கள் மற்றும் வியாபாரிகள் கலந்து கொண்டு முட்டை உற்பத்தி மற்றும் விற்பனை நிலவரம் குறித்து ஆலோசித்தனர். கூட்டத்தில் முட்டை விலையில் மேலும் 9 காசுகள் உயர்த்த முடிவு செய்யப்பட்டது. இதையடுத்து, ஒரு முட்டையின் பண்ணை கொள்முதல் விலை 459 காசுகளாக நிர்ணயம் செய்யப்பட்டது. நாமக்கல் கோழிப்பண்ணை தொழில் வரலாற்றில் இதுவே முட்டையின் அதிகபட்ச விலையாகும்.

கடந்த 2016 ஜூனில் ஒரு முட்டையின் பண்ணை கொள்முதல் விலை 435 காசுகளாக நிர்ணயம் செய்யப்பட்டது. இந்த விலை 25 நாட்கள் வரை நீடித்தது. இந்த ஆண்டு தற்போது நிர்ணயம் செய்யப்பட்டுள்ள விலை தான் நாமக்கல் மண்டல கோழிப்பண்ணை வரலாற்றில் அதிகபட்ச விலையாகும். ஒரே வாரத்தில் முட்டை விலை 27 காசுகள் வரை உயர்ந்துள்ளது. தமிழ்நாடு முட்டைக்கோழி பண்ணையாளர்கள் சம்மேளன துணைத்தலைவர் வாங்கிலி சுப்பிரமணியம் கூறியதாவது: நாமக்கல் பகுதியில் கடந்த 3 ஆண்டாக கடும் வறட்சி தான் நிலவியது. கோழிப்பண்ணைகளை நடத்த முடியாமல் பலர் பண்ணைகளில் புதியதாக குஞ்சு விடுவதை குறைத்துக்கொண்டனர். இதனால், உற்பத்தி கனிசமாக குறைந்துள்ளது. நாமக்கல் பகுதியில் சராசரியாக தினமும் 20 லட்சம் முட்டை உற்பத்தி குறைந்துவிட்டது.

வட மாநிலங்களில் குளிர்காலம் துவங்கியுள்ளதால் அங்கு முட்டையின் தேவை அதிகரித்துள்ளது. தமிழகத்திலும், கேரளாவிலும் முட்டை விற்பனை தொடர்ந்து உயர்ந்து வருகிறது. இதனால், முட்டை விலை அதிகரிக்கப்பட்டுள்ளது. காய்கறி விலை உயர்ந்து வருவதால் முட்டையின் விற்பனை தமிழகத்தில் பல இடங்களில் அதிகரித்துள்ளது. இதனால், முட்டை விலை மேலும் உயர வாய்ப்பு உள்ளது என்றார். தமிழகம் மற்றும் கேரளாவில் முட்டை நுகர்வு அதிகரித்துள்ளதாலும் விலை உயர்ந்துள்ளது. இவ்வாறு அவர் கூறினார். மற்ற மண்டலங்களில் நேற்று நிர்ணயம் செய்யப்பட்ட முட்டை விலை விபரம்(காசுகளில்) வருமாறு: ஐதராபாத் 475, விஜயவாடா 470, மும்பை 518, மைசூரு 485, பெங்களூரு 490, கொல்கத்தா 515, டெல்லி 518.
நன்றி
தினகரன்