இந்தியாவில் விற்கப்படும் 76% எல்இடி பல்ப்கள் பாதுகாப்பானதல்ல

இந்தியாவில் பதிவு செய்யாத நிறுவன தயாரிப்புகளை விற்பதால் அரசுக்கு பல கோடி ரூபாய் வருவாய் இழப்பு
* 31 சதவீத பல்ப்புகளில் பிராண்ட் பெயர் கூட பொறிக்கப்படவில்லை
* இந்தியாவில் எல்இடி பல்ப் வர்த்தகம் ஆண்டுக்கு ரூ.6,500 கோடி
* சந்தையில் விற்கப்படும் 76% பல்ப்கள் பாதுகாப்பானவை அல்ல
புதுடெல்லி: இந்தியாவில் விற்பனை செய்யப்படும் 76 சதவீத எல்இடி பல்ப்கள் பாதுகாப்பானதாக இல்லை என ஆய்வு ஒன்றில் தெரியவந்துள்ளது. மின் சிக்கனம் மற்றும் சுற்றுச்சூழலை கருத்தில் கொண்டு எல்இடி பல்ப்புகள் தயாரிப்பு மற்றும் விற்பனையை இந்தியா ஊக்குவித்து வருகிறது. உஜாலா திட்டத்தின் கீழ் மலிவு விலை பல்புகள் விற்பனை செய்யப்படுகின்றன. இந்நிலையில் நெய்ல்சன் என்ற நிறுவனம் மும்பை, ஐதராபாத், அகமதாபாத் மற்றும் புதுடெல்ியில் கடந்த ஜூலை மாதத்தில் ஒரு சர்வே நடத்தியது. மேற்கண்ட நகரங்களில் உள்ள சுமார் 200 மின்பொருள் விற்பனை நிலையங்களில் இது மேற்கொள்ளளப்பட்டது.
இதில், 48 சதவீத பல்பு பிராண்ட்களில் தயாரிப்பு நிறுவனத்தின் முகவரியே இல்லை. 31 சதவீத பல்புகளில் உற்பத்தியாளர் பெயர் கூட இல்லை என ஆய்வில் தெரிய வந்துள்ளது. இதுகுறித்து ஆய்வறிக்கையில் கூறப்படுவதாவது: இந்தியாவில் எல்இடி பல்ப் உற்பத்தி மற்றும் தயாரிப்பை மத்திய அரசு ஊக்குவித்து வருகிறது. அதேநேரத்தில், போலியான தயாரிப்புகள் நிறைய உலா வருகின்றன. பலவற்றில் உற்பத்தியாளர் பெயர் கூட இல்லை. இவை மத்திய அரசின் மேக் இன் இந்தியா திட்டத்துக்கும், எளிய முறையில் தொழில் தொடங்கும் கொள்கைக்கும் எதிரானதாக உள்ளது.
இவ்வாறு விற்கப்படும் தயாரிப்புகள் தரமானவையாக இல்லை. இந்தியாவின் மொத்த எல்இடி பல்ப் விற்பனையில் சுமார் 76 சதவீத பல்புகள் பாதுகாப்பு அம்சம் கொண்டதாக இல்லை. இந்திய எல்இடி பல்ப் சந்தையில் ஆண்டு வர்த்தகம் சுமார் 100 கோடிடாலருக்கு (சுமார் ரூ.6,500 கோடி) நிகழ்கிறது. இந்நிலையில் போலியான மற்றும் பதிவு செய்யப்படாத தரமற்ற தயாரிப்புகள் விற்கப்படுவதால் அரசுக்கும் பல கோடி ரூபாய் வரி வருவாய் இழப்பு ஏற்படுகிறது என ஆய்வில் கூறப்பட்டுள்ளது. இந்திய சந்தையில் மலிவு விலை சீன தயாரிப்புகள் குவிக்கப்படுகின்றன. இதில் எல்இடி பல்புகளும் அடக்கம். இதை தடுக்கும் வகையில், எல்இடி பல்ப் உற்பத்தியாளர்கள் பதிவு செய்ய வேண்டும் என இந்திய தர நிர்ணய அமைவனம் கடந்த ஆகஸ்ட் மாதத்தில் உத்தரவிட்டிருந்தது குறிப்பிடத்தக்கது.
நன்றி
தினகரன்