மேயாத மான்- திரைப்பட விமரிசனம்

**ayyasamy ram** · **ayyasamy ram** Thu Nov 02, 2017 12:39 pm

-
காதலை சொல்லாத இளைஞனின் சூழலை சொல்வதே
‘மேயாத மான்’. பிரியமான தங்கையோடு வாழ்கிறார்
வைபவ்.

ப்ரியா பவானி சங்கரோடு கல்லூரியில் சேர்ந்து படித்தாலும்,
தன் காதலை அவரிடம் கொண்டு செல்லாத சோகம்.
ப்ரியாவுக்கு நிச்சயதார்த்தம் என்று அறிந்த நிலையில்
துக்கமுற்று, தற்கொலை செய்ய நினைக்கிறார்.

அதை உயிர் நண்பன் விவேக் பிரசன்னாவோடு பகிர்ந்து
கொண்டு விடைபெற திட்டமிட்டு போன் செய்கிறார்.

சடுதியில் விவேக் செயல்பட்டு, ப்ரியாவிடமே எதிர்மறையாகப்
பேச வைத்து வைபவ்வின் தற்கொலை முடிவை மாற்றுகிறார்.

மீண்ட வைபவ் தன் காதலில் வெற்றி பெற்றாரா என்பதே படத்தின்
இறுதிக் கணங்கள். மிகச் சிறிய கதைக்கு விறுவிறுப்பு கூட்டிய
வகையிலும் நெருக்கமாக கதை சொன்ன விதத்திலும் அறிமுகப்
படைப்பில் கவனம் கவர்கிறார் இயக்குநர் ரத்னகுமார்.

வைபவ் ‘மேயாத மான்’ என இசைக்குழு நடத்துபவராக வருவது
புது ஆரம்பம். பாசத்தில் உருகும் அண்ணனாக, நட்பில்
திளைப்பவராக, காதலியுடன் நெருக்கத்தில் கலக்குபவராக
வைபவ் கச்சிதம்.

அலட்சியமும், விடலைத்திமிரும், உருகும் காதலும், காதலியிடம்
சலம்பும் விதமும் பின் அவள் காதல் வேண்டி பம்முவதுமாக
வயதுக்கு உரிய மேனரிசங்களை அநாயாசமாக அள்ளித்தருகிறார்.
இதே பாட்டையில் சென்றால் நிச்சயம் வழியுண்டு ப்ரோ!

**ayyasamy ram** · **ayyasamy ram** Thu Nov 02, 2017 12:40 pm

-

அசத்தலான அறிமுகம் ப்ரியா. கவர்ச்சியில் காலடி வைக்காமல்
மிளிர்கிறார். அந்த உயரத்திற்கும், மிடுக்கிற்கும் கொஞ்சம்
நடிப்பையும் கற்றுக்கொண்டால் தமிழுக்கு கூடுதல் கதாநாயகி
இருப்பு கன்பார்ம்!

ஜாடிக்கேற்ற மூடியாக விவேக் பிரசன்னா எளிமையான நடிப்பில்
மெருகூட்டுகிறார். இதற்கு முன்பான படங்களில் வித்தியாசம்
காட்டத் தெரிந்தவரை முழுமையான நடிகனாக்கியிருக்கிறார்
இயக்குநர்.

யார் அந்த வாயாடி தங்கச்சி... என கேட்க வைக்கிறார் புதுமுகம்
இந்துஜா. வடசென்னை பெண்களுக்கான இயல்பு, துடுக்கு, பிரியம்
என மின்னுகிறார். இன்னொரு அருமையான காதல் இந்துஜா -
விவேக்குக்கானது.

தங்கையாக நினைத்துப் பழகும் விவேக்கின் தன்மையை
இந்துஜா நிராகரிக்கும் முதல் கணம் அவரைப் போலவே, நமக்கும்
திருப்பம்.

படத்தின் எதார்த்தமே பெரிய பலம். ஆனால், அதை மட்டும்
வைத்துக்கொண்டு பிற்பகுதியில் கதை சொல்ல முடியாமல்
திகைத்து நிற்கிறார் இயக்குநர்.

தன் நிச்சயத்தைக்கூட மாற்றிக் கொண்டு வரும் ப்ரியா, வைபவ்
சொல்லும் ஒரு வார்த்தைக்காக கோபிப்பதும், அதையே வைபவ்
முன்னெடுத்துச் செல்வதும் ரொமான்ஸுக்கு தூரமாகவே
இருக்கிறது.

விது அய்யண்ணாவின் ஒளிப்பதிவு வடசென்னையின்
தெருக்களில் புகுந்து புறப்பட்டு எழில் சேர்க்கிறது. பிரதீப்குமார்
- சந்தோஷ் நாராயணன் கூட்டணி இசையில் அசத்துகிறது.

நடுநடுவே தலை நீட்டும் குட்டிகுட்டி பாடல்கள் முதற்கொண்டு
அத்தனையும் உத்தமம். கடைசியில் காதலில் இணைவதற்கு
‘அந்த ஒரு வழி’தான் மிச்சமா! விறுவிறு திரைக்கதை கடைசியில்
திணறுவது கண்கூடு.

திரைக்கதையை இறுக்கியிருந்தால், ‘மேயாத மான்’ இன்னும்
நம்மைக் கவர்ந்திருக்கும்!
-
----------------------------------------
நன்றி- குங்குமம்

**ayyasamy ram** · **ayyasamy ram** Thu Nov 02, 2017 12:43 pm

மேயாத மான்- திரைப்பட விமரிசனம் Mayor%20deer

Sponsored content · Sponsored content

மேயாத மான்- திரைப்பட விமரிசனம்

மேயாத மான்- திரைப்பட விமரிசனம்

Re: மேயாத மான்- திரைப்பட விமரிசனம்

Re: மேயாத மான்- திரைப்பட விமரிசனம்

Re: மேயாத மான்- திரைப்பட விமரிசனம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக