அந்தநாளாய தீபாவளி --இன்றைய வாழ்த்துக்கள்

அந்தநாளாய தீபாவளி
--அண்ணாமலை சுகுமாரன்
இப்போதெல்லாம் தீபாவளி வரும்போதெல்லாம் இழந்துவிட்ட அந்த நாளைய சந்தோஷங்கள்தான் மனதை உறுத்துகிறது சுமார் 50 ஆண்டுகளுக்கு முன் நான் சிறுவனாக இருந்தபோது கொண்டாடிய தீபாவளிகள் இன்னமும் நினைவில் நிற்கிறது அப்போதெல்லாம் ஐப்பசிப்பிறந்தாலே அனைவருக்கும் தீபாவளி சந்தோசம் தொற்றிக்கொள்ளும் .
ஒரு மாதம் முன்பே தீபாவளி அட்வான்ஸ் , போனஸ் , கைத்தறி கடையில் கடன் ,காதியில் கடன் என தீபாவளிகளைக்கட்டும் .தினமும் ஒரு வேலை இருக்கும் .
அப்போதெல்லாம் இனிப்புக்கடைகள் அத்தனை இருக்கவில்லை .
ஆனால் அனைத்து வீடுகளிலும் தாங்களே இனிப்பும் , காரமும் சொந்தமாக செய்யும் பழக்கம் அதிகம் இருந்தது .
அதிகம் பலகாரங்கள் செய்து தங்கள் சாமர்த்தியத்தைக் காட்ட அப்போதைய பெண்கள் விரும்புவார்கள்
ஒரு மாதம் முன்பே அதற்க்கு வேண்டிய பொருள்களை கடைகளில் வாங்கி அவைகளை வெய்யலில் காயவைத்து ,அதை மாவு இயந்திரத்தில் கொண்டு சென்று அரைத்துக்கொண்டுவருவது சிறுவர்களின் வேலை .மாதம் முழுவதும்அந்த வேலை அப்போதெல்லாம்உண்டு கூடவே மழையும் உண்டு .ஐப்பசி அடைமழை என்று தவறாமல் பெய்யும் மழை அப்போதெல்லாம் உண்டு . தினமும் ஒரு தின்பண்டம் என வீடுகளில் செய்ய ஆரம்பிப்பார்கள் .தெருவே அப்போது மணக்கும் .சிறுவர்களுக்கு தினமும் குதுகோலம் தான்
புதுத்துணி வாங்க பயணம் , தையல் கடைகளில் அளவு கொடுத்து விட்டு தீபாவளி முதலிரவு வரை காத்திருந்து வாங்கிவருவது என எத்தனை சந்தோஷ அனுபவங்கள் அப்போது இருந்தது
அப்போதெல்லாம் ரெடிமேடுகள் கிடையாது .
வீட்டில் இருக்கும் பெண்களுக்கு வாங்கிய புதுப்புடவைப்பற்றியும் ,வீட்டில் செய்யும் திண்பண்டங்கள்
என பேச்செல்லாம் ஒரு மாதம் தீபாவளிப்பற்றியே இருக்கும் .தீபாவளிப்பற்றிய" கவுட்டவுன் " ஆரம்பம் ஆகிவிடும் .நினைவெல்லாம் தீபாவளி எதிர்பார்ப்பிலேயே சிறுவர்களுக்கு இருக்கும் .தினமும் கடைகளுக்கு சென்று கொஞ்சம் கொஞ்சம் பட்டாசுகள் வாங்கி நண்பர்களுடன் சேர்ந்து வெடிப்பது , பின்பு அதைப்பற்றியே பேசி நினைவில் மகிழ்வது என பல சந்தோஷங்கள் அப்போதைய தீபாவளிக்கு உண்டு .ஒருவாறு தீபாவளியும் வந்துவிடும் ,அன்று இரவு முழுவதும் வீடுகளில் பெண்கள் தூங்கமாட்டார்கள் .
விடியவிடிய திட்டம் போட்டு ,செய்யாமல் மிச்சம் இருக்கும் தின்பண்டங்களை செய்வதும் ,வடை சுழியன் என அன்றைய தின பலகாரங்கள் செய்வதில் இரவு போகும் .
சிறுவர்களும் தூங்கமாட்டார்கள் ,தாயார் ,சகோதரிகளுடன்
துணையாக இருப்பார்கள் .உற்சாக பேச்சு ,மனம் முழுக்க
மகிழ்ச்சி இவைகளே வீடு முழுவதும் நிறைத்திருக்கும் .
விடியும் முன் நாலு மணிக்கே வெந்நீர் சூடாகத்தொடங்கிவிடும் .விடியும் முன்பே தலை குளித்தால் தான் கங்காஸ்தானம் என ஆகும் என்ற கவலை பெரியவர்களுக்கு உண்டு ஐந்து மணிக்கே புதுதுணி போட்டுக்கொண்டு , தெருவில் வீடுகளுக்கு பலகார விநியோகமும் தொடங்கிவிடும் .
வீட்டில் செய்த தின்பண்டமும் ,புது ஆடைகளும் புகழப்படும் அப்போது சந்தோசம் கொஞ்சம் கூடும் .
பிறகு தொடங்கும் பட்டாசு வெடிப்பு நண்பர்களுடன் ஆரம்பமாகும் .இவையெல்லாம் இன்னமும் நீக்காத நினைவுகள் .தீபாவளி என்றாலே அப்போதெல்லாம்
சந்தோசம் தான் . பிறகு வீட்டுக்கு வீடு தீபாவளி மலர் வாங்குவது , அதைப்பற்றியே பேசுவது ,மாதம் முழுவதும் அதை பரிமாறிக்கொள்வது என்று பல சந்தோஷங்களை
அடங்கியதாக தீபாவளி அப்போது இருந்தது .
தீபாவளி எதற்க்காக கொண்டாடப்படுகிறது என்றகவலை யாருக்கும் இல்லை .தீபாவளி வருவதே அனைவருக்கும்
சந்தோசம்அளிப்பதற்காகவே என்பது அனைவரின் எண்ணம் .அப்போது ஏழைப் பணக்காரன் என்று பாகுபாடு இல்லாமல்
அனைவரும் அவரவர் தகுதிக்கு தக்கவாறு கொண்டாடி அனைவரும் சந்தோஷமாக இருந்தனர் .
அத்தகைய ஆண்டு முழுவதும் எதிர்பார்த்து சந்தோஷமாக கொண்டாடிய தீபாவளியின் இப்போதைய நிலை என்ன ?

இப்போது அனைவரிடமும் எதையும் வாங்கும் சக்தி இருக்கிறது .ஆனால் சந்தோஷத்தை தான் வாங்க முடியவில்லை எப்படி மகிழ்ச்சியாக இருப்பது ?போன்ற புத்தகங்கள் விற்பனை சக்கைப்போடு போடுகிறது .
மனிதனின் இயல்பே மகிழ்ச்சிதான் என்பது மறந்துவிட்டது ..
சின்னச் சின்னச் சந்தோஷ அனுபவங்களால் மனதை நிரப்பி மனத்தையும்உடலையும் எப்போதும் மகிழ்ச்சியாகவைத்துக்கொள்ளத் தவறிவிட்டோம்
பலரும் புன்னகைப்பதுகூடதினமுமல்ல .

இப்போதைய தீபாவளிக்கு இரவில் பூத்து காலையில் வாடும் மலர்களாக மாறிவிட்டது .வருவதும் தெரியவில்லை போவதும் தெரியவில்லை .
முதல் நாள் இரவு சென்று அனைவருக்கும் ஆயத்த ஆடையும் , ஆயத்த இனிப்புகளும் கொஞ்சமாக வாங்கி ,
விடிந்ததும் படைத்து , தலைகுளித்து புத்தாடை உடுத்தி ,
ஸ்மார்ட் போனைப்பார்த்துக்கொண்டே உணவருந்தி , விரைவில் விஜய் ,தலை படங்களை காண ஓட்டம் வயது குறைந்தவர்களுக்கு , மற்றவர்களுக்கோ முழு கவனமும்
டீ வி முன்தான் ,அன்பை பிறருக்கு கொடுப்பதற்கும் நேரமில்லை , எனவே அன்பை பெரும் வாய்ப்பும் இல்லை .
இப்போது தீபாவளி என்னமோ வருகிறது , அனால் அது தரும் சந்தோசம் தான் இல்லை .
அண்ணாமலை சுகுமாரன்
15/10/17
ஆனந்தம் ஆனந்தம் ஆனந்தமே என்று அனைவரும் மகிழ்ச்சியாக தீபாவளிக்
கொண்டாட வாழ்த்துக்கள் !

தீபாவளி மட்டுமல்ல . எல்லாப் பண்டிகைகளும் பொலிவிழந்துவிட்டன. காரணம் சீரியல்களும் , செல்போனும்தான் . பட்டிமன்றம் என்ற பெயரில் எல்லா சேனல்களிலும் ஒரு வெட்டிப்பேச்சு ! தல படங்களால் , தளபதி படங்களால் நாட்டுக்கு என்ன நன்மை ? மக்கள் சிந்திக்கவேண்டும்..

ஐந்து ரூபாய்க்கு பட்டாசு வாங்கி
ஓய்ந்து போகும் வரை வெடித்தது அந்தக்காலம்.
ஐம்பத்து ஐந்துக்கு கம்பி மத்தாப்பு ஒரு பெட்டி இன்று .
சந்தோஷமா வரும் ? கண்ணீர்தான் வரும்.

ரமணியன்