பேராக் சுல்தான் அஸ்லான் ஷாவை இணையத்தளத்தில் அவமதித்ததாக குற்றம் சாட்டப்பட்டுள்ளது

பேராக் சுல்தான் அஸ்லான் ஷாவை இணையத்தளத்தில் அவமதித்ததாக அறுவர்மீது குற்றம் சாட்டப்பட்டுள்ளது

அவ்வறுவர்மீதும் இன்று காலை கோலாலம்பூர், பெட்டாலிங் ஜெயா, கோத்தா கினாபாலு,பட்டர்வொர்த் ஆகிய இடங்களில் உள்ள நீதிமன்றங்களில் ஒரேமாதிரியாக குற்றம் சாட்டப்பட்டது.

1998, பல்லூடக மற்றும் தகவல்தொடர்புச் சட்டத்தின் 233-ஆம் பகுதியின்கீழ் அவர்கள் குற்றம் சாட்டப்பட்டனர். இது, இணையத் தளத்தில் ஆபாசமான, பொய்யான, அச்சுறுத்தல்தன்மை வாய்ந்த,தொல்லைதரும் கருத்துகள், கோரிக்கைகள், தகவல்கள் போன்றவற்றை வெளியிடுவது தொடர்பான சட்டமாகும்.

இச்சட்டத்தின்கீழ் ஒருவர் குற்றம் சாட்டப்படுவது இதுவே முதல்முறையாகும்.இதன்கீழ் குற்றவாளி என்று கண்டுபிடிக்கப்படும் ஒருவருக்கு கூடினபட்சம் அபராதமாக ரிம 50,000 அபராதம் அல்லது ஓராண்டுச் சிறைத் தண்டனை அல்லது இரண்டும் சேர்த்து விதிக்கப்படலாம்.

கோலாலம்பூர் நீதிமன்றத்தில், பேரா சுல்தானின் இணையத்தளத்தில் சுல்தான் அஸ்லான் ஷாவை அவமதித்ததை ஒப்புகொண்ட ஆய்வுக்கூட ஊழியர் ஒருவருக்கு ரிம 10,000 அபராதம் விதிக்கப்பட்டது.

இந்தப் பதிவு இடப்படும்வரை அஸ்ரின் முகமட் ஜைன்,33, அபராதத்தொகையைச் செலுத்தவில்லை. அபராதம் செலுத்தாவிட்டால் ஐந்து மாதச் சிறைத்தண்டனையை எதிர்நோக்குவார்.அவர், வழக்குரைஞரும் வைத்துக்கொள்ளவில்லை.

கோலாலம்பூர் நீதிமன்றத்தில் குற்றம்சாட்டப்பட்ட இன்னொருவர் முஸ்லிம் அகமட்.

குற்றச்சாட்டை மறுத்து விசாரணை கோரிய அவர் ரிம 3,000 பிணையில் விடுவிக்கப்பட்டார். அவரது வழக்கு ஏப்ரல் 8-இல் விசாரிக்கப்படும்.

இணையத்தளத்தில் பேரா சுல்தானை அவமதித்ததாக பெட்டாலிங் ஜெயா நீதிமன்றத்தில் நோர் ஹிஷாம் ஒஸ்மான்மீது குற்றம் சுமத்தப்பட்டது. அவர் மறுத்து விசாரணை கோரினார். அவரது வழக்கு ஏப்ரல் 14-இல் விசாரணைக்கு வரும்.

கோத்தா கினாபாலுவில், கைப்பேசி விற்பனையாளர் ஒருவர்மீதும் இதே குற்றம் சுமத்தப்பட்டது.

அவர், ருடினின் சுஹாய்மின், விசாரணை கோரினார். அவரது வழக்கு மே 25, 26 ஆகிய நாள்களில் மெஜிஸ்ட்ரேட் உம்மு கல்சோம் முன்னிலையில் விசாரிக்கப்படும்.

அவரும் பிணையில் விடுவிக்கப்பட்டார்.

பட்டர்வொர்த் செஷன்ஸ் நீதிமன்றத்தில், சான் ஹொன் கியோங், கூ ஹூய் சுவாங் ஆகிய இருவரும் சுல்தானை அவமதிக்கும் கருத்துகளை இணையத்தளத்தில் வெளியிட்ட குற்றச்சாட்டை எதிர்நோக்கினார்கள்.

மலேசியாஇன்று