ஆஸ்திரேலியாவுக்கு எதிரான 20 ஓவர் கிரிக்கெட் தொடர்: இந்திய அணியில் நெஹரா, தினேஷ் கார்த்திக் அஸ்வின், ரவீந்திர ஜடேஜாவுக்கு இடமில்லை

புதுடெல்லி,

ஆஸ்திரேலிய கிரிக்கெட் அணி, இந்தியாவில் சுற்றுப்பயணம் செய்து விளையாடி வருகிறது. இரு அணிகள் இடையிலான 5 ஆட்டங்கள் கொண்ட ஒருநாள் போட்டி தொடரை இந்திய அணி 4-1 என்ற கணக்கில் வென்றது.

இதனை அடுத்து இந்தியா- ஆஸ்திரேலியா அணிகள் இடையே 3 ஆட்டங்கள் கொண்ட 20 ஓவர் கிரிக்கெட் போட்டி தொடர் நடைபெறுகிறது. இதில் முதலாவது 20 ஓவர் கிரிக்கெட் போட்டி ராஞ்சியில் வருகிற 7-ந் தேதியும், 2-வது 20 ஓவர் போட்டி கவுகாத்தியில் 10-ந் தேதியும், 3-வது மற்றும் கடைசி 20 ஓவர் போட்டி ஐதராபாத்தில் 13-ந் தேதியும் நடக்கிறது.

ஆஸ்திரேலியாவுக்கு எதிரான 20 ஓவர் போட்டி தொடருக்கான இந்திய கிரிக்கெட் அணி அறிவிக்கப்பட்டது. தனது மனைவிக்கு உடல்நிலை சரியில்லாததால் ஒருநாள் போட்டி தொடரில் இருந்து விலகிய தொடக்க ஆட்டக்காரர் ஷிகர் தவான் மீண்டும் அணிக்கு திரும்பி இருக்கிறார்.

38 வயதான இடக்கை வேகப்பந்து வீச்சாளர் நெஹரா அணியில் மீண்டும் இடம் பிடித்துள்ளார். நெஹரா கடைசியாக கடந்த ஜனவரி மாதத்தில் நடந்த இங்கிலாந்துக்கு எதிரான 20 ஓவர் போட்டி தொடரில் அணியில் இடம் பெற்று இருந்தார். அதன் பிறகு தற்போது அணிக்கு திரும்பி இருக்கிறார். தமிழக வீரர் தினேஷ் கார்த்திக், ரிஷாப் பாண்டை பின்னுக்கு தள்ளிவிட்டு அணியில் மீண்டும் இடம் பிடித்துள்ளார்.

ஆஸ்திரேலியாவுக்கு எதிரான ஒருநாள் போட்டி தொடரில் அடுத்தடுத்து 4 அரை சதம் அடித்து அசத்திய ரஹானே அணியில் இருந்து நீக்கப்பட்டுள்ளார். ஆஸ்திரேலியாவுக்கு எதிரான ஒருநாள் போட்டி தொடரில் சிறப்பாக செயல்பட்ட சுழற்பந்து வீச்சாளர்கள் யுஸ்வேந்திர சாஹல், குல்தீப் யாதவ், அக்‌ஷர் பட்டேல் ஆகியோர் அணியில் தொடருகிறார்கள். தமிழக சுழற்பந்து வீச்சாளர் அஸ்வின், ஆல்-ரவுண்டர் ரவீந்திர ஜடேஜா ஆகியோருக்கு மீண்டும் வாய்ப்பு அளிக்கப்படவில்லை.

ஆஸ்திரேலியாவுக்கு எதிரான 20 ஓவர் போட்டி தொடருக்கான இந்திய அணி வருமாறு:-

விராட்கோலி (கேப்டன்), ரோகித் சர்மா, ஷிகர் தவான், லோகேஷ் ராகுல், கேதர் ஜாதவ், ஹர்திக் பாண்ட்யா, மனிஷ்பாண்டே, டோனி (விக்கெட் கீப்பர்), குல்தீப் யாதவ், யுஸ்வேந்திர சாஹல், புவனேஷ்வர்குமார், ஜஸ்பிரித் பும்ரா, நெஹரா, தினேஷ் கார்த்திக், அக்‌ஷர் பட்டேல்.
-
தினத்தந்தி