அழுக்குப் பிடித்து மஞ்சளாக இருக்கிறாய் ! (ரஷியக் கவிதை)

**Dr.S.Soundarapandian** · **Dr.S.Soundarapandian** Sun 24 Sep 2017 - 17:40

அழுக்குப் பிடித்து மஞ்சளாக இருக்கிறாய் ! (ரஷியக் கவிதை)

ஓக் மரத்து இலை ஒன்று !
அது குளிராலும், வெப்பத்தாலும், துக்கத்தாலும்-
வாடியிருந்தது !
ஸ்டெப்பிப் புல்வெளியைக் கடந்து-
இரக்கமற்ற புயலால் கடைசியாக –
கருங்கடல் பகுதிக்கு வந்து சேர்ந்தது!

கருங்கடல் கரையில் நின்றது –
ஓர் இளைய பிளேன் மரம்!
காற்று பிளேன்மரக் கிளைகளைத் தடவிக்கொடுத்தது!
மென்மையான பறவைகள் கிளைகளிலிருந்து-
கடல் அரசியைப் பற்றிப் பாடிக்கொண்டிருந்தன!

பிளேன் மரத்து நிழலில் ஒதுங்கியது –
அந்த ஓக் இலை!

ஓக் இலை சொன்னது – ‘நான் ஓக் மரத்துத் தொய்ந்த இலை!
நான் இளமையிலேயே முதிர்ந்துபோனவன்!
கடுமையான தந்தைநாட்டில் வளர்ந்தவன்!
தனியாகவும் – எந்த நோக்கமும் இல்லாது,
இப்படித்தான் அலைகிறேன் !
நிழல் கிடைக்காமல் காய்ந்துள்ளேன்!
தூக்கமும் அமைதியும் இல்லாமல் வாடியிருக்கிறேன் !
புதிய விருந்தாளியான என்னை –
உன்னுடைய மரகத இலைகளால் தழுவிக்கொள்!
எனக்குச் சில அறிவுக் கதைகள் தெரியும் !’

கேட்டதும் சொன்னது பிளேன் மரம் –
‘நீ எனக்குத் தேவை இல்லையே?
நீ அழுக்குப் பிடித்து , மஞ்சளாக இருக்கிறாய் !
உனது கதைகள் எனக்கு எதற்கு?
நீ உன் வழியைப் பார்!’
’நீ எப்படிப்பட்டவன் என்பது எனக்குத் தெரியாது!

சூரியன் என்மேல் அன்புகொண்டுள்ளான்!
அதனால் நான் பளபளக்கிறேன் !பூக்கிறேன் !
நான் என் கிளைகளை வானுயர வளரவிடுகிறேன் !
எனது வேர்களை , இதோ இந்தக் கடல் அலை கழுவுகிறது’ !

(Mikhail Lermontov எழுதிய ரஷ்யமொழிப் பாடலை ஆங்கிலத்தில் மொழிபெயர்த்தவர்- Anatoli; ஆங்கிலத்திலிருந்து தமிழில் மொழிபெயர்த்தவர்- முனைவர் சு.சௌந்தரபாண்டியன்)
Courtesy - lyricstranslate.com