காமெடி நடிகர் ஓமக்குச்சி நரசிம்மன் மரணம்

பிரபல காமெடி நடிகர் ஓமக்குச்சி நரசிம்மன். முன்னணி நடிகர்கள் ரஜினி, கமல், சரத்குமார், அர்ஜுன் போன்ற பலருடன் நடித்துள்ளார். கவுண்டமணியுடன் இணைந்து நிறைய படங்களில் காமெடி செய்துள்ளார்.

ஓமக்குச்சி நரசிம்மனுக்கு தொண்டையில் புற்றுநோய் ஏற்பட்டது. ஆஸ்பத்திரியில் சிகிச்சை பெற்று வந்தார். 4 நாட்களுக்கு முன்பு உடல்நிலை மோசமானது. டாக்டர்கள் தீவிர சிகிச்சை அளித்தும் பலனின்றி நேற்று இரவு 9.30 மணிக்கு மரணம் அடைந்தார். அவருக்கு வயது 73.

ஓமக்குச்சி நரசிம்மன் மனைவி பெயர் சரஸ்வதி. இவர்களுக்கு விஜயலட்சுமி, நிர்மலா, சங்கீதா என்ற மகள்களும் காமேஷ் என்ற மகனும் உள்ளனர். திருவல்லிக்கேணி சிவராமன் தெருவில் உள்ள வீட்டில் பொது மக்கள் அஞ்சலிக்காக அவரது உடல் வைக்கப்பட்டு உள்ளது.

இரண்டாவது மகள் நிர்மலா அமெரிக்காவில் இருக்கிறார். அவருக்கு தகவல் தெரிவிக்கப்பட்டுள்ளது. நாளை மறுநாள் (சனிக்கிழமை) பெசன்ட்நகர் மயானத்தில் உடல் தகனம் நடக்கிறது.

மரணம் அடைந்த ஓமக்குச்சி நரசிம்மன் 1500-க்கும் மேற்பட்ட படங்களில் நடித்துள்ளார். எல்.ஐ.சி.யில் பணியாற்றிய இவர் பழைய நடிகர் சுருளிராஜனுக்கு நெருக்கமானவர்.

150-க்கும் மேல் நாடகங்களில் நடித்துள்ளார். “நாரதரும் 4 திருடர்களும்” என்ற நாடகத்தில் ஓமக்குச்சி என்ற பெயரில் நடித்தார். அதுவே பின்னாளில் அவர் பெயரோடு இணைந்தது.

“அவ்வையார்” என்ற படத்தில் அறிமுகமானார். 1969-ல் “திருக்கல்யாணம்” என்ற படத்தில் முக்கிய பாத்திரத்தில் நடித்தார்.
“குடும்பம் ஒரு கதம்பம்”, “சம்சாரம் அது மின்சாரம்”, “மீண்டும் கோகிலா”, “இந்தியன்”, “ஜென்டில்மேன்”, “முதல்வன்”, “சூரியன்” போன்ற “ஹிட்” படங்களில் நடித்துள்ளார்.

“சூரியன்” படத்தில் ஓமக்குச்சி நரசிம்மன் மேல் எரிச்சலாகும் கவுண்டமணி “நாராயணா இந்த கொசுத்தொல்லை தாங்க முடியலப்பா” என்று பேசும் வசனம் பிரபலம்.

“இந்தியன்” படத்தில் கவுண்டமணியிடம் கைகள் நடுங்கி டிரைவிங் லைசென்ஸ் வாங்குவது... “முதல்வன்” படத்தில் வடிவேலுவின் இடுப்பில் குத்தி ““போடா பண்ணி”” என திட்டவைத்து மேலதிகாரியிடம் மாட்டி விடுவது... போன்றவையும் வயிறுநோக சிரிக்க வைக்கும் காமெடிகள்.