அப்துல்லாவின் அமைதி! (ஒருபக்கக் கதை)

அப்துல்லாவின் அமைதி! (ஒருபக்கக் கதை)

தொழிலாளர்களுக்கு ஒன்றும் புரியவில்லை! இந்த அப்துல்லா, எப்படி இவ்வளவு அமைதி ஆனார்? இவர் ஆடிய ஆட்டம் என்ன? பாடிய பாட்டு என்ன? மனுஷன் மேலதிகாரிகளுக்குச் சிம்ம சொப்பனமாக இருந்தாரே? அவர் வாயைத் திறந்தாலே மற்றவர்கள் ஓடி ஒளிந்தார்களே? குறிப்பாக மேனேஜர் சங்கருக்குப் பரம எதிரியாக இருந்தார்! சங்கர்தான் தொழிலாளர்களுக்குக் கிடைக்கவேண்டிய சலுகைகளை எல்லாம் தடுத்துக்கொண்டிருக்கிறார் என்று அடிக்கடி சங்கர் அறைக்குள்ளே போய் ஏகச் சத்தம் போடுவார்! ஒரு நாள் சங்கரை அறைக்குள்ளே வைத்துப் பூட்டைப்போட்டுப் பூட்டிவிட்டார் ! வெளியில் நின்று ’சங்கருக்கு என் கையில்தான் சாவு’ என்று அலறினார் !

இப்படியெல்லாம் இருந்த அப்துல்லா இன்று வருவது தெரியவில்லை; போவது தெரியவில்லை!
ஏன்? மாற்றத்திற்குக் காரணம் என்ன?

நடந்தது இதுதான் ! அப்துல்லா மனைவியைப் பிரசவத்திற்காக மருத்துவ மனையில் சேர்த்திருந்தான்; வலியால் துடித்தாள் மனைவி! டாக்டர், “அப்துல்லா, உன் மனைவி வயிற்றில் இரண்டு குழந்தைகள் இருக்கின்றன; தாய்க்காரிக்கு மஞ்சள் காமாலை வேறு; சீரியஸ் கேஸ்! பெரிய டாக்டரை வரவழைக்கணும்; ஒரு லட்ச ரூபாய் வரும்; முடியுமா? இல்லைனா வேறு ஆஸ்பிடலைப் பாருங்கள்” என்று கையை விரித்துவிட்டார்! அவ்வளவு தொகைக்கு உடனே என்கே போவார் ?
ஒரு வேலை செய்தார்! நேரே எந்த சங்கருக்குக் காலமெல்லாம் மண்டைக்குடைச்சலாக இருந்தாரோ அந்த சங்கர் வீட்டுக்குப் போனார்! சங்கர் காலில் விழுந்தார்! நடந்ததைச் சொன்னார்! சொல்லிக்கொண்டே சங்கர் காலில் விழுந்தார்! சங்கர், அவரிடம் எதுவும் கேட்கவில்லை! நேரே வீட்டுக்குள்ளே போய் லட்ச ரூபாய்ப் பணத்தோடு வந்தார்; அப்துல்லா கையில் கொடுத்து ,”சீக்கிரமாகப் போ! மனைவியைக் காப்பாற்று”என்றார் !

அப்துல்லாவின் மனைவி அழகான இரு ஆண்குழந்தைகளைப் பெற்றெடுத்தாள்!

அபோதிருந்து அவர் அமைதியானார் ! ஆனால் இது யாருக்கும் தெரியாது! சங்கரும் சொல்லவில்லை; அப்துல்லாவும் சொல்லவில்லை ! கரடுமுரடான மனதைப் பஞ்சாக்கும் வல்லமை அன்பிற்கு உண்டு ! சமுதாயத்தைக் கட்டிக்காப்பது அன்புதான்; அடக்குமுறை அல்ல என்பதையெல்லாம் நினைத்துப்பார்க்க அப்துல்லாவுக்குக் காலம் தேவைப்பட்டது ! அதுதான் அவர் அமைதிக்குக் காரணம் !