மைசூரு தசரா விழா: அர்ஜூனா உள்பட 8 யானைகளுக்கும் நடைபயிற்சி

மைசூரு,

உலகப்புகழ் பெற்ற மைசூரு தசரா விழா அடுத்த மாதம்(செப்டம்பர்) 21-ந் தேதி தொடங்கி 30-ந் தேதி வரை நடக்கிறது. விழாவின் சிகர நிகழ்ச்சியான ஜம்புசவாரி ஊர்வலம் 30-ந் தேதி அன்று கோலாகலமாக நடைபெற இருக்கிறது. இந்த ஆண்டு தசரா விழாவில் கலந்து கொள்வதற்காக முதல்கட்டமாக 8 யானைகள் மைசூரு அரண்மனைக்கு அழைத்து வரப்பட்டுள்ளன. இதில் 750 கிலோ எடை கொண்ட தங்க அம்பாரியை சுமக்கும் அர்ஜூனா யானையும் அடங்கும்.

இந்த நிலையில், நேற்று தசரா யானைகள் அனைத்திற்கும் எடை அளவு சரிபார்க்கப்பட்டன. மைசூரு சயாஜீராவ் ரோடு பம்பு பஜார் அருகில் உள்ள லாரிகள் எடை அளவு சரிபார்க்கும் இடத்தில் வைத்து, அர்ஜூனா உள்பட 8 தசரா யானைகளுக்கும் எடை அளவு சரிபார்க்கப் பட்டது.

ஜம்புசவாரி ஊர்வலம்

பின்னர் அவைகளுக்கு நடைபயிற்சி அளிக்கப்பட்டது. அதாவது 8 யானைகளுக்கும் ஜம்புசவாரி ஊர்வலம் நடைபெறும் வழியான அரண்மனை வளாகத்தில் இருந்து பன்னிமண்டப தீப்பந்து விளையாட்டு மைதானம் வரை நடைபயிற்சி நேற்று முதல் தொடங்கப்பட்டது.

தினமும் காலையில் ஒருமுறையும், மாலையில் ஒருமுறையும் இந்த நடைபயிற்சி அளிக்கப்பட உள்ளது. அதாவது 8 யானைகளும் காலையில் ஒருமுறை அரண்மனை வளாகத்தில் இருந்து தீப்பந்து விளையாட்டு மைதானம் வரை சென்று மீண்டும் அரண்மனையை வந்தடையும், பின்னர் மாலையிலும் இதேபோல் நடைபயிற்சி அளிக்கப்படும். இவ்வாறாக 8 யானைகளும் ஒருநாளைக்கு 20 கிலோ மீட்டர் தூரம் நடைபயிற்சியில் ஈடுபட உள்ளன.

பழங்கள், கரும்புகள் கொடுக்க தடை

யானைகளின் நடைபயிற்சி போலீஸ் பாதுகாப்புடன் நடைபெற இருக்கிறது. யானைகள் நடைபயிற்சியில் ஈடுபடும்போது பொதுமக்கள் யானைகளுக்கு பழங்கள், கரும்புகள் உள்பட எதுவும் கொடுக்கக் கூடாது என்று தடை விதிக்கப்பட்டுள்ளது. 
-

தினமலர்