இன்று 63 வது ஆண்டில் பவானிசாகர் அணை

பவானிசாகர்:
பவானிசாகர் அணை, 63 வது ஆண்டில், இன்று அடியெடுத்து வைக்கிறது.

தமிழகத்தில், தஞ்சை டெல்டா பாசனத்துக்கு அடுத்தபடியாக,
மிகப்பெரிய பாசனப்பரப்பும், தென் மாநிலங்களில், மிகப்பெரிய
மண் அணை என்ற பெருமையையும் பெற்றது, ஈரோடு
மாவட்டத்தில் உள்ள, பவானிசாகர் அணை.

19 மதகுகள்

கீழ்பவானி பிரதான வாய்க்காலில் ஈரோடு, திருப்பூர் மற்றும்
கரூர் மாவட்டங்களில், 2.௦7 லட்சம் ஏக்கர் பாசன வசதி பெறுகிறது.
அணையின் மொத்த உயரம், 120 அடி. ஆனால், சேறு, சகதி கழித்து,
105 அடி மட்டுமே கணக்கில் எடுத்துக் கொள்ளப்படுகிறது.

அணையில், 32.8 டி.எம்.சி., வரை நீர் தேக்கலாம். அணையின் கரை
நீளம், 8.78 கி.மீ.,பவானிசாகர் அணை, 1948ல் பவானி ஆறும்,
மாயாறும் ஒன்று சேருமிடத்தில், 10.50 கோடி ரூபாய் மதிப்பில்
கட்ட பணி துவங்கப்பட்டது.

இதில், 20க்கும் மேற்பட்ட கிராம மக்கள் ஈடுபடுத்தப்பட்டனர்.
தொழில் நுட்பம் வாய்ந்த இயந்திரங்களை அணை கட்டுமான
பணிக்கு பயன்படுத்தியுள்ளனர்.

ஏழு ஆண்டுகள் நடந்த கட்டுமானப் பணி முடிந்து, 1955 ஆக., 19ல்,
அப்போதைய முதல்வர் காமராஜர், திறந்து வைத்தார். அணையில்,
19 மதகுகள் அமைக்கப்பட்டுள்ளன.

உறுதித்தன்மை

இதில் பவானி ஆற்றின் மதகுகளிலிருந்து வெளியேற்றப்படும்
நீரிலிருந்து, 8 மெகாவாட் மின்சாரம், கீழ்பவானி வாய்க்காலில்
வெளியேற்றப்படும் நீரில், 8 மெகாவாட் மின்சாரம் என,
16 மெகாவாட் மின்சாரம் உற்பத்தி செய்யப்படுகிறது.முற்றிலும்
மண்ணாலான அணை, 62 ஆண்டுகளை கடந்தும், உறுதித்
தன்மையுடன் உள்ளது. இத்தகைய பெருமை வாய்ந்த, பவானிசாகர்
அணை இன்று,63வது ஆண்டில் அடியெடுத்து வைக்கிறது.

நேற்று மாலை நிலவரப்படி, அணை நீர்மட்டம், 53.97 அடியாக உள்ளது.
அணைக்கு, 251 கன அடி நீர் வந்து கொண்டிருந்தது.

தினமலர்