இந்திய பெருங்கடலில் சீனாவின் உளவு கப்பல், கார்டோசாட் செயற்கைக்கோள் புகைப்படம் எடுத்தது!

புதுடெல்லி,


கடந்த 2005 ஆம் ஆண்டு மே மாதம் 5 ஆம் தேதி பி.எஸ்.எல்.வி. சி-6 ராக்கெட்டில் முதல் கார்டோ சாட்-1 செயற்கைக்கோள் விண்ணில் வெற்றிகரமாகச் செலுத்தப்பட்டது. அதைத்தொடர்ந்து பி.எஸ்.எல்.வி. சி-7, பி.எஸ்.எல்.வி. சி-9, பி.எஸ்.எல்.வி. சி-15 மற்றும் பி.எஸ்.எல்.வி. சி-34 உள்ளிட்ட ராக்கெட்டுகளில் கார்டோ சாட் வகை செயற்கைகோள்கள் விண்ணில் செலுத்தப்பட்டன. 

நாட்டின் பாதுகாப்புக்காக இந்திய ராணுவம் 13 செயற்கைக்கோள்களைப் பயன்படுத்தி வருகிறது. இவ்வரிசையில் பிஎஸ்எல்வி சி38 ராக்கெட் மூலம், கார்டோசாட் 2 இ செயற்கைக்கோள் ஜூன் 23-ஆம் தேதி விண்ணுக்கு அனுப்பப்பட்டது. 

வெற்றிகரமாக விண்ணில் நிலை நிறுத்தப்பட்ட கார்டோசாட் 2 இ செயற்கைக்கோள் பூமி பகுதிகளை புகைப்படங்கள் எடுத்து அனுப்பத் தொடங்கியது. கார்டோசாட் 2 இ செயற்கைகோள் நாட்டின் பாதுகாப்பில் முக்கியமானதாக பார்க்கப்படுகிறது. இந்த செயற்கைக்கோள்களைப் பிரதானமாக்கி இந்திய ராணுவம், அண்டை நாடுகளின் செயல்பாடுகளை கண்காணித்து வருவதாக இஸ்ரோ விஞ்ஞானிகள் தெரிவித்தனர். 

இந்தியாவின் சிக்கிம் மாநிலம், பூடான் நாட்டின் டோகாலம், சீனாவின் டோங்லாங் ஆகிய பகுதிகள் ஒரு முனையில் சந்திக்கின்றன. 

முச்சந்திப்பு பகுதியை ஆக்கிரமிக்கும் சீனாவின் நகர்வை இந்திய ராணுவம் தடுத்து நிறுத்தி உள்ளது. தொடர்ந்து அங்கு மோதல் போக்கு நிலவி வருகிறது. டோகாலம் பகுதியில் ராணுவம் தீவிரமாக கண்காணித்து வரும் நிலையில் இந்திய பெருங்கடல் பகுதியில் சீன உளவு கப்பலின் நகர்வை செயற்கைகோள் புகைப்படங்கள் காட்டி உள்ளது. 

சீன படைகளின் நகர்வை தொடர்ந்து தெரிந்துக் கொள்ள செயற்கைக்கோள் புகைப்படங்கள் மத்திய அரசுக்கு தெரிவிக்கப்பட்டு வருகிறது என பாதுகாப்பு வட்டார தகவல்கள் தெரிவித்து உள்ளன. தினசரி செயற்கைக்கோள் புகைப்படங்கள் அரசுக்கு அனுப்பட்டு வருகிறது.

இந்தியா-பூடான்-சீனா முச்சந்திப்பில் ஒரு மோதலான நிலை நீடித்து வரும் நிலையில் இந்திய பெருங்கடல் பகுதியில் சீன உளவு கப்பலின் நகர்வை ருக்மினி நாவால் செயற்கைக்கோள் புகைப்படங்களாக எடுத்து உள்ளது. இந்தியா ஜப்பான் அமெரிக்கா ஆகிய நாடுகளின் ‘மலபார் கூட்டு கப்பற்படை பயிற்சி’ யை தொடங்க உள்ளநிலையில் அதனை கண்காணிக்கும் வகையில் சீனாவின் உளவு கப்பல் அனுப்பட்டதாக தெரிகிறது. வங்காள விரிகுடாவில் வரும் 10-ம் தேதி கப்பற்படை பயிற்சி நடைபெற உள்ளது.

 இதற்கிடையே சிக்கிம் செக்டாரில் சீன படைகளின் நகர்வை உள்ளூர் ராணுவமும் வீடியோ எடுத்து வருவதாக பாதுகாப்பு வட்டாரத் தகவல்கள் தெரிவித்து உள்ளன என ஆங்கில மீடியா செய்தி வெளியிட்டு உள்ளது.
-
தினத்தந்தி