சென்னைக்கு குடிநீர் வழங்கும் ஏரிகள் வறண்டன

செங்குன்றம்,

சென்னைக்கு குடிநீர் வழங்கும் ஏரிகளில் முக்கியமான ஏரியான புழல் ஏரி 3,300 மில்லியன் கனஅடி கொள்ளளவு கொண்டதாகும். பருவமழை பொய்த்து விட்டதாலும் கடுமையான வெயில் காரணமாகவும் இந்த ஏரி வறண்டு காணப்படுகிறது.

தற்போது வெறும் 57 மில்லியன் கனஅடி மட்டுமே தண்ணீர் இருப்பு உள்ளது. இந்த தண்ணீரை ஜே.சி.பி. எந்திரம் மூலம் கால்வாய் அமைத்து ராட்சத மோட்டார்கள் மூலம் சென்னை குடிநீருக்காக புழல் சுத்திகரிப்பு நிலையத்திற்கு அனுப்பி வருகிறார்கள்.

இந்த தண்ணீரும் 5 நாட்களுக்குள் வெளியேற்றப்பட்டு புழல் ஏரி முற்றிலுமாக வறண்டு விடும் நிலை உள்ளது.

சோழவரம்

இதேபோல் சென்னைக்கு குடிநீர் வழங்கும் சோழவரம் ஏரியின் மொத்த கொள்ளளவு 880 மில்லியன் கனஅடியாகும். மழை பெய்யாத காரணத்தால் சோழவரம் ஏரி கடந்த ஒரு மாதத்திற்கு முன்பே முற்றிலுமாக வறண்டு விட்டது. மேலும் சென்னைக்கு குடிநீர் வழங்கும் பூண்டி ஏரியும், செம்பரம்பாக்கம் ஏரியும் அடுத்தடுத்து முற்றிலுமாக வறண்டு விட்டது.

சென்னைக்கு குடிநீர் வழங்கும் ஏரிகள் நான்கும் வறண்டு விட்டதால், சென்னை மக்களின் குடிநீர் தேவையை பூர்த்தி செய்ய சென்னை குடிநீர் வாரிய அதிகாரிகள் அறியாமல் திணறி வருகின்றனர்.

கல்குவாரி

கடல் நீரை குடிநீராக்கும் திட்டத்தின் மூலம் கிடைக்கும் தண்ணீர் மட்டுமே சென்னை மக்களுக்கு உறுதியாக கிடைக்கும். இதேபோல், சென்னை புறநகர் பகுதிகளான மாகரல், தாமரைப்பாக்கம், வெள்ளியூர், கீழானூர் ஆகிய பகுதிகளில் ராட்சத ஆழ்துளை கிணறுகள் அமைத்து அங்கிருந்து தண்ணீர் எடுக்கப்பட்டு வருகிறது. இருந்தாலும், ஆழ்துளை கிணறுகளில் உள்ள தண்ணீர் போதுமானதாக இருக்கவில்லை.

மேலும் சென்னை புறநகர் பகுதிகளில் உள்ள 22 கல்குவாரிகளில் தண்ணீர் எடுத்து வினியோகிக்கப்பட்டு வருகிறது.

கேள்விக்குறி

என்றாலும் வருகிற காலங்களில் சென்னை மக்களின் குடிநீர் பற்றாக்குறையை எவ்வாறு தமிழக அரசு சமாளிக்கப்போகிறது என்பது கேள்விக்குறியாக உள்ளது. மேலும் சென்னை புறநகர் பகுதிகளிலுள்ள ஊராட்சி பகுதிகளிலும் ஆழ்துளை கிணறுகள் மூலம் எடுக்கப்பட்ட தண்ணீர் தற்போது போதுமான சப்ளை இல்லாததால் ஊராட்சி பகுதிகளிலும் கடுமையான குடிநீர் பற்றாக்குறை ஏற்பட்டு உள்ளது.
-
தினத்தந்தி

அருமையான சந்தர்ப்பம் ,

அனைத்து சென்னைவாசிகளும் ஒன்று திரண்டு ஆளுக்கு ஒரு பக்கெட் / கூடை மண்ணை இந்த வறண்ட ஏரிகளில் இருந்து எடுத்து வெளியில் போட்டீர்களானால். அடுத்த வருடம் முதல் சென்னைக்கு குடிநீர் பஞ்சமே இருக்காது.

ஒற்றுமையுடன் செய்வீர்களா , அல்லது வழக்கம் போல நமக்கென்ன பக்கத்துவீட்டுக்காரன் செய்யட்டும் என்று இருந்துடலாமா

இதுதான் நல்ல சமயம் .
உடனே வறண்ட ஏரிகளில் (எல்லா ஏரிகளும்தான்) தூர்வார ஏற்பாடு செய்யவேண்டும்.
அவசியமான இடங்களில் ஆழப்படுத்ததலும் செய்யவேண்டும்.

ரமணியன்

மழை இல்லாதது வருத்தமே...

யாராவது வந்து பிளாட்  போட்டு விக்காம பாத்துக்கங்க...