எண்ணூரில் புதிய அனல்மின் நிலையம் அமைக்க எதிர்ப்பு கலெக்டர் தலைமையில் கருத்துகேட்பு கூட்டம்

திருவொற்றியூர்:
சுற்றுச்சூழல் பாதிப்பு ஏற்படுவதல், எண்ணூர் அனல் மின்
நிலையம் அருகே, புதிய அனல்மின் நிலையம் அமைக்க
பொதுமக்கள் கடும் எதிர்ப்பு தெரிவித்து வருகின்றனர்.

இதையொட்டி கலெக்டர் தலைமையில் கருத்து கேட்பு
கூட்டம் நேற்று நடந்தது. எண்ணூர் அனல் மின் நிலையத்தில்
சில மாதங்களுக்கு முன் பழுது காரணமாக மின் உற்பத்தி
நிறுத்தப்பட்டது.

இதையொட்டி மின்வினியோகம் பாதிக்கப்பட்டது. இதற்கிடையே,
பழைய அனல்மின் நிலையத்துக்கு மாற்றாக, புதிய அனல்மின்
நிலையம் கட்டும் பணி கடந்த ஆண்டு துவங்கியது.

சுமார் ரூ.5 ஆயிரம் கோடியில் 660 மெகாவாட் மின் உற்பத்தி
செய்யும் அளவுக்கு, திட்டமிடப்பட்டு பணிகள் நடந்து வருகின்றன.
புதிய அனல்மின் நிலைய கட்டுமான பணியால் சுற்றுப் பகுதியில்
வசிக்கும் மக்களுக்கு பாதிப்பு ஏற்படுவதாக குடியிருப்போர்
நல சங்கங்கள், மீனவர் சங்கங்கள் குற்றஞ்சாட்டின.

இந்நிலையில், புதிய அனல்மின் நிலையம் கட்டுமான பணி
குறித்து, மாசு கட்டுப்பாடு வாரியம் சார்பில், பொதுமக்களிடம்
கருத்துக்கேட்பு கூட்டம், எண்ணூர் அனல்மின் நிலையம் 1ல்
நேற்று நடந்தது.

திருவள்ளூர் கலெக்டர் சுந்தரவல்லி தலைமை வகித்தார்.
மாசு கட்டுப்பாடு வாரிய பொறியாளர் வாசுதேவன் மற்றும்
மின்வாரிய அதிகாரிகள், வருவாய் துறை அதிகாரிகள் கலந்து
கொண்டனர். அதேபோல் பொதுமக்கள் சார்பில் பல்வேறு
சங்கங்கள் கலந்து கொண்டன. கூட்டத்தில் பொதுமக்கள்
சார்பில் பல்வேறு கருத்துகள் தெரிவிக்கப்பட்டன.

அதில், தற்போது இயங்கி வரும் வடசென்னை அனல்மின்
நிலையத்தில் இருந்து வெளியேறும் சாம்பல், முகத்துவார
ஆற்றில் படிந்து, மேடாக மாறிவிட்டது.

மீன்பிடி படகுகள் செல்ல முடியாமல் விபத்தில் சிக்குகின்றனர்.
சுற்று வட்டார மீனவர்களும் பெரிதும் பாதிக்கப்படுகின்றனர்.
புதிய மின் திட்டத்தால், மீனவர்கள் மற்றும் பொதுமக்கள்
பாதிக்காத அளவில் திட்டங்களை செயல்படுத்த வேண்டும்,
சுற்று வட்டார மக்களுக்கு வேலை வாய்ப்பு வழங்க வேண்டும்
என கோரினர்.
-
-----------------------------
தினகரன்