ஆசியாவிலேயே மிகப்பெரிய தேர்’: திருவாரூரில் ஆழித்தேரோட்டம்

-
திருவாரூர்:
திருவாரூர் தியாகராஜ சுவாமி கோயிலில் நாளை பிரசித்தி
பெற்ற ஆழித்தேரோட்டம் நடக்கிறது.
இன்று விநாயகர் தேரோட்டத்தில் தேர் கட்டுமானம் லேசாக
சாய்ந்ததால் சிறிது நேரம் தேரோட்டம் தடைபட்டது.

சைவ சமயத்தின் தலைமைப்பீடமாகவும், சமயக்குரவர்கள்
நால்வரால் பாடல் பெற்ற தலமாகவும் திருவாரூர்
தியாகராஜ சுவாமி கோயில் உள்ளது.

மூலவராக வன்மீகநாதரும், உற்சவராக தியாகராஜரும் உள்ளனர்.
கோயிலின் ஆழித்தேர் ஆசிய கண்டத்திலேயே மிகப்பெரிய தேர்.
ஆழித்தேரோட்டம் நாளை (29ம் தேதி) காலை 7க்கு மேல் 7.30க்குள்
புனர்பூச நட்சத்திரத்தில் நடைபெறுகிறது. 30 அடி அகலம்,
30 அடி உயரம், 220 டன் எடை கொண்ட ஆழி தேர் மூங்கில்
மற்றும் பனஞ்சப்பைகள் கொண்டு மொத்தம் 96 அடி உயரத்தில்
அலங்கரிக்கப்பட்டு, 300 டன் எடையுடன் தேரோட்டத்திற்கு தயார்
நிலையில் உள்ளது.

ஆழித்தேருக்கு பின்னால் அம்பாள், சண்டிகேஸ்வரர் தேர்களும்
வடம் பிடித்து இழுக்கப்படுகின்றன. இதற்காக தற்போதே
திருவாரூரில்பக்தர்கள் குவியத் துவங்கிவிட்டனர்.

பல்வேறு ஊர்களிலிருந்து திருவாரூருக்கு சிறப்பு பஸ்கள் இயக்கப்பட
உள்ளது
திருவாரூர் மாவட்டத்துக்கு நாளை உள்ளூர் விடுமுறை
அறிவிக்கப்பட்டுள்ளது.

ஆழி தேரோட்டத்தையொட்டி இன்று காலை விநாயகர் மற்றும்
சுப்பிரமணியர் சுவாமிகளின் தேரோட்டம் நடைபெற்றது. காலை
5.30 மணிக்கு கீழவீதி நிலையடியில் இருந்து விநாயகர் தேரோட்டம்
துவங்கியது. தேரை ஏராளமானோர் வடம் பிடித்து இழுத்தனர்.
அதன்பின் 7.15 மணியளவில் சுப்பிரமணியர் தேரோட்டம் துவங்கியது.
நகராட்சி அலுவலக வளைவில் திரும்பிய போது, விநாயகர் தேரின்
மேற்புற மூங்கில் கட்டுமானம் லேசாக சாய்ந்தது.

இதனால் தேரோட்டம் நிறுத்தப்பட்டு, அதை சரிசெய்யும் பணியில்
தொழிலாளர்கள் ஈடுபட்டனர். இன்று மாலை 2 தேர்களும் நிலைக்கு
வரும் என்று எதிர்பார்க்கப்படுகிறது.
-
---------------------------
தினகரன்