தெற்கு ரெயில்வேயில் தண்ணீர் தட்டுப்பாடு: ரெயில் பெட்டிகள் தூய்மை பணியில் தொய்வு

-
சென்னை,

ரெயில் பெட்டி கழிவறைக்கு குடிநீரை பயன்படுத்தும் நிலைக்கு
பயணிகள் தள்ளப்பட்டுள்ளனர்.

50 கோடி பயணிகள்
இந்தியன் ரெயில்வே நாட்டில் 17 மண்டலங்களாக செயல்பட்டு
வருகிறது. இதில் சென்னை சென்டிரலை தலைமை இடமாக
கொண்டு தெற்கு ரெயில்வே இயங்குகிறது. சென்னை, திருச்சி,
மதுரை, சேலம், பாலக்காடு, திருவனந்தபுரம் ஆகிய 6 கோட்டங்கள்
தெற்கு ரெயில்வேயில் இடம் பெற்றுள்ளன.

தெற்கு ரெயில்வேயில் நாள் ஒன்றுக்கு 6 லட்சத்து 20 ஆயிரம்
பயணிகள் வீதம் என ஆண்டுக்கு சுமார் 50 கோடி பயணிகள்
ரெயிலில் பயணிப்பதாக புள்ளி விவரங்கள் தெரிவிக்கின்றன.

கடந்த 2016–17–ம் நிதி ஆண்டில் பயணிகள் வருவாய் மூலம்
ரூ.3 ஆயிரத்து 565 கோடி பெற்று இந்தியன் ரெயில்வேயில்
தெற்கு ரெயில்வே முதல் இடத்தை பிடித்தது.

வெந்த புண்ணில்...
தெற்கு ரெயில்வே மூலம் மத்திய அரசுக்கு அதிக வருவாய்
கிடைத்தாலும், ரெயில்வே பட்ஜெட்டுகளில் தெற்கு ரெயில்வே
கண்டு கொள்ளப்படுவது இல்லை என்பது நிதர்சனமான உண்மையாக
இருந்து வருகிறது.

ஒவ்வொரு ஆண்டும் ரெயில்வே பட்ஜெட் தாக்கல் செய்யப்படும்
நேரத்தில், தமிழகத்தில் தென் மாவட்டங்களுக்கு கூடுதல் ரெயில்கள்
அறிவிக்கப்படுமா? பழைய ரெயில் பெட்டிகளுக்கு பதிலாக புதிய
ரெயில் பெட்டிகள் வழங்கப்படுமா? என்று பயணிகள் ஆவலுடன்
எதிர்பார்ப்பதும், கடைசியில் ஏமாற்றமே மிஞ்சுவதும் சம்பிரதாயமாக
இருக்கிறது.

தெற்கு ரெயில்வேயில் பெரும்பாலான ரெயில் பெட்டிகள் மிகவும்
பழமை வாய்ந்ததாக இருப்பதால் ரெயில்கள் வேகமாக இயக்கப்படும்
நேரங்களில் பெட்டிகள் தடதடவென்று பயங்கர சத்தத்துடன் அதிர்கின்றன.
இதனால் குழந்தைகளும், வயதான, நோயுற்ற பயணிகளும் அவதிக்கு
உள்ளாகின்றனர். குறிப்பாக இரவு நேர ரெயிலில் பயணிக்கும் போது
அதிர்வு சத்தம் பயணிகளின் தூக்கத்தை தொலைப்பதாக அமைந்துள்ளது.


இது ஒருபுறம் இருக்க எலி, வி‌ஷ பூச்சிகள் ஆதிக்கமும் ரெயில்
பயணிகளை பெருந்துயரத்தில் ஆழ்த்துகிறது. தெற்கு ரெயில்வேயில்
பயணிக்கும் பயணிகள் இதுபோன்ற இன்னல்களை அனுபவித்து வரும்
வேளையில், ‘‘வெந்த புண்ணில் வேல் பாய்ச்சுவது’’ போன்று தண்ணீர்
பிரச்சினையும் அமைந்துள்ளது.

சொல்லொண்ணா துயரம்

தமிழகத்தில் ஏற்பட்டுள்ள வறட்சியால் நிலவும் குடிநீர் தட்டுப்பாடு
தெற்கு ரெயில்வேயிலும் கடும் தாக்கத்தை ஏற்படுத்தி உள்ளது.
ரெயில் பெட்டி கழிவறைகளில் தண்ணீர் விரைவில் தீர்ந்து விடுவதால்,
இயற்கை உபாதையை கழிக்க செல்லும் பயணிகள் சொல்லொண்ணா
துயரம் அடைகின்றனர்.

குடிப்பதற்காக பாட்டில்களில் கொண்டு செல்லும் தண்ணீரை கழிப்பறைக்கு
பயன்படுத்த வேண்டிய நிர்ப்பந்தமும் ஏற்பட்டுள்ளது. மேலும் ரெயில்வே
பணிமனைகளில் ரெயில் பெட்டியை சுத்தம் செய்யும் பணியிலும் தொய்வு
காணப்படுகிறது.

தண்ணீர் தேவை
இதுகுறித்து ரெயில்வே தொழிற்சங்கத்தை சேர்ந்த ஒருவர் கூறியதாவது:–

தெற்கு ரெயில்வேயில் 6 ஆயிரத்து 300 ரெயில் பெட்டிகள் பராமரிக்கப்படுகிறது.
24 பெட்டிகள் கொண்ட ஒரு ரெயிலை சுத்தப்படுத்த 21 ஆயிரத்து 600 லிட்டர்
தண்ணீர் தேவைப்படுகிறது. இதில் ஒரு பெட்டியின் உள் பகுதியை தூய்மைப்படுத்த
100 லிட்டர் தண்ணீரும், வெளிப் பகுதியை தூய்மைப்படுத்த 250 லிட்டர்
தண்ணீரும் செலவாகிறது.

ரெயில் பெட்டி கழிவறை, வாஷ்–பே‌ஷன் ஆகிய பயன்பாடுகளுக்காக
ஒரு பெட்டியில் 900 லிட்டர் தண்ணீர் நிரப்பப்படுகிறது. 300 கி.மீட்டர்
ரெயில் சென்ற பின்னர் தண்ணீர் தேவைக்கு ஏற்ப மீண்டும் தண்ணீர்
நிரப்பப்படும். தற்போது நிலவி வரும் தண்ணீர் தட்டுப்பாட்டால்
20 முதல் 30 சதவீதம் தண்ணீர் பற்றாக்குறை ஏற்பட்டுள்ளது.

இதனால் ரெயில் பெட்டிகளை அரை குறையாக சுத்தம் செய்ய வேண்டிய
நிலை ஏற்பட்டுள்ளது. மேலும் ரெயில் பெட்டி கழிவறை பயன்பாட்டிற்கான
தண்ணீரும் வெகுவாக குறைக்கப்பட்டுள்ளது.

இதன் காரணமாக ரெயில்கள் சிறிது தொலைவு சென்றவுடனே
கழிவறைகளில் தண்ணீர் தீர்ந்து விடுவதால் பயணிகள் கோபத்துக்கு
ரெயில்வே ஊழியர்கள் ஆளாகுகின்றனர். ரெயில்வே ஊழியர்கள் மீது
பயணிகள் அதிருப்தி அடைகின்றனர்.

எனவே ரெயில் பணிமனைகளில் நிலவும் குடிநீர் தட்டுப்பாட்டை
போக்க தேவையான நடவடிக்கைகளை தெற்கு ரெயில்வே நிர்வாகம்
மேற்கொள்ள வேண்டும் என்பதை வலியுறுத்தி போராட்டங்கள்
நடத்தவும் நாங்கள் திட்டமிட்டு வருகிறோம். இவ்வாறு அவர் கூறினார்.

கசப்பாகும் பயணம்
-
ரெயில் நிலையங்களில் இருந்து ரெயில்கள் புறப்படும் நேரத்தில்,
‘உங்கள் பயணம் இனிதாகுக...’ என்று ஒலிக்கும் வாசகங்கள்,
தற்போது தெற்கு ரெயில்வேயில் நிலவும் தண்ணீர் தட்டுப்பாட்டால்
கசப்பானதாகவே அமைந்துள்ளது என்று சொன்னால் மிகை ஆகாது.
-
தினத்தந்தி